ମୁମ୍ବାଇ: ମାୟାନଗରୀ ମୁମ୍ବାଇରେ ବଦଳିଲା ପାଗ । ସିଜନର ପ୍ରଥମ ବର୍ଷା ଦେଖିଲା ମୁମ୍ବାଇ । ବର୍ଷା ସହ ଧୂଳିଝଡ଼ ସାମନ୍ୟ ଅସୁବିଧା ସୃଷ୍ଟି କରିଛି। ହେଲେ ବର୍ଷା ଯୋଗୁଁ ମୁମ୍ବାଇ ସମେତ ଆଖପାଖ ଅଞ୍ଚଳର ଲୋକଙ୍କୁ ପ୍ରବଳ ଗରମରୁ ଆଶ୍ବସ୍ତି ଦେଇଛି । ହଠାତ ପାଗର ମିଜାଜ ପରିବର୍ତ୍ତନ ହେବା ସହ ଧୂଳିଝଡ଼ ଯୋଗୁଁ ମୁମ୍ବାଇରେ ଟ୍ରାଫିକ୍ ଜାମ ଦେଖାଦେଇଥିଲା । ଏପରିକି ଲୋକମାନେ ସମ୍ଭାବ୍ୟ ବିପଦ ଆଶଙ୍କା କରି ସୁରକ୍ଷିତ ସ୍ଥାନରେ ଛିଡ଼ା ହେବାକୁ ବାଧ୍ୟ ହୋଇଥିଲେ ।
ମୁମ୍ବାଇରେ ଆଜି ଅପରାହ୍ଣ ୩ଟାରେ ହଠାତ ମାଡି ଆସିଲା ବର୍ଷା ସହ ଧୂଳିଝଡ। ମୁମ୍ବାଇ ଆକାଶକୁ ଢ଼ାଙ୍କି ଦେଲା କଳାହାଣ୍ଡିଆ ମେଘ। ଦିନରେ ରାତିର ଭ୍ରମ ସୃଷ୍ଟି ହେଲା । ଧୂଳିଝଡ ପରେ ଏଠାରେ ବର୍ଷା ବି ହୋଇଛି। ମୁମ୍ବାଇବାସୀଙ୍କୁ ଗରମରୁ ଆଶ୍ୱସ୍ତି ମିଳିଛି ସତ କିନ୍ତୁ ଲୋକେ ଅସୁବିଧାର ସମ୍ମୁଖୀନ ହୋଇଛନ୍ତି। ପ୍ରବଳ ପବନ ଯୋଗୁ ଚାରିଆଡେ ଭୟଙ୍କର ଧୂଳି ଝଡ ସୃଷ୍ଟି ହୋଇଛି। ଏଥିଲାଗି ମୁମ୍ବାଇ ଏୟାରପୋର୍ଟରେ ବିମାନ ଚଳାଚଳ ପ୍ରଭାବିତ ହୋଇଛି । ବିମାନ ଲ୍ୟାଣ୍ଡିଂ ଓ ଟେକ୍ଅଫ୍କୁ ୩୦ ମିନିଟ ଯାଏଁ ବାତିଲ କରାଯାଇଛି ।
ସେପଟେ ପାଣିପାଗ ବିଭାଗ ତରଫରୁ ମଧ୍ୟ ଆଲର୍ଟ ଜାରି କରାଯାଇଛି। ଆସନ୍ତା ୩ରୁ ୪ ଘଣ୍ଟା ପାଲଘର ଓ ଥାନେ ଜିଲ୍ଲାର ବିଭିନ୍ନ ସ୍ଥାନରେ ଘଣ୍ଟା ପ୍ରତି ୫୦ରୁ ୬୦ ବେଗରେ ପବନ ବହିବା ସହ ଘଡଘଡି ବର୍ଷା ହେବା ସମ୍ଭାବନା ରହିଛି। ଏଥିପାଇଁ ଲୋକଙ୍କୁ ବାହାରକୁ ନ ଯିବାକୁ ଚେତାବନୀ ଜାରି କରାଯାଇଛି। ସେପଟେ ମୁମ୍ବାଇର ମେରାଇନ୍ ଡ୍ରାଇଭ ଅଞ୍ଚଳରେ ଭୟଙ୍କର ଧୂଳିଝଡ ଯୋଗୁ ଲୋକେ ଅସ୍ତବ୍ୟସ୍ତ ହୋଇପଡିଛନ୍ତି । ବର୍ଷା ଓ ପବନ ଯୋଗୁ ବିଭିନ୍ନ ସ୍ଥାନରେ ଗଛ ଉପୁଡି ପଡିଥିବା ସୂଚନା ମିଳିଛି ।