ପାଟଣା ୧୩/୯: ପ୍ରେମ ମାନେନାହିଁ ଜାତି ଧର୍ମ ଓ ବୟସ । ସେଥିପାଇଁ ସମସ୍ତେ କୁହନ୍ତି ପ୍ରେମ ଅନ୍ଧ । ତେବେ ଏହି ପ୍ରେମରେ ଅନ୍ଧ ହୋଇ ଜଣେ ମା ନିଜ ୪ ବର୍ଷର ଶିଶୁପୁତ୍ରକୁ ଛାଡି ପ୍ରେମିକର ହାତ ଧରିଛନ୍ତି । ଏମିତି ଘଟଣା ଘଟିଛି ପାଟଣା ଥାନା ମଲ୍ଲୀପଶି ଗ୍ରାମରେ । ଏ ଘଟଣା ଏବେ ସାରା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ସୂଚନା ଅନୁଯାୟୀ ମଲ୍ଲୀପଶି ଗ୍ରାମର ସୁଦାମ ନାଏକ ୨୦୧୫ ମସିହାରେ ଚକ ନିକଟସ୍ଥ ରଙ୍ଗାମାଟିଆ ଗ୍ରାମର ନୂଆ ସାହିର ସୁଭଦ୍ରା ଦାସଙ୍କୁ ବୈଦିକ ରୀତିନୀତିରେ ବିବାହ କରିଥିଲେ ଆଉ ଉଭୟଙ୍କର ୪ ବର୍ଷର ପୁଅ ମଧ୍ୟ ଅଛି।
ଗତ ୫ ତାରିଖ ଶନିବାର ସୁଦାମଙ୍କ ସ୍ତ୍ରୀ ସୁଭଦ୍ରା ଘରୁ କୁଆଡେ ପଳାଇଯାଇଥିଲେ । ଏନେଇ ସୁଦାମ ପାଟଣା ଥାନାରେ ସ୍ତ୍ରୀ ନିଖୋଜ ହୋଇଥିବା ଅଭିଯୋଗ କରିଥିଲେ। କିନ୍ତୁ ଗତକାଲି ନିଖୋଜ ପତ୍ନୀ ନିଜ ପ୍ରେମିକ ସହିତ ପାଟଣା ଥାନାରେ ପହଞ୍ଚି ତାକୁ ଭଲ ପାଉଛନ୍ତି ଏବଂ ସାରା ଜୀବନ ତା ସହିତ ରହିବେ ବୋଲି ରୋକଠୋକ ଶୁଣାଇ ଦେଇଥିଲେ । ଏଥିରେ ନିଖୋଜ ପତ୍ନୀଙ୍କ ସ୍ୱାମୀ ସୁଦାମ ନିରୁପାୟ ହୋଇପଡ଼ିଥିଲେ । ପୋଲିସ ଉଭୟ ପକ୍ଷ କଥା ଶୁଣି ପ୍ରେମିକ ସହ ବିବାହିତ ମହିଳାଙ୍କୁ ପଠାଇଥିବା ଜଣାପଡିଛି । ଶେଷରେ ପ୍ରେମ ଆଗରେ ହାର ମାନିଗଲା ମମତା ।