ନୂଆଦିଲ୍ଲୀ - ମୁମ୍ୱାଇର ଘାଟକୋପରରେ ୧୩ ମେ’ରେ ଖରାପ ପାଣିପାଗ କାରଣରୁ ଏକ ବଡ଼ ଦୁର୍ଘଟଣା ହୋଇଥିଲା। ହଠାତ୍ ଆସିଥିବା ଧୂଳି ଝଡ଼ ଓ ପ୍ରବଳ ବର୍ଷାରେ ଘାଟକୋପରର ଛେଦା ନଗରରେ ଏକ ବଡ଼ ହୋର୍ଡିଂ ପେଟ୍ରୋଲ ପମ୍ପ ଉପରେ ଖସି ପଡିଥିଲା। ଏହି ଦୁର୍ଘଟଣାରେ ୧୬ଜଣ ଲୋକଙ୍କ ଜୀବନ ଚାଲି ଯାଇଛି। ଏବେ ଖବର ଆସିଛି କି, ବଲିଉଡ୍ ଅଭିନେତା କାର୍ତ୍ତିକ ଆର୍ଯ୍ୟନଙ୍କ ମାମୁଁ –ମାଇଁ ମଧ୍ୟ ଏହି ଦୁର୍ଘଟଣାର ଶିକାର ହୋଇଥିଲେ ଏବଂ ଦୁହିଁଙ୍କର ଜୀବନ ଚାଲି ଯାଇଥିଲା।
ମୁମ୍ୱାଇ ହୋର୍ଡିଂ ଦୁର୍ଘଟଣାରେ ୭୪ଜଣ ଲୋକ ଆହତ ହୋଇଛନ୍ତି। ବୁଧବାର ଘଟଣାସ୍ଥଳରୁ ଦୁଇଟି ଶବକୁ ବାହାର କରାଯାଇଥିଲା। ମୃତକ ଦୁହେଁ ଥିଲେ ରିଟାୟର୍ଡ ଏୟାର ଟ୍ରାଫିକ୍ କଣ୍ଟ୍ରୋଲର ଜେନେରାଲ ମ୍ୟାନେଜର ମନୋଜ ଚନସୋରିଆ ଓ ତାଙ୍କର ପତ୍ନୀ ଅନୀତା। ଏହି ଦୁଇଜଣ ଅଭିନେତା କାର୍ତ୍ତିକ ଆର୍ଯ୍ୟନଙ୍କ ସଂପର୍କୀୟ ମାମୁଁ –ମାଇଁ ଥିଲେ। କାର୍ତ୍ତିକ ଆର୍ଯ୍ୟନ ଗୁରୁବାର ତାଙ୍କର ଅନ୍ତିମ ସଂସ୍କାରରେ ସାମିଲ ହେବାକୁ ଯାଇଥିଲେ।
ହିନ୍ଦୁସ୍ତାନ ଟାଇମ୍ସର ରିପୋର୍ଟ ମୁତାବିକ, ପେଟ୍ରୋଲ ପମ୍ପରେ ଯେଉଁ ହୋର୍ଡିଂ ଖସି ପଡ଼ିଥିଲା, ତାହା ଅବୈଧ ଥିଲା। ଏହି ମାମଲାରେ ମୁମ୍ୱାଇ ପୁଲିସ ଭାୱେଶ ଭିଣ୍ଡେ, ଇଗୋ ମିଡ଼ିଆର ଡାଇରେକ୍ଟରଙ୍କୁ ଗିରଫ କରିଛି। ଭିଣ୍ଡେଙ୍କର ହିଁ କମ୍ପାନୀ ଏହି ୧୨୦ଫୁଟର ହୋର୍ଡିଂକୁ ଉକ୍ତ ଅଞ୍ଚଳରେ ଲଗାଇ ଥିଲା। ଖୁବ୍ ଜୋରରେ ଝଡ଼ ତୋଫାନରେ ଏହି ହୋର୍ଡିଂ ଏକ ପେଟ୍ରୋଲ ପମ୍ପ ଉପରେ ଖସି ପଡ଼ିଲା ଏବଂ ପାଖାପାଖି ୧୦୦ ଲୋକ ଏହା ତଳେ ଚାପି ହୋଇ ଯାଇ ଥିଲେ। ଉକ୍ତ ଦୁର୍ଘଟଣାରେ ୧୬ ଜଣ ଲୋକଙ୍କ ଜୀବନ ଚାଲି ଯାଇଛି। ଆହତଙ୍କ ଚିକିତ୍ସା ଚାଲୁ ରହିଛି।
