ମାହାଙ୍ଗା/କୋଠପଦା : ସ୍ତ୍ରୀର ମାନ୍ୟତା ଦାବି କରିବାରୁ ପ୍ରେମିକ ଘରର ଲୋକମାନେ ପ୍ରେମିକାଙ୍କୁ ପିଟି ପିଟି କେନାଲ ପାଣିରେ ଫୋପାଡ଼ି ଦେବା ଓ ତାଙ୍କୁ ଗ୍ରାମବାସୀ ଉଦ୍ଧାର କରିବା ଥାନାରେ ଅଭିଯୋଗ ହୋଇଛି । ଜଗତସିଂହପୁର ଜିଲ୍ଲା ମାହାଙ୍ଗା ଥାନା ଅନ୍ତର୍ଗତ ଲକ୍ଷ୍ମୀନାରାୟଣପୁର ଗ୍ରାମର ଜନୈକା ଯୁବତୀ ଏହି ଥାନା ଅନ୍ତର୍ଗତ ଇଟାମୁଣ୍ଡୁଳି ଗ୍ରାମର ଅଲେଖ ମଲିକଙ୍କୁ ଭଲ ପାଉଥିଲେ । ଗତକାଲି ରାତିରେ ଯୁବତୀ ସ୍ତ୍ରୀର ମାନ୍ୟତା ଦାବି କରି ପ୍ରେମିକଙ୍କ ଘର ଆଗରେ ଧାରଣାରେ ବସିବାକୁ ଉଦ୍ୟମ କରୁଥିଲା ବେଳେ ପ୍ରେମିକ ଘର ଲୋକେ ତାଙ୍କୁ ନିର୍ଦ୍ଧୁମ ମାଡ଼ ମାରି କେନାଲ ପାଣିରେ ଫିଙ୍ଗି ଦେଇଥିଲେ ।
ଅଲେଖ ଦୁଇ ବର୍ଷରୁ ଅଧିକ ହେବ ଯୁବତୀଙ୍କୁ ପ୍ରେମ କରି ତାଙ୍କ ସହିତ ଶାରୀରିକ ସଂପର୍କ ରଖି ଆସୁଥିଲେ । ବିବାହର ଲୋଭ ଦେଖାଇ ବ୍ୟବସାୟ କରିବା ପାଇଁ ତାଙ୍କଠାରୁ ଲକ୍ଷାଧିକ ଟଙ୍କା ଓ ସୁନା ଚେନ୍ ନେଇଯାଇଥିଲେ । ଗତ ଜାନୁୟାରୀ ୩ ତାରିଖରେ ଯୁବତୀ ଅଲେଖଙ୍କ ଘରକୁ ଆସି ସେଠାରେ ସ୍ୱାମୀ ସ୍ତ୍ରୀ ପରି ପ୍ରାୟ ଦେଢ଼ ମାସ ରହିଥିଲେ । ଅଲେଖଙ୍କ ବଡ଼ ଭାଇର ବିବାହ ହୋଇନଥିବାରୁ ଅସୁବିଧା ହେବ ବୋଲି କହି ଅଲେଖ ଯୁବତୀଙ୍କୁ ନେଇ ତାଙ୍କ ଗାଁ ମୁଣ୍ଡରେ ଛାଡ଼ି ପଳାଇ ଆସିଥିଲେ । ଘଟଣା ପରଠାରୁ ଅଲେଖ ଯୁବତୀଙ୍କ ଗାଁକୁ ଯାଇ ତାଙ୍କ ସହିତ ଶାରିରୀକ ସଂପର୍କ ରଖିଥିଲେ । ବିବାହ କଥା କହିବାରୁ ସେ ଯୁବତୀଙ୍କୁ ଜୀବନରୁ ମାରିଦେବାର ଧମକ ଦେଇଥିବା ଯୁବତୀ ଥାନାରେ ଅଭିଯୋଗ କରିଛନ୍ତି । ଉପାୟ ଶୂନ୍ୟ ହୋଇ ଯୁବତୀ ଗତକାଲି ରାତି ୯ଟାରେ ଅଲେଖଙ୍କ ବାସଭବନରେ ପହଞ୍ଚି ତାଙ୍କୁ ସ୍ତ୍ରୀର ମାନ୍ୟତା ଦେବାକୁ ଜିଦ୍ ଧରିବା ସହ ତାଙ୍କ ଘର ସାମ୍ନାରେ ବସିରହିଥିଲେ । ସେହି ସମୟରେ ଅଲେଖଙ୍କ ବାପା, ମାଆ, ଭଉଣୀ ଓ ଦୁଇ ଭାଈ ମିଶି ତାଙ୍କୁ ମାରଣାସ୍ତ୍ରରେ ଆକ୍ରମଣ କରିଥିଲେ ।
ପରେ ତାକୁ ଘୋଷାଡି ଘୋଷାଡି ନିକଟରେ ଥିବା ୮ ନମ୍ବର କେନାଲ ପାଣିରେ ଅଚେତ ଅବସ୍ଥାରେ ଫୋପାଡ଼ି ଦେଇଥିଲେ । ରାତି ପ୍ରାୟ ୧୦ଟାରେ ଗ୍ରାମବାସୀ ତାଙ୍କୁ ମୁମୂର୍ଷୁ ଅବସ୍ଥାରେ ପାଣିରୁ ଉଦ୍ଧାର କରିଥିଲା ବେଳେ ସେ ରାତିସାରା କେନାଲ ବନ୍ଧରେ ପଡ଼ି ରହିଥିବା ଥାନାରେ ଅଭିଯୋଗରେ ଦର୍ଶାଇଛନ୍ତି । ଘଟଣା ସଂପର୍କରେ କିଛି ଗଣମାଧ୍ୟମ ପ୍ରତିନିଧି ପହଞ୍ଚି ତନାଘନା କରିବା ପରେ ଓ ପୀଡ଼ିତାଙ୍କର ଅଭିଯୋଗ ପାଇଲା ପରେ ପୁଲିସ ପୀଡ଼ିତାଙ୍କୁ ଥାନାକୁ ନେଇ ପଚରାଉଚରା କରୁଛି ।