ନୂଆଦିଲ୍ଲୀ: ଦିଲ୍ଲୀ ଅବକାରୀ ନୀତି ସହ ଜଡିତ ମନି ଲଣ୍ଡରିଂ ମାମଲାରେ ପୂର୍ବତନ ଉପ-ମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ନ୍ୟାୟିକ ହେପାଜତ ଏପ୍ରିଲ ୨୬ ପର୍ଯ୍ୟନ୍ତ ବୃଦ୍ଧି କରାଯାଇଛି । ମାମଲାର ପରବର୍ତ୍ତୀ ଶୁଣାଣି ଏପ୍ରିଲ ୨୬ ସକାଳ ୧୧ଟା ସମୟରେ ରାଉସ୍ ଆଭେନ୍ୟୁ କୋର୍ଟରେ ହେବ । ସେହି ଦଲିଲ ଗୁଡ଼ିକର ତାଲିକା ଦେବାକୁ କୋର୍ଟ ଅଭିଯୁକ୍ତଙ୍କୁ ନିର୍ଦ୍ଦେଶ ଦେଇଛନ୍ତି, ଯାହାର ଯାଞ୍ଚ ଏପର୍ଯ୍ୟନ୍ତ ଶେଷ ହୋଇନାହିଁ । ଏହାପୂର୍ବରୁ କୋର୍ଟ ବରିଷ୍ଠ ଆମ୍ ଆଦମୀ ପାର୍ଟି ନେତା ସିସୋଦିଆଙ୍କ ନ୍ୟାୟିକ ହେପାଜତକୁ ଏପ୍ରିଲ ୧୮ ପର୍ଯ୍ୟନ୍ତ ବୃଦ୍ଧି କରିଥିଲେ।

ସିସୋଦିଆଙ୍କ ଏହି ନ୍ୟାୟିକ ହେପାଜତ ଅବକାରୀ ନୀତି ସହ ଜଡିତ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମାମଲାରେ ବୃଦ୍ଧି କରାଯାଇଛି । ମନୀଷ ସିସୋଦିଆଙ୍କୁ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ ଅର୍ଥାତ ସିବିଆଇ (CBI) ଦୁର୍ନୀତି ଅଭିଯୋଗରେ ଫେବୃଆରୀ ୨୬, ୨୦୨୩ରେ ଗିରଫ କରିଥିଲା । ସିବିଆଇ ଏଫଆଇଆର ସହ ଜଡିତ ଅର୍ଥ ହେରଫେର ମାମଲାରେ ଇଡି ସିସୋଡିଆଙ୍କୁ ୯ ମାର୍ଚ୍ଚ ୨୦୨୩ ରେ ଗିରଫ କରିଥିଲା।

ଦିଲ୍ଲୀର ପୂର୍ବତନ ଉପ ମୁଖ୍ୟମନ୍ତ୍ରୀଙ୍କ ଉପରେ ସିବିଆଇ ସହିତ ଇଡି ମଧ୍ୟ ଅଭିଯୋଗ ଲଗାଇଛି ଯେ, ଦିଲ୍ଲୀ ଅବକାରୀ ନୀତିରେ ସଂଶୋଧନ କରି ଅନୀୟମିତତା କରାଯାଇଛି । ଲାଇସେନ୍ସଧାରୀଙ୍କୁ ଅଯଥା ସୁବିଧା ପ୍ରଦାନ କରାଯାଇଛି । ଲାଇସେନ୍ସ ଶୁଳ୍କ ଛାଡ କିମ୍ବା କମ୍ କରାଯାଇଛି  । 

ଏହା ପୂର୍ବରୁ ମନୀଷ ସିସୋଦିଆଙ୍କ ଜାମିନ ଆବେଦନ ଉପରେ ୧୫ ଏପ୍ରିଲରେ ଶୁଣାଣି ହୋଇଥିଲା। ଏହି ସମୟରେ ଇଡି କୋର୍ଟରେ ହୋଇଥିବା ଆବେଦନକୁ ବିରୋଧ କରି କହିଛନ୍ତି ଯେ, ଗୁରୁତର ମାମଲାରେ ଶୁଣାଣି ବିଳମ୍ବ ଅଭିଯୁକ୍ତଙ୍କ ଜାମିନ ପାଇଁ ଆଧାର ହୋଇପାରିବ ନାହିଁ ।