ମୋବାଇଲ୍‌ ଟାୱାର୍‌ ଯାଞ୍ଚ୍‌ କରିବ ପୋଲିସ; ଜନବସତି, ହସ୍ପିଟାଲ୍‌ ଓ ସ୍କୁଲ୍‌ ପାଇଁ ବିପଦ

କଟକ,୨୩/୦୭(ବ୍ୟୁରୋ): କଟକ ସହରରେ ଏବେ ମାଳମାଳ ମୋବାଇଲ୍‌ ଟାୱାର । ସେଥିରୁ ଅନେକ ବିପଜ୍ଜନକ ଓ ବେଆଇନ ଭାବେ ଗଢ଼ି ଉଠିଛି । ଆବଶ୍ୟକୀୟ ଅନୁମତି ନଥାଇ ଛାତ ଉପରେ ତିଆରି ହୋଇଛି ଏହି ସବୁ ଟାୱାର । କିଛି ଟାୱାର ଜନବସତି ପାଇଁ ବିପଦ ସୃଷ୍ଟି କରୁଥିବା ବେଳେ ଆଉ କିଛି ଜିରୋ ଟଲୋରାନ୍ସ ଜୋନ୍‌ରେ ଅଛି । ଏବେ ଏସବୁ ଟାୱାର ଉପରେ ଅଙ୍କୁଶ ଲାଗିବ । ଉପଯୁକ୍ତ କାଗଜପତ୍ର ନଥିଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏଭଳି ଟାୱାରଗୁଡ଼ିକର ଖୁବ୍‌ଶୀଘ୍ର ତାଲିକା ପ୍ରସ୍ତୁତ ହେବାକୁ ଯାଉଛି ।
ଦେଶରେ ପ୍ରମୁଖ ଟେଲିକମ୍‌ ସେବା ପ୍ରଦାନକାରୀ କମ୍ପାନୀଗୁଡ଼ିକ ମୋବାଇଲ୍‌ ସେବା ଯୋଗାଇବା ପାଇଁ କଟକ ସହରରେ ଶହଶହ ମୋବାଇଲ୍‌ ଟାୱାର ନିର୍ମାଣ କରିଛନ୍ତି । କଟକ ସହରରେ ଖାଲି ସ୍ଥାନର ଅଭାବ ରହିଥିବାରୁ ପ୍ରାୟ ୯୫ ପ୍ରତିଶତ ଟାୱାର ଛାତ ଉପରେ ନିର୍ମାଣ ହୋଇଛି । ଦୁଇ ମହଲାଠାରୁ ଆରମ୍ଭ କରି ଚାରି ମହଲା ପର୍ଯ୍ୟନ୍ତ କୋଠାରେ ଏଭଳି ଟାୱାର ଲାଗିଛି । କିଛି ବଡ଼ବଡ଼ କୋଠାରେ ମଧ୍ୟ ନିର୍ମାଣ ହୋଇଛି । ଗୁରୁତ୍ୱପୂର୍ଣ୍ଣ ବିଷୟ ହେଉଛି, କଟକ ସହରରେ ବହୁ ପୁରୁଣାକାଳିଆ କୋଠାରେ ମଧ୍ୟ ମୋବାଇଲ୍‌ ଟାୱାର୍‌ଗୁଡ଼ିକ ଏବେ କାମ କରୁଛି । ଏପରିକି ଯେଉଁ ପୁରୁଣା କୋଠାଗୁଡ଼ିକ ନିଜ ଓଜନର ଭାର ସମ୍ଭାଳିବାରେ ସମର୍ଥ ନୁହେଁ ସେଭଳି କୋଠାରେ ମଧ୍ୟ ମୋବାଇଲ୍‌ ଟାୱାର ନିର୍ମାଣ ହୋଇଛି ।

ଏହି ସବୁ ଟାୱାର ଯନ୍ତ୍ରାଂଶର ଓଜନ ଦୁଇ ଟନ୍‌ରୁ ଆରମ୍ଭ କରି ୫ ଟନ୍‌ ପର୍ଯ୍ୟନ୍ତ ରହୁଛି । ତେଣୁ କୋଠା ଉପରେ ମୋବାଇଲ୍‌ ଟାୱାର ନିର୍ମାଣ କରିବା ପୂର୍ବରୁ କୋଠାର ସ୍ଥାୟୀତ୍ୱ ନେଇ ଇଂଜିନିୟରିଂ ବିଭାଗଠାରୁ ଅନୁମତି ଆଣିବା ନିତ୍ୟାନ୍ତ ଆବଶ୍ୟକ । ହେଲେ ବହୁ ଟାୱାର ନିର୍ମାଣ କ୍ଷେତ୍ରରେ ଏଭଳି କରାଯାଉନି । ଫଳରେ ଜନବସତି ଅଞ୍ଚଳରେ ଏହା ବିପଦ ସୃଷ୍ଟି କରିଛି । କୌଣସି ଏକ ପ୍ରାକୃତିକ ବିପର୍ଯ୍ୟୟ ହେଲେ ଟାୱାର ନିର୍ମାଣ ହୋଇଥିବା ଘର ଭାଙ୍ଗିବା ସହିତ ଉକ୍ତ ଟାୱାରର ଯନ୍ତ୍ରାଂଶ ପଡ଼ୋଶୀ ଘର ପ୍ରତି ବିପଦପୂର୍ଣ୍ଣ । ଗତ ଫୋନି ବାତ୍ୟା ସମୟରେ ଅନ୍ୟ ସହରରେ ଏଭଳି ଘଟଣା ସାମ୍ନାକୁ ଆସି ସାରିଛି । ଅନ୍ୟ ଏକ ଗୁରୁତ୍ୱପୂର୍ଣ୍ଣ ବିଷୟ ହେଉଛି କଟକ ସହରଟି ଭୂମିକମ୍ପ ଜୋନ୍‌ରେ ଆସୁଥିବାରୁ ମୋବାଇଲ୍‌ ଟାୱାର ଏବେ ସହରପ୍ରତି ବଡ଼ ବିପତ୍ତି ଆଣିବାର ଆଶଙ୍କା ଦେଇଛି ।

ସେହିପରି ହସ୍ପିଟାଲ୍‌ ଓ ସ୍କୁଲ୍‌ର ୨ଶହ ମିଟର ଦୂରତା ମଧ୍ୟରେ କୌଣସି ମୋବାଇଲ୍‌ ଟାୱାର ନିର୍ମାଣ ହୋଇପାରିବ ନାହିଁ । ଟାୱାର ରେଡିଏସନ୍‌ ରୋଗୀ ଓ ଛୋଟ ପିଲାଙ୍କ ପାଇଁ କ୍ଷତିକାରକ ହୋଇଥିବାରୁ ସ୍କୁଲ ଓ ହସ୍ପିଟାଲ୍‌ ପାଖରେ ଏହାକୁ ନିର୍ମାଣ କରିବା ନେଇ ପୂର୍ବରୁ ଅଙ୍କୁଶ ରହିଛି । ଏପରିକି କେନ୍ଦ୍ରାଞ୍ଚଳ ଆର୍‌ଡିସି ଏନେଇ ସର୍କୁଲାର ଜାରି କରିଛନ୍ତି । ପ୍ରଥମ ଥର ପାଇଁ ଏଭଳି ମୋବାଇଲ୍‌ ଟାୱାର ଯାଞ୍ଚ କରିବା ଓ ବେଆଇନ ଟାୱାର ବନ୍ଦ କରିବା ନେଇ ପୁଲିସ ଓ ପ୍ରଶାସନ ଅଣ୍ଟା ଭିଡ଼ିଛନ୍ତି । କଟକ ସହରରେ କେତେ ମୋବାଇଲ୍‌ ଟାୱାର ରହିଛି ତାହାର ତଥ୍ୟ ସଂଗ୍ରହ ପାଇଁ ପୁଲିସ ପକ୍ଷରୁ ଥାନା ଗୁଡ଼ିକୁ ନିର୍ଦ୍ଦେଶ ଦିଆଯାଇଛି । ଏହି ତଥ୍ୟ ଆସିବା ପରେ ଟାୱାର ନିର୍ମାଣ ହୋଇଥିବା କୋଠା ମାଲିକମାନଙ୍କୁ କାଗଜପତ୍ର ମଗାଯିବ । ଯାହାର ତ୍ରୁଟି ବାହାରିବ ସେଗୁଡ଼ିକ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୁଲିସ ସୂତ୍ରରୁ ପ୍ରକାଶ ।

   ସମ୍ବନ୍ଧିତ ଖବର


ଶିକ୍ଷକଙ୍କ ମାଡରେ ଦୁଇ ଛାତ୍ରୀ ଗୁରୁତର :ଡାକ୍ତରଖାନରେ ଭର୍ତ୍ତି, ଶିକ୍ଷକଙ୍କ ନାଁରେ ଅଭିଯୋଗ

ବୃଦ୍ଧାଙ୍କୁ ଶୁଣ୍ଢରେ ଟେକି କଚାଡି ମାରିଲା ଦନ୍ତା

ଟୋକନକୁ ଚାଷୀଙ୍କ ବିରୋଧ: ଧାନ ରଖି ଜିଲ୍ଲାପାଳଙ୍କ କାର୍ଯ୍ୟାଳୟ କଲେ ସିଲ୍‌

ଗୋଡଭଙ୍ଗା ଘାଟିଠାରେ ଓଲଟି ପିକ୍‌ଅପ୍ ଭ୍ୟାନ୍: ଡ୍ରାଇଭର ଆହତ, ହେଲ୍‌ପର ଗୁରୁତର