ଓ୍ବାଶିଂଟନ: ଆମେରିକାର ଜଣେ ବ୍ୟକ୍ତି ମାମୁଲି ଅପରାଧ ପାଇଁ ୨୦ ବର୍ଷର ଜେଲ୍ଦଣ୍ଡ ଭୋଗିବା ପରେ ଏବେ ମୁକ୍ତ ହୋଇଛନ୍ତି । ୨୦୦୦ ମସିହା ଫେବୃଆରୀ ମାସରେ ଗିରଫ ହୋଇଥିବା ‘ଗଏ ଫ୍ରାଙ୍କ୍’ ନାମକ ଏହି ବ୍ୟକ୍ତିଙ୍କୁ ଦୁଇଟି ସାର୍ଟ ଚୋରି ଅଭିଯୋଗରେ ଏହି ଜେଲ୍ଦଣ୍ଡ ଭୋଗିବାକୁ ପଡିଛି । ମାମୁଲି ଅପରାଧ ପାଇଁ ଲମ୍ବା ସମୟ ଧରି ସଜା କାଟୁଥିବା ଲୋକଙ୍କୁ ମୁକ୍ତ କରିବା ପାଇଁ ଲୁଇସିଆନାରେ 'ଇନୋସେନ୍ସ ପ୍ରୋଜେକ୍ଟ ନ୍ୟୁ ଓରଲିନ୍ସ ' ନାମକ ଏକ ଅଭିଯାନ ଚାଲିଛି । ଏହା ଅଧୀନରେ କୋର୍ଟ ଫ୍ରାଙ୍କଙ୍କୁ ମୁକ୍ତ କରିଛନ୍ତି । ଆମେରିକାର ଅଶ୍ବେତଙ୍କ ଉପରେ ହେଉଥିବା ଅତ୍ୟାଚାରକୁ ନେଇ ପୁଣିଥରେ ବିତର୍କ ଆରମ୍ଭ ହୋଇଛି ।
ଡେଲି ମେଲ୍ର ଖବର ମୁତାବକ ୬୭ ବର୍ଷିୟ ଫ୍ରାଙ୍କ ଜଣେ ଅଭ୍ୟାସଗତ ଚୋର । ସିକ୍ସ ଫିଫ୍ତ ଆଭେନ୍ୟୁ (Saks Fifth Avenue)ରେ ସାର୍ଟ ଚୋରି କରିବା ପୂର୍ବରୁ ଫ୍ରାଙ୍କଙ୍କୁ ୩୬ ଥର ଗିରଫ କରାଯାଇଥିଲା । ତାଙ୍ର ଉପରେ ଚୋରି ଏବଂ କୋକିନ୍ ରଖିବା ଭଳି ମାମଲା ରହିଥିଲା । ୧୯୯୦ରେ ତାଙ୍କୁ ୩ ବର୍ଷର ସଜା ଶୁଣାଯାଇଥିଲା । ୨୦୦୦ ମସିହାରେ ଯେତେବେଳେ ପୋଲିସ ତାଙ୍କୁ ଗିରଫ କରିଥିଲା, ସେତେବେଳେ ତାଙ୍କ ଉପରେ ୫୦୦ ଡଲାରର ଜିନିଷ ଚୋରି କରିଥିବା ମାମଲା ଲଗାଯାଇଥିଲା । ଅଦାଲତ ଏହି ମାମଲାରେ ତାଙ୍କୁ ଦୋଷୀ ସାବ୍ୟସ୍ତ କରି ଜେଲ୍ ପଠାଇ ଦେଇଥିଲେ । ଯେଉଁଠାରେ ସେ ୨୦ ବର୍ଷ ଜେଲ ଦଣ୍ଡ କାଟିବା ପରେ ଏବେ ମୁକ୍ତ ହୋଇଛନ୍ତି ।
ରିପୋର୍ଟ ଅନୁଯାୟୀ, ଲୁଧିଆନାରେ ୫୦୦ ଡଲାରରୁ କମ୍ ରାଶିର ଚୋରି ଏକ ପ୍ରମୁଖ ଅପରାଧ ଭାବରେ ବିବେଚନା କରାଯାଉଥିଲା ଏବଂ ଦୋଷୀ ସାବ୍ୟସ୍ତ ବ୍ୟକ୍ତିଙ୍କ ପାଇଁ ଆଇନ ସର୍ବାଧିକ ୨୩ ବର୍ଷ ଦଣ୍ଡବିଧାନ କରୁଥିଲା । ତେଣୁ କୋର୍ଟ ତାଙ୍କୁ ସର୍ବାଧିକ ଦଣ୍ଡିତ କରିଛନ୍ତି । ତେବେ 'ଦି ଇନୋସେନ୍ସ ପ୍ରୋଜେକ୍ଟ'ର ଉଦ୍ୟମ ହେତୁ ତାଙ୍କୁ କିଛି ସମୟ ପୂର୍ବରୁ ମୁକ୍ତ କରାଯାଇଥିଲା ।
