ଦର୍ଶକଙ୍କ ଧ୍ୟାନ ଆକର୍ଷଣ କରିବା ନିମନ୍ତେ ହଜାର ହଜାର କଣ୍ଟେଣ୍ଟ କ୍ରିଏଟର (ବିଷୟବସ୍ତୁ ସୃଷ୍ଟିକର୍ତ୍ତା) ପ୍ରତିଦିନ କିଛି ନା କିଛି ନୂଆ କଥା ଉପସ୍ଥାପନ କରୁଛନ୍ତି । ପଶୁପକ୍ଷୀଙ୍କ ଭିଡିଓ ତନ୍ମଧ୍ୟରେ ଅନ୍ୟତମ । ବିଶ୍ୱର ପ୍ରତ୍ୟେକ କୋଣର ସୋସିଆଲ ମିଡିଆ ୟୁଜର ପଶୁପକ୍ଷୀଙ୍କ ଭିଡିଓ ଦେଖି ବେଶ ଉପଭୋଗ କରୁଛନ୍ତି । ଇଣ୍ଟର୍ନେଟରେ ସର୍ବାଧିକ ଦେଖାଯାଉଥିବା ବିଷୟ ମଧ୍ୟରେ ଏହା ଅନ୍ୟତମ । ପଶୁପକ୍ଷୀଙ୍କର ସୁନ୍ଦର ସୁନ୍ଦର ଭିଡିଓ ଯେତେ ଦେଖିଲେ ବି ଆହୁରି ଅଧିକ ଓ ନୂଆ ଭିଡିଓ ଦେଖିବାକୁ ଇଚ୍ଛା ହୁଏ । ତେବେ ପ୍ରଶ୍ନ ହେଉଛି, ଏହା ଏକ ସୁସ୍ଥ ଅଭ୍ୟାସ କି? ହଁ, ଏକ ସଦ୍ୟ ଅଧ୍ୟୟନ ଏହା ସ୍ପଷ୍ଟ କରିଛି । ଅଧ୍ୟୟନର ତଥ୍ୟ ଅନୁସାରେ, ପଶୁପକ୍ଷୀଙ୍କ ଭାବଭଙ୍ଗୀ, କାର୍ଯ୍ୟକଳାପ ଆଦିର ସୁନ୍ଦର ସୁନ୍ଦର ଭିଡିଓ ଦେଖିବା ଦ୍ୱାରା ଆପଣଙ୍କ ମାନସିକ ଚାପ ସ୍ତର ୫୦ ପ୍ରତିଶତ ହ୍ରାସ ପାଇପାରେ । ୟୁନିଭର୍ସିଟି ଅଫ୍ ଲିଡ୍ସ ଓ ଟୁରିଜମ୍ ୱେଷ୍ଟର୍ନ ଅଷ୍ଟ୍ରେଲିଆ ଦ୍ୱାରା ଏହି ଅଧ୍ୟୟନ କରାଯାଇଛି ।
ଅଧ୍ୟୟନରେ ସାମିଲ ୧୯ ପ୍ରତିଯୋଗୀଙ୍କୁ ୧୫ ମିନିଟ୍ ପାଇଁ ପଶ୍ଚିମ ଅଷ୍ଟ୍ରେଲିଆରେ ଦେଖାଯାଉଥିବା ଛୋଟ ଲାଞ୍ଜଯୁକ୍ତ ଗଛ ଚଢ଼ିପାରୁଥିବା ବିଲେଇ ଭଳି ‘କୋକା’ ନାମକ ପଶୁଙ୍କ ଭିଡିଓ ଦେଖିବାକୁ ଦିଆଯାଇଥିଲା । ବିଶ୍ୱର ସବୁଠୁ ସୁଖୀ ପଶୁ ଭାବେ ଏହା ପରିଚିତ । କୋକାଙ୍କର କିଛି ଭିଡିଓ ଦେଖିବା ପରେ କିଛି ପ୍ରତିଯୋଗୀଙ୍କ ମାନସିକ ଚାପ ସ୍ତର ୫୦ ପ୍ରତିଶତ ପର୍ଯ୍ୟନ୍ତ ହ୍ରାସ ପାଇଥିଲା । ଏପରିକି ଉଚ୍ଚ ରକ୍ତଚାପ ମଧ୍ୟ ହ୍ରାସ ପାଇ ସୁସ୍ଥ ବ୍ୟକ୍ତିର ରକ୍ତଚାପ ସହ ସମାନ ହୋଇଥିଲା । କୋକାଙ୍କ ଭିଡିଓ ଦେଖିବାର ମାନସିକ ପ୍ରଭାବ ବିଷୟରେ ଜାଣିବା ପାଇଁ ଅଧ୍ୟୟନ ସମୟରେ ପ୍ରତିଯୋଗୀଙ୍କ ହୃତ୍ସ୍ପନ୍ଦନ ହାର ଓ ରକ୍ତଚାପ ଯାଞ୍ଚ କରାଯାଇଥିଲା । ଭିଡିଓ ଶେଷ ହେବା ପରେ ସମସ୍ତ ପ୍ରତିଯୋଗୀଙ୍କ ରକ୍ତଚାପ ମପାଗଲା । ଅଧାରୁ ଅଧିକ ପ୍ରତିଯୋଗୀଙ୍କ ରକ୍ତଚାପ ୧୩୬/୮୮ରୁ ୧୧୫/୭୧କୁ ହ୍ରାସ ପାଇଥିବା ଜଣାପଡ଼ିଲା ।
ଜଣେ ପ୍ରତିଯୋଗୀଙ୍କ ହୃତ୍ସ୍ପନ୍ଦନ ହାର ୯୦ବିପିଏମ୍ରୁ ୬୮ ବିପିଏମ୍କୁ ହ୍ରାସ ପାଇଥିଲା । ସେତିକି ନୁହେଁ, ଭିଡିଓ ଦେଖିବା ପରେ ପ୍ରତିଯୋଗୀଙ୍କ ଉଦ୍ବେଗ ସ୍ତର ହାରାହାରି ୩୫ ପ୍ରତିଶତ ହ୍ରାସ ପାଇଥିଲା । କିଛି ପ୍ରତିଯୋଗୀଙ୍କ ଉଦ୍ବେଗ ସ୍ତର ୫୦ ପ୍ରତିଶତ ହ୍ରାସ ପାଇଥିବା ଦେଖାଗଲା । ଅଧ୍ୟୟନରେ ସାମିଲ ଡ. ଆଣ୍ଡ୍ରିଆ ଅଟ୍ଲି କହିଛନ୍ତି, ଛାତ୍ର ପ୍ରତିଯୋଗୀମାନେ ସେମାନଙ୍କ ପରୀକ୍ଷାକୁ ନେଇ ବ୍ୟାକୁଳ ଥିଲେ । କିଛି ପ୍ରତିଯୋଗୀଙ୍କ ହୃତ୍ସ୍ପନ୍ଦନ ହାର ଓ ରକ୍ତଚାପ ମଧ୍ୟ ଉଚ୍ଚତର ଥିଲା । ସେମାନଙ୍କ ମାନସିକ ଚାପ ସ୍ତର ଉଚ୍ଚତର ଥିବା ସଙ୍କେତ ଦେଇଥିଲା । ତେବେ ଏହି ଅଧ୍ୟୟନ ଅବଧିରେ ସମସ୍ତଙ୍କ ହୃତ୍ସ୍ପନ୍ଦନ ହାର ଓ ରକ୍ତଚାପ ହ୍ରାସ ପାଇ ସୁସ୍ଥ ବ୍ୟକ୍ତିଙ୍କ ଭଳି ହୋଇଥିଲା । ଚାପ ଓ ଉଦ୍ବେଗ ସ୍ତର ମଧ୍ୟ ଖୁବ୍ କମିଥିଲା ବୋଲି ଆଣ୍ଡ୍ରିଆ କହିଛନ୍ତି ।