ମୁମ୍ବାଇ: ଆଇପିଏଲ୍ ୨୦୨୪ର ୬୭ ତମ ମ୍ୟାଚ୍ରେ ମୁମ୍ବାଇ ବନାମ ଲକ୍ଷ୍ନୌ ଫାଇଟ୍ । ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଲକ୍ଷ୍ନୌ ସୁପର ଜ୍ୟାଣ୍ଟସ୍ ନିର୍ଦ୍ଧାରିତ ଓଭରରେ ୬ ଓ୍ବିକେଟ ହରାଇ ୨୧୪ ରନ୍ କରିଛି । ଆଜି ନିକୋଲାସ ପୂରନ ବିସ୍ଫୋରକ ୭୫ ରନ୍ କରି ଆଉଟ ହୋଇଛନ୍ତି । ସେହିଭଳି ଅଧିନାୟକ କେଏଲ ରାହୁଲ ଅର୍ଦ୍ଧଶତକୀୟ ପାଳି ଖେଳିଛନ୍ତି । ସେ ୪୧ ବଲ୍ରେ ୩ ଛକା ଏବଂ ୩ ଚୌକା ସହ ୫୫ ରନ୍ କରିଛନ୍ତି । ଏହା ସହ ମାର୍କସ ଷ୍ଟୋଇନିସ୍ ୨୮, ଦୀପକ ହୁଡା ୧୧, ଆୟୁଷ ବାଦୋନି ୨୨ରନ୍ ଏବଂ କୃଣାଲ ପାଣ୍ଡ୍ୟା୧୨ ରନ୍ କରିଛନ୍ତି ।
ସେପଟେ ମୁମ୍ବାଇ ଟିମ୍ର ନୂଆନ ତୁଷାରା ଏବଂ ପିୟୁଷ ଚାଓ୍ବଲା ଚକତ୍କାର ବୋଲିଂ କରିଛନ୍ତି । ତୁଷାରା ଏବଂ ଚାଓ୍ବଲା ୩ଟି ଲେଖାଏଁ ଓ୍ବିକେଟ ଅକ୍ତିଆର କରିଛନ୍ତି । ଏହା ବ୍ୟତୀତ ଅନ୍ୟମାନେ ଓ୍ବିକେଟ ନେବାରେ ବିଫଳ ହୋଇଛନ୍ତି । ଚଳିତ ସିଜନ୍ରେ ପ୍ରଥମ ଥର ପାଇଁ ଅର୍ଜୁନ୍ ତେନ୍ଦୁଲକର ବୋଲିଂ କରିଛନ୍ତି । ସେ ୨.୨ ଓଭର ବୋଲିଂ କରି ୨୨ ରନ୍ ଦେଇଛନ୍ତି ।
ସୂଚନାଯୋଗ୍ୟ, ଚଳିତ ସିଜନ୍ରୁ ପ୍ଲେଅଫରୁ ଉଭୟ ମୁମ୍ବାଇ ଏବଂ ଲକ୍ଷ୍ନୌ ବାଦ ପଡ଼ିଛନ୍ତି । ସେହିଭଳି ଆସନ୍ତାକାଲି ଆରସିବି ଏବଂ ଚେନ୍ନାଇ ମଧ୍ୟରେ ମହାସମର ଦେଖିବାକୁ ମିଳିବ । କାରଣ ଏହି ମ୍ୟାଚ୍ ପରେ କେଉଁ ଟିମ୍ ପ୍ଲେଅଫରେ ପହଞ୍ଚିବ ତାହା ସ୍ପଷ୍ଟ ହୋଇଯିବ । ରାଜସ୍ଥାନ, ହାଇଦ୍ରାବାଦ ଏବଂ କୋଲକାତା ପ୍ଲେଅଫରେ ପହଞ୍ଚିସାରିଥିବା ବେଳେ ଆସନ୍ତାକାଲି ଚତୁର୍ଥ ଟିମ୍ର ଭାଗ୍ୟ ନିର୍ଦ୍ଧାରଣ ହେବାକୁ ଯାଉଛି । ସିଏସକେକୁ ବଡ଼ ରନ୍ କିମ୍ବା ଓଭର ବ୍ୟବଧାନରେ ହରାଇଲେ ଆରସିବି ପ୍ଲେଅଫକୁ ଯିବାର ସମ୍ଭାବନା ରହିଛି ।