ଦୀର୍ଘ ୧୪୫ ଦିନର ପରେ କାର୍ଗିଲ୍ରେ ମୋବାଇଲ ଇଣ୍ଟରନେଟ ସେବା ଆରମ୍ଭ
ଶ୍ରୀନଗର ୨୮/୧୨: ଦୀର୍ଘ ୧୪୫ ଦିନର ବ୍ୟବଧାନ ପରେ ଶୁକ୍ରବାର କେନ୍ଦ୍ର ଶାସିତ ଅଞ୍ଚଳ ଲଦାଖର କାର୍ଗିଲ ସହରରେ ମୋବାଇଲ ଇଣ୍ଟରନେଟ ସେବା ପୁଣି ଆରମ୍ଭ ହୋଇଛି । ଅଗଷ୍ଟ ୫ରେ ଜମ୍ମୁ-କାଶ୍ମୀରକୁ ମିଳିଥିବା ସ୍ୱତନ୍ତ୍ର ମାନ୍ୟତା ସଂକ୍ରାନ୍ତ ୩୭୦ ଧାରା ଉଚ୍ଛେଦ କରାଯିବା ଦିନଠାରୁ ସେଠାରେ ମୋବାଇଲ ଇଣ୍ଟରନେଟ ସେବା ବନ୍ଦ ରହିଥିଲା।
ଗତ ୪ମାସ ମଧ୍ୟରେ କାର୍ଗିଲରେ କୌଣସି ଅପ୍ରୀତିକର ପରିସ୍ଥିତି ଘଟିନାହିଁ । ପରିସ୍ଥିତି ସ୍ୱାଭାବିକ ହେବା ପରେ ତାକୁ ଦୃଷ୍ଟିରେ ରଖି ମୋବାଇଲ ଇଣ୍ଟରନେଟ ସେବା ପୁଣିଥରେ ଆରମ୍ଭ ହୋଇଛି । ତେବେ ଏହି ସେବାର ଅପବ୍ୟବହାର ନକରିବାକୁ ସମସ୍ତଙ୍କୁ ପରାମର୍ଶ ଦିଆଯାଇଛି । ଏପରିକି ଧାର୍ମିିକ ନେତାମାନେ ମଧ୍ୟ ଏହି ପ୍ରସଙ୍ଗରେ ସମସ୍ତଙ୍କୁ ଅନୁରୋଧ କରିଛନ୍ତି । ବ୍ରଡବ୍ୟାଣ୍ଡ ସେବା ମଧ୍ୟ କାର୍ଗିଲରେ ଚାଲୁ ରହିଛି । କିନ୍ତୁ ଜମ୍ମୁ-କାଶ୍ମୀରରେ କେବେ ଇଣ୍ଟରନେଟ ସେବା ଚାଲୁ ହେବ ତାହା ଜଣାପଡିନି । ଜମ୍ମୁ-କାଶ୍ମୀର ଓ ଲଦାଖରୁ ୭୦ ହଜାର ଯବାନଙ୍କୁ ପ୍ରତ୍ୟାହାର ଲାଗି କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି ।
