ନୂଆଦିଲ୍ଲୀ,୨୬/୦୪: ଶୁକ୍ରବାର ୨୦୨୪ ଲୋକସଭା ନିର୍ବାଚନର ଦ୍ୱିତୀୟ ପର୍ଯ୍ୟାୟରେ୧୨ ରାଜ୍ୟ ଓ ଗୋଟିଏ କେନ୍ଦ୍ରଶାସିତ ଅଞ୍ଚଳର ମୋଟ ୮୮ ଆସନରେ ମତଦାନ ଆରମ୍ଭ ହୋଇଛି। ଏହି ପର୍ଯ୍ୟାୟରେ ମୋଟ ୮୯ ଆସନରେ ଭୋଟିଂ ହେବ । କିନ୍ତୁ ମଧ୍ୟ ପ୍ରଦେଶର ବୈତୁଲ ଆସନର ବସପା ପ୍ରାର୍ଥୀଙ୍କ ଦେହାନ୍ତ ପରେ ଉକ୍ତ ଆସନରେ ମେ ୭ରେ ଭୋଟିଂ ହେବ । ୨୦୧୯ରେ ଏହି ୮୮ ଆସନ ମଧ୍ୟରୁ ବିଜେପି ସର୍ବାଧିକ ୫୦ ଏବଂ ଏନ୍ଡିଏ ସହଯୋଗୀ ଦଳ ୮ଟି ଆସନ ପାଇଥିଲା । କଂଗ୍ରେସକୁ ୨୧ ଆସନ ମିଳିଥିଲା ବେଳେ ଅନ୍ୟ ଦଳଗୁଡ଼ିକୁ ୯ଟି ମିଳିଥିଲା ।
ନିର୍ବାଚନ କମିଶନଙ୍କ ରିପୋର୍ଟ ମୁତାବକ ଦ୍ୱିତୀୟ ପର୍ଯ୍ୟାୟରେ ୧,୧୯୮ ପ୍ରାର୍ଥୀ ମଇଦାନରେ ଅଛନ୍ତି । ଏମାନଙ୍କ ମଧ୍ୟରେ ୧,୦୯୭ ପୁରୁଷ ଓ ୧୦୦ ଜଣ ମହିଳା । ଜଣେ ପ୍ରାର୍ଥୀ ତୃତୀୟ ଲିଙ୍ଗୀ । ପ୍ରାର୍ଥୀମାନଙ୍କ ମଧ୍ୟରୁ ୨୫୦ ଜଣଙ୍କ ନାମରେ ଫୌଜଦାରି ମାମଲା ରହିଛି । ୩୯୦ ପ୍ରାର୍ଥୀ କୋଟିପତି । ଏହି ପର୍ଯ୍ୟାୟରେ ବିଜେପିର ସର୍ବାଧିକ ୬୯ ପ୍ରାର୍ଥୀ ରହିଥିବା ବେଳେ କଂଗ୍ରେସର ୬୮, ସିପିଆଇ ଓ ଜେଡିୟୁର ୫ ଲେଖାଏଁ ରହିଛନ୍ତି । ସପାର ୪ ପ୍ରାର୍ଥୀ ଲଢ଼ୁଛନ୍ତି । ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ନିର୍ବାଚନ କମିଶନ ମତଦାନ ସମୟକୁ ୨ ଘଣ୍ଟା ବଢ଼ାଇଛନ୍ତି । ଏହା ଅନୁସାରେ ସକାଳ ୭ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ମତଦାନ ହେବ ।
ଦ୍ୱିତୀୟ ପର୍ଯ୍ୟାୟରେ କେରଳର ସମସ୍ତ ୨୦ ଆସନରେ ଭୋଟ ଗ୍ରହଣ ହେବ । ସେହିଭଳି କର୍ଣ୍ଣାଟକର ୧୪, ରାଜସ୍ଥାନର ୧୩, ଉତ୍ତର ପ୍ରଦେଶ ଓ ମହାରାଷ୍ଟ୍ରର ୮ଟି ଲେଖାଏଁ ଆସନରେ ମତଦାନ ଗ୍ରହଣ ହେବ। ଏହାଛଡ଼ା ମଧ୍ୟ ପ୍ରଦେଶର ୭, ଆସାମ ଓ ବିହାରର ୫ ଲେଖାଏଁ, ପଶ୍ଚିମବଙ୍ଗ ଓ ଛତିଶଗଡ଼ର ୩ ଲେଖାଏଁ ଏବଂ ଜମ୍ମୁ-କାଶ୍ମୀର, ମଣିପୁର ଓ ତ୍ରିପୁରାର ଗୋଟିଏ ଲେଖାଏଁ ଲୋକସଭା ଆସନରେ ମଧ୍ୟ ମତଦାନ ହେବ । ଏପ୍ରିଲ ୧୯ରେ ଅନୁଷ୍ଠିତ ପ୍ରଥମ ପର୍ଯ୍ୟାୟ ନିର୍ବାଚନରେ ୨୧ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୋଟ ୧୦୨ ଆସନରେ ଭୋଟ୍ ହୋଇଥିଲା ।
ଦ୍ୱିତୀୟ ପର୍ଯ୍ୟାୟରେ ବିଜେପି ପ୍ରାର୍ଥୀ ଅରୁଣ ଗୋଭିଲ (ମୀରଟ), ହେମା ମାଳିନୀ (ମଥୁରା), ଓମ୍ ବିର୍ଲା (କୋଟା), ତେଜସ୍ୱୀ ସୂର୍ଯ୍ୟ (ଦକ୍ଷିଣ ବେଙ୍ଗାଲୁରୁ)ଙ୍କ ଭାଗ୍ୟ ନିର୍ଦ୍ଧାରଣ ହେବ । ସେହିଭଳି ଛତିଶଗଡ଼ର ରାଜନନ୍ଦଗାଓଁରୁ ଲଢ଼ୁଥିବା କଂଗ୍ରେସ ପ୍ରାର୍ଥୀ ଭୂପେଶ ବାଘେଲ, କେରଳର ୱାୟନାଡରୁ ଲଢ଼ୁଥିବା କଂଗ୍ରେସ ନେତା ରାହୁଲ ଗାନ୍ଧୀ, ତିରୁଅନନ୍ତପୁରମରୁ ଲଢ଼ୁଥିବା ଶଶୀ ଥରୁରଙ୍କ ଭାଗ୍ୟ ମଧ୍ୟ ଏହି ପର୍ଯ୍ୟାୟ ମତଦାନରେ ନିର୍ଦ୍ଧାରଣ ହେବାକୁ ଯାଉଛି । ୱାୟନାଡ ଆସନରୁ ରାହୁଲ ଗାନ୍ଧୀ ୨୦୧୯ରେ ନିର୍ବାଚନ ଜିତିଥିଲେ । ଏଥର ମଧ୍ୟ ୱାୟନାଡରୁ ପ୍ରାର୍ଥୀ ହୋଇଛନ୍ତି ରାହୁଲ । ସେହିଭଳି ତିରୁଅନନ୍ତପୁରମରୁ ପୁଣି ଥରୁରଙ୍କୁ ପ୍ରାର୍ଥୀ କରିଛି କଂଗ୍ରେସ ।
