ନୂଆଦିଲ୍ଲୀ, ୨୬/୦୪ : ଲୋକସଭା ନିର୍ବାଚନର ଦ୍ଵିତୀୟ ପର୍ଯ୍ୟାୟ ମତଦାନ ଜାରି ରହିଛି। ୧୩ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳରେ ୮୮ ଆସନରେ ୧୨୦୨ ପ୍ରାର୍ଥୀଙ୍କ ଭାଗ୍ୟ ନିରୂପଣ କରୁଛନ୍ତି ଭୋଟର। ତେବେ ଦ୍ଵିତୀୟ ପର୍ଯ୍ୟାୟ ନିର୍ବାଚନରେ ବାଜିରେ ଲାଗିଛି ବହୁ ହେଭିୱେଟ୍ଙ୍କ ଭାଗ୍ୟ। ୱାୟନାଡରୁ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧି, ୬ କେନ୍ଦ୍ର ମନ୍ତ୍ରୀ ୨ ପୂର୍ବତନ ମୁଖ୍ୟମନ୍ତ୍ରୀ, ଲୋକସଭା ଅଧ୍ୟକ୍ଷ ଏବଂ ବହୁ ପୂର୍ବତନ ମନ୍ତ୍ରୀ ସାମିଲ ଅଛନ୍ତି।
ରାହୁଲ ଗାନ୍ଧି : ପୂର୍ବତନ କଂଗ୍ରେସ ଅଧ୍ୟ୩ ରାହୁଲ ଗାନ୍ଧି କେରଳର ୱାୟନାଡ ସିଟ୍ରୁ ମଇଦାନକୁ ଓହ୍ଲାଇଛନ୍ତି। ୨୦୧୯ରେ ରାହୁଲ ଏହି ସିଟ୍ରେ ଜିତିଥିଲେ। ଏଥର ତାଙ୍କର ମୁକାବିଲା ବିଜେପିର କେ.କେ ସୁରେନ୍ଦ୍ରନ ଏବଂ ଏନି ରାଜାଙ୍କ ସହ ହେବ। ୨୦୧୯ରେ ୱାୟନାଡରେ ୮୦.୩୭ ପ୍ରତିଶତ ମତଦାନ ହୋଇଥିଲା।
ରାଜୀବ ଚନ୍ଦ୍ରଶେଖର ବନାମ ଶଶି ଥରୁର : କେରଳର ତୁରୁଅନନ୍ତପୁରମ ସିଟ୍ରୁ ଦୁଇ ହେଭିୱେଟ୍ଙ୍କ ମଧ୍ୟରେ ହେବ କାଣ୍ଟେକା ଟକ୍କର। କଂଗ୍ରେସ ଏଠାରୁ ଶଶି ଥରୁରଙ୍କୁ ପ୍ରାର୍ଥୀ କରିଥିବା ବେଳେ ବିଜେପି ଏଠାରୁ କେନ୍ଦ୍ରମନ୍ତ୍ରୀ ରାଜୀବ ଚନ୍ଦ୍ରଶେଖରଙ୍କ ଉପରେ ଭରସା କରିଛି। ରାଜୀବ ଚନ୍ଦ୍ରଶେଖର ରାଜ୍ୟସଭା ସାଂସଦ ଥିଲଲେ। ୨୦୧୯ରେ ଏହି ଆସନରେ ଶଶି ଥରୁର ବିଜୟୀ ହୋଇଥିଲେ। ଗତ ନିର୍ବାଚନରେ ଏଠାରେ ୭୩.୭୪ ପ୍ରତିଶତ ମତଦାନ ହୋଇଥିଲା।
ହେମା ମାଳିନୀ : ଉତ୍ତର ପ୍ରଦେଶର ବହୁ ଚର୍ଚ୍ଚିତ ସିଟ୍ ମଥୁରାରେ ବିଜେପି ଟିକଟରୁ ଫିଲ୍ମ ଅଭିନେତ୍ରୀ ହେମା ମାଳିନୀ ନିର୍ବାଚନ ଲଢୁଛନ୍ତି। ତାଙ୍କର ମୁକାବିଲା କଂଗ୍ରେସର ମୁକେଶ ଧନଗର ଏବଂ ବିଏସପିର ସୁରେଶ ସିଂହଙ୍କ ସହ ହେଉଛି। ୨୦୧୯ରେ ଏହି ସିଟ୍ରେ ହେମା ମାଳିନୀ ବିଜୟୀନୀ ହୋଇଥିଲେ। ଗତ ନିର୍ବାଚନରେ ଏଠାରେ ୬୧.୦୮ ପ୍ରତିଶତ ମତଦାନ ହୋଇଥିଲା।
ଅରୁଣ ଗୋଭିଲ : ଉତ୍ତର ପ୍ରଦେଶର ଆଉ ଏକ ଚର୍ଚ୍ଚିତ ସିଟ୍ ମେରଠରେ ବିଜେପି ଟିକଟରୁ ଲଢୁଛନ୍ତି ଅଭିନେତା ଅରୁଣ ଗୋଭିଲ। ତାଙ୍କ ପାଇଁ ଅଭିନେତ୍ରୀ ଦୀପିକା ଚିଖଲିଆ ଏବଂ ସୁନୀଲ ଲହରୀ ପ୍ରଚାର କରିଥିଲେ। ଏଥର ଅରୁଣ ଗୋଭିଲଙ୍କ ମୁକାବିଲା ସପାର ସୁନୀତା ବର୍ମା ଏବଂ ବିଏସପିର ଦେବବ୍ରତ ତ୍ୟାଗୀଙ୍କ ସହ ହେଉଛି। ୨୦୧୯ରେ ଏହି ସିଟ୍ରେ ବିଜେପିକୁ ବିଜୟ ମିଳିଥିଲା।
ଦାନିଶ ଅଲି : ଉତ୍ତର ପ୍ରଦେଶର ଅମରୋହା ସିଟ୍ରୁ ସାଂସଦ ଦାନିଶ ଅଲି କଂଗ୍ରେସ ଟିକଟରୁ ଲଢୁଛନ୍ତି। ତାଙ୍କର ମୁକାବିଲା ବିଜେପିର କଂୱର ସିଂହ ତଂୱର ଏବଂ ବିଏସପିର ମୁଜାହିଦ ହୁସୈନଙ୍କ ସହ ହେଉଛି।
କେସି ବେଣୁଗୋପାଳ : କଂଗ୍ରେସ ନେତା କେସି ବେଣୁଗୋପାଳ କେରଳର ଅଲପୁଝା ସିଟ୍ରୁ ଭାଗ୍ୟ ପରୀକ୍ଷା କରୁଛନ୍ତି। ତାଙ୍କର ମୁକାବିଲା ବିଜେପିର ଶୋଭା ସୁରେନ୍ଦ୍ରନ ଏବଂ ଏଏମ ଆରିଫଙ୍କ ସହ ହେଉଛି। ଗତ ନିର୍ବାଚନରେ ଏହି ସିଟ୍ରୁ ମାକପା ପ୍ରାର୍ଥୀ ଏଏମ ଆରିଫ ବିଜୟୀ ହୋଇଥିଲେ।
ଓମ୍ ବିର୍ଲା : ଲୋକସଭା ଅଧ୍ୟକ୍ଷ ଓମ୍ ବିର୍ଲା ରାଜସ୍ଥାନର କୋଟା ସିଟ୍ରୁ ନିର୍ବାଚନ ଲଢୁଛନ୍ତି। କଂଗ୍ରେସର ପ୍ରହ୍ଲାଦ ଗୁଞ୍ଜଲ ତାଙ୍କ ସହ ପ୍ରତିଦ୍ଵନ୍ଦିତା କରୁଛନ୍ତି। ୨୦୧୯ରେ ଏହି ସିଟ୍ରୁ ଓମ୍ ବିର୍ଲାଙ୍କୁ ସଫଳତା ମିଳିଥିଲା।
ଭୂପେଶ ବଘେଲ ; ଛତିଶଗଡ଼ର ପୂର୍ବତନ ମୁଖ୍ୟମନ୍ତ୍ରୀ ଭୂପେଶ ବଘେଲ ରାଜନାନ୍ଦଗାଁଓ ସିଟ୍ରୁ ନିର୍ବାଚନ ଲଢୁଛନ୍ତି। ୨୦୧୯ରେ ଏହି ସିଟ୍ରେ ବିଜେପିର ସନ୍ତୋଷ ପାଣ୍ଡେ ନିର୍ବାଚନ ଜିତିଥିଲେ।
ବୈଭବ ଗେହଲଟ : ରାଜସ୍ଥାନର ଜାଲୌର ସିଟ୍ରେ କଂଗ୍ରେସର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ପୁଅ ବୈଭବ ଗେହଲଟ ନିର୍ବାଚନ ଲଢୁଛନ୍ତି। ବିଜେପିର ଲୁମ୍ବାରାମଙ୍କ ସହ ତାଙ୍କର ମୁକାବିଲା ହେଉଛି।