ନୂଆଦିଲ୍ଲୀ ୨୫/୦୪: କେତେକ କ୍ଷେତ୍ରରେ ଆସକ୍ତି ସକାରାତ୍ମକ ହୋଇଥିବା ବେଳେ ଅନ୍ୟ କେତେକ ସ୍ଥାନରେ ଏହା ନକାରାତ୍ମକ ପ୍ରଭାବ ଦେଖାଯାଇଥାଏ । ବାସ୍ତବରେ ମାତ୍ରାଧିକ ଆସକ୍ତି ଯୋଗୁ ଲାଭ ଅପେକ୍ଷା କ୍ଷତି ଅଧିକ ହୋଇଥାଏ । ମାତ୍ରାଧିକ ଆସକ୍ତିରେ ବୁଡି ରହୁଥିବା ଲୋକ ଭିନ୍ନ ଏକ ଦୁନିଆରେ ଜୀବନ ବଞ୍ଚିଥାଏ, ଯାହା ଉଭୟ ଜୀବନ ଓ ସମ୍ପର୍କକୁ ପ୍ରଭାବିତ କରିଥାଏ । ଆସକ୍ତି  ବିଷୟରେ ବେଳହୁଁ ବୁଝିଯିବା ଭଲ । 

ଅବସେସନ୍‌ ବା ମାତ୍ରାଧିକ ଆସକ୍ତି ଏକ ଭିନ୍ନ ପ୍ରକାରର ଭାବନା । ପ୍ରଥମେ ପ୍ରଥମେ ଏହା ବ୍ୟକ୍ତିକୁ ଖୁସି ଦେଇଥାଏ । କିନ୍ତୁ ପରବର୍ତ୍ତୀ ସମୟରେ ଏହା ଜୀବନକୁ ଛନ୍ଦି ପକାଏ । ଆସକ୍ତି କିଛି ବି ଜିନିଷକୁ ନେଇ ହୋଇପାରେ । ତେଣିକି ତାହା ପୋଷାକକୁ ନେଇ ହେଉ ଅବା ସମ୍ପର୍କକୁ ନେଇ କେବେ କେବେ ନିଜକୁ ନେଇ ମଧ୍ୟ ଆସକ୍ତି ସୃଷ୍ଟ  ହୋଇଥାଏ । ଆପଣ ସେଲ୍ଫ ଅବସେସନ୍‌ ଶବ୍ଦ ଶୁଣିଥିବେ ନିଶ୍ଚୟ । ଏହା ହେଉଛି ସେହିମାନଙ୍କ ପାଇଁ ଯେଉଁମାନେ ନିଜକୁ ସ୍ୱତନ୍ତ୍ର ଭାବିବା ସହ  ଅନ୍ୟମାନଙ୍କଠାରୁ ସେଭଳି ଆଶା ରଖିଥାନ୍ତି । ଏଭଳି  ଭାବନା ଖୁବ୍‌ କ୍ଷତିକାରକ ହୋଇଥାଏ । ତେଣୁ ଏହାକୁ  ଭଲ ଭାବେ ବୁଝିବା ସହ ଆସକ୍ତିରୁ ବାହାରକୁ ଆସିବା  ଜରୁରି । ନଚେତ୍‌ ଅବସାଦର ଶିକାର ହୋଇପାରନ୍ତି ।  ଚାଲନ୍ତୁ ଜାଣିବା କେମିତି ନିଜକୁ ବାହାର କରିପାରିବେ  ଆସକ୍ତି ଦୁନିଆରୁ ।

କିଛି ନୂଆ କରନ୍ତୁ ଏଭଳି ଭାବନାରୁ ବାହାରକୁ ଆସିବା ପାଇଁ କିଛି ନୂଆ କରିବାକୁ  ପ୍ରୟାସ କରନ୍ତୁ । ନିଜକୁ ସବୁବେଳେ କିଛି କାମରେ  ବ୍ୟସ୍ତ ରଖନ୍ତୁ, ଯାହା ଆପଣଙ୍କୁ ଖୁସିଦେବା ସହ ଶାନ୍ତି  ଦେଇପାରିବ । ନିଜକୁ ବ୍ୟସ୍ତ ରଖିବା ଦ୍ୱାରା ହିଁ ଆସକ୍ତିଠାରୁ  ଦୂରତା ବଢାଯାଇପାରିବ । ନିଜ ପସନ୍ଦର ଜିନିଷକୁ ଗୁରୁତ୍ୱ  ଦେବା ଶିଖନ୍ତୁ । ମନ ହାଲ୍‌କା ଲାଗିବ । 

ଆସକ୍ତି ଥିବା ଜିନିଷଠାରୁ ଦୂରତା ବଢାନ୍ତୁ ମାତ୍ରାଧିକ ଆସକ୍ତି ଥିବା ଜିନିଷକୁ ବୁଝିବା ପରେ ନିଜକୁ  ସେଠାରୁ ଦୂରେଇ ରଖିବା ପାଇଁ ବାଟ ପ୍ରସ୍ତୁତ କରନ୍ତୁ ।  ଯଦି କୌଣସି ବ୍ୟକ୍ତିକୁ ନେଇ ମନରେ ଆସକ୍ତି ଭାବ  ରହିଥାଏ, ତେବେ ସେହି ବ୍ୟକ୍ତିଠାରୁ ଦୂରତା ବଢାନ୍ତୁ ।  ସମୟ ଲାଗିପାରେ କିନ୍ତୁ ଧୀରେ ଧୀରେ ସେ ଅନୁଭବ  ଦୂରେଇଯିବ । ଏହି ଫଣ୍ଡାକୁ ଆପଣ ଖାଇବା ଓ ସପିଂ  ଆସକ୍ତିରେ ମଧ୍ୟ ବ୍ୟବହାର କରିପାରିବେ । 

ଆସକ୍ତି ବଢ଼ିବାକୁ ଦିଅନ୍ତୁନି: ଯଦି କୌଣସି ଜିନିଷକୁ ନେଇ ମାତ୍ରାଧିକ ଆସକ୍ତି  ରହିଥାଏ, ତେବେ ଏହାକୁ ବଢିବାକୁ ନ ଦେବା ଆପଣଙ୍କ ଦାୟିତ୍ୱ । ଏଭଳି ଭାବନାକୁ ନିୟନ୍ତ୍ରଣରେ ରଖିବା ସହ  ଶାନ୍ତିରେ ବସି ଏହାର ନକାରାତ୍ମକ ଦିଗକୁ ବୁଝିବାକୁ  ପ୍ରୟାସ କରନ୍ତୁ । ଧୀରେ ଧୀରେ ଏହି ଆସକ୍ତିରୁ ବାହାରକୁ  ଆସିବାକୁ ପ୍ରୟାସ କରନ୍ତୁ । ନଚେତ୍‌ ଅବସାଦଗ୍ରସ୍ତ ହେବାକୁ  ଅଧିକ ସମୟ ଲାଗିବ ନାହିଁ । ଯଦି କୌଣସି ବ୍ୟକ୍ତିକୁ  ନେଇ ଅବସେସନ୍‌ ରହିଥାଏ, ତେବେ ଏହା କେବଳ  ଆପଣଙ୍କ ସମୟ ନଷ୍ଟର କାରଣ ହୋଇପାରେ । ହୁଏତ  ଏହା ଭବିଷ୍ୟତରେ ଅବସାଦର କାରଣ ସାଜିପାରେ ।