ପଦ୍ମପୁର,୨୦/୦୫: ଓଡ଼ିଶା ମାନଚିତ୍ରରେ ରାୟଗଡ଼ା ଜିଲ୍ଲାର ପଦ୍ମପୁର ବ୍ଲକ୍ର ଏକ ସ୍ୱତନ୍ତ୍ର ପରିଚୟ ରହିଛି । ଏହା ଏକ ଆଦିବାସୀ ବହୁଳ ଅଞ୍ଚଳ । ଏହାର କୋଣ ଅନୁକୋଣରେ ବାସ କରୁଥିବା ଆଦିବାସୀମାନେ ଧାନ ଫସଲ ସହ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ଜୀବିକା ନିର୍ବାହ କରୁଛନ୍ତି । ମହୁଲ ଏକ ଅର୍ଥକାରୀ ଲଘୁ ବନଜାତ ଦ୍ରବ୍ୟ । ଆଦିବାସୀମାନେ ବର୍ଷର ତିନିମାସ ଏହାକୁ ସଂଗ୍ରହ କରିଥାନ୍ତି । ହେଲେ ରାଜ୍ୟ ସରକାରଙ୍କ କୌଣସି ବିଭାଗ ଏହାକୁ କିଣୁନଥିବାରୁ ଏହାର ଫାଇଦା ନେଉଛନ୍ତି ବାହାର ବ୍ୟବସାୟୀ । ବହୁ କମ୍ ମୂଲ୍ୟାରେ କିଣି ନେଉଛନ୍ତି । ତେଣୁ ଆଦିବାସୀମାନେ ଅଭାବୀ ବିକ୍ରିର ଶିକାର ହେଉଛନ୍ତି । ଏହାର ସରକାରୀସ୍ତରରେ ବଜାର ବ୍ୟବସ୍ଥା ସହ ମୂଲ୍ୟ ଧାର୍ଯ୍ୟ କରାଯାଇ ପ୍ରଚାରପ୍ରସାର କଲେ ମହୁଲ ସଂଗ୍ରହକାରୀ ସଠିକ୍ ମୂଲ୍ୟ ପାଇବେ ବୋଲି ଚାଷୀକୁଳ ଦାବି କରିଛି ।
ପଦ୍ମପୁର ବ୍ଲକ୍ର ଲିକିଟିପଦର, ଗୁଲୁଗୁଡ଼ା, ନୂଆଗଡ଼, ତେମ୍ବାଗୁଡ଼ା, ନାଇରା, ଡେରିଙ୍ଗା, ରେଲା, ଜାତ୍ତିଲି, ସିଙ୍ଗପୁର, ପେରୁପଙ୍ଗୁ, ମରିଚଗୁଡ଼ା, ଖମାପଦର ପଞ୍ଚାୟତର ବିଭିନ୍ନ ଗାଁର ଲୋକ ମହୁଲ ଫୁଲ ସଂଗ୍ରହ କରୁଛନ୍ତି । ତାକୁ ଶୁଖାଇ ବିକ୍ରି ପାଇଁ ପ୍ରସ୍ତୁତ କରିଛନ୍ତି । ସ୍ଥାନୀୟ ବଜାରରେ ମହୁଲ କେଜି ୩୦ରୁ ୩୫ ଟଙ୍କାରେ ବିକ୍ରି ହେଉଛି । ଅଥଚ ବେପାରୀମାନେ ଦଲାଲ ଲଗାଇ ତା’ଠାରୁ ବି କମ୍ ମୂଲ୍ୟରେ କିଣି ନେଉଛନ୍ତି । ମହୁଲ ହାତେଇବା ପାଇଁ ବର୍ତ୍ତମାନ ଦଲାଲମାନେ ଗାଁ ଗୁଡ଼ିକରେ ଆଡ଼ା ଜମାଇଛନ୍ତି । ଏ ବର୍ଷ ଏହି ଅଞ୍ଚଳରେ ମହୁଲ ଉତ୍ପାଦନ ଭଲ ହୋଇଛି ।
ସେ ହିସାବରେ ଟୋଲ ଉତ୍ପାଦନ ହେବ ବୋଲି ଆଦିବାସୀମାନେ ଆଶା ରଖିଛନ୍ତି । ହେଲେ ଟ୍ରାଇବାଲ୍ ଡେଭଲପମେଣ୍ଟ୍ କୋପରେଟିଭ କର୍ପୋରେସନ (ଟିଡିସିସି) ଏହାକୁ ତାଲିକାଭୁକ୍ତ କରିନଥିବାରୁ ଚିନ୍ତାରେ ପଡ଼ିଛନ୍ତି ଆଦିବାସୀ । ଅସାଧୁ ବେପାରୀମାନେ ଗାଁ ଗାଁ ବୁଲି ଲୁଣ ବଦଳରେ ମହୁଲ ସଂଗ୍ରହ କରୁଛନ୍ତି । ଅତି କମ୍ ମୂଲ୍ୟରେ କିଣି ବାହାର ରାଜ୍ୟକୁ ପଠାଇ ମାଲେମାଲ୍ ହେଉଛନ୍ତି । ସରକାରୀସ୍ତରରେ ଏହାର ମୂଲ୍ୟ ନିର୍ଦ୍ଧାରଣ କରି ସିଧାସଳଖ ସଂଗ୍ରହକାରୀଙ୍କଠାରୁ ମହୁଲ କ୍ରୟ କରାଗଲେ ନୀରିହ ଆଦିବାସୀ ଉଚିତ ମୂଲ୍ୟ ପାଇପାରିବ । ପ୍ରକାଶଥାଉକି, ଗତବର୍ଷ ଭଳି ଏଥର ମଧ୍ୟ ଟିଡିସିସି ମହୁଲ ସଂଗ୍ରହକୁ ତାଲିକାଭୁକ୍ତ କରିନି । ଅଥଚ ମହୁଲ ଫଳ(ଟୋଲ) ସଂଗ୍ରହ କରିବାକୁ ଲକ୍ଷ୍ୟ ରଖିଛି । ସର୍ବନିମ୍ନ ସହାୟକ ମୂଲ୍ୟ ୨୯ ଟଙ୍କା ହିସାବରେ ସଂଗ୍ରହ କରିବାକୁ ଧାର୍ଯ୍ୟ କରାଯାଇଛି ।