ପୁରୀ,୧୪/୦୫: ପ୍ରେମ ପାଇଁ କୁମ୍ଭାରପଡ଼ା ଥାନା ଅଧୀନ ବାଲିଉପର ବସ୍ତିରେ ଘଟିଛି ଉନ୍ମତ୍ତ କାଣ୍ଡ । ୨ ଜଣ ମହିଳା ରକ୍ତାକ୍ତ ହୋଇଥିବା ବେଳେ ଜଣଙ୍କ ଅବସ୍ଥା ଗୁରୁତର ହୋଇଛି । ଉଭୟ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସା ହେବା ପରେ କୁମ୍ଭାରପଡ଼ା ଥାନାରେ ଏତଲା ଦେଇଛନ୍ତି । ଆହତ ମହିଳାଙ୍କ ମଧ୍ୟରୁ ଜଣେ ବାଲିଉପର ବସ୍ତିର ହୋଇଥିବା ବେଳେ ଅନ୍ୟ ଜଣକ ଚାରିନଳାର ବୋଲି ଜଣାପଡ଼ିଛି । ସୁରକ୍ଷା ଦୃଷ୍ଟିରୁ ଉଭୟଙ୍କ ପରିଚୟ ଗୋପନ ରଖାଯାଇଛି ।
ଅଭିଯୋଗ ଅନୁସାରେ ବାଲିଉପର ବସ୍ତିର ମହିଳାଙ୍କ ଝିଅ ଓ ସେହି ଅଞ୍ଚଳର ଜଣେ ଯୁବକ ମଧ୍ୟରେ ପ୍ରେମ ସମ୍ପର୍କ ରହିଛି । ଏହି କାରଣକୁ କେନ୍ଦ୍ର କରି ସୋମବାର ସନ୍ଧ୍ୟାରେ ଯୁବତୀଙ୍କ ମା’ ଓ ଯୁବକଙ୍କ ପରିବାର ମଧ୍ୟରେ ଝଗଡ଼ା ଚାଲିଥିଲା । ଏହି ସମୟରେ ଯୁବକର ମାଇଁ(ଅନ୍ୟ ଆହତ ମହିଳା) ସେଠାରେ ପହଞ୍ଚି ଯାଇଥିଲେ । ଯୁବତୀଙ୍କ ମା’ଙ୍କ ମାଡ଼ରେ ଯୁବକର ମାଇଁ ରକ୍ତାକ୍ତ ହୋଇଥିଲେ । ମାଇଁଙ୍କୁ ଆକ୍ରମଣର ପ୍ରତିଶୋଧ ନେବାକୁ ଯୁବକ ଜଣକ ପ୍ରତିଆକ୍ରମଣ କରିଥିଲେ । ପ୍ରେମିକାର ମା’ଙ୍କୁ ଧାରୁଆ ଅସ୍ତ୍ରରେ ଚୋଟ ମାରି ରକ୍ତାକ୍ତ କରିଥିଲେ ଯୁବକ । ଯୁବତୀଙ୍କ ମା’ଙ୍କ ଆଖି ଉପର ମଥାରେ ଗଭୀର କ୍ଷତ ସୃଷ୍ଟି ହୋଇ ପ୍ରବଳ ରକ୍ତସ୍ରାବ ହୋଇଥିଲା । ଦୁଇ ମହିଳା କୁମ୍ଭାରପଡ଼ା ଥାନାରେ ପହଞ୍ଚି ଅଭିଯୋଗ କରିଥିଲେ । ପୁଲିସ ଉଭୟଙ୍କୁ ଡାକ୍ତରଖାନା ପଠାଇଥିଲା ।