ଦିଗପହଣ୍ଡି,୦୪/୦୫: ଦିଗପହଣ୍ଡି ବ୍ଲକ୍‌ର ଏକ ଗ୍ରାମର ଜଣେ ନାବାଳିକାଙ୍କୁ ବିବାହ ପ୍ରତିଶ୍ରୁତି ଦେଇ ଜଣେ ହୋମଗାର୍ଡ ଯୌନ ଶୋଷଣ କରିବା ସହ ଶାରୀରିକ ସମ୍ପର୍କ ରଖିଥିଲେ । ନାବାଳିକା ଜଣକ ଗର୍ଭବତୀ ହେବା ପରେ ହୋମଗାର୍ଡ ଜଣକ ପ୍ରତାରଣା କରିଥିଲେ ।

କୁମାରୀ ମାତୃତ୍ୱର ୧୦ ମାସ ପରେ ପୀଡ଼ିତାଙ୍କ ଏତଲାକୁ ଭିତ୍ତି କରି ଦିଗପହଣ୍ଡି ପୁଲିସ ସମ୍ପୃକ୍ତ ଥାନାରେ କାମ କରୁଥିବା ବିଜୟ ପଦ୍ମନାଭପୁର ଲାଡ଼ିଗାଁର ହୋମଗାର୍ଡ ନିରଞ୍ଜନ ସେଠୀଙ୍କ ବିରୋଧରେ ମକଦ୍ଦମା ରୁଜୁ କରିଛି । ଅଭିଯୁକ୍ତ ହୋମଗାର୍ଡଙ୍କୁ ପୁଲିସ ଗିରଫ କରି ଡାକ୍ତରୀ ମାଇନା ପରେ ଗୁରୁବାର ବ୍ରହ୍ମପୁରସ୍ଥିତ ସ୍ୱତନ୍ତ୍ର ପୋକ୍ସୋ କୋର୍ଟକୁ ଚାଲାଣ କରିଛି । ଥାନା କେସ୍‌ ନମ୍ବର ୧୩୪/୨୦୨୧ ସମେତ ଶିଶୁ ଯୌନ ଉତ୍ପୀଡ଼ନ ନିରୋଧ ପୋକ୍ସୋ ଆଇନ ଧାରା-୪(୨)/୬ ଅନୁଯାୟୀ ଜାମିନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ବ୍ରହ୍ମପୁର ଜେଲ ହାଜତକୁ ପଠାଇ ଦିଆଯାଇଛି ।

ଗତ ୨୦୨୦ ଜୁଲାଇ ୪ ତାରିଖରେ ପୀଡ଼ିତା ଜଣକ ଏକ କନ୍ୟା ସନ୍ତାନ ଜନ୍ମ ଦେଇଥିଲେ । ଘଟଣାର ଆପୋଷ ସମାଧାନ ନହେବା ପରେ ପୀଡିତା ନାବାଳିକା ବାପଘରେ ରହୁଥିଲେ । ସେ ବୁଧବାର ଦିଗପହଣ୍ଡି ଥାନାରେ ଏତଲା ଦେବା ପରେ ଅଭିଯୁକ୍ତଙ୍କୁ ଗିରଫ କରି ବ୍ରହ୍ମପୁର ବଡ଼ ଡାକ୍ତରଖାନାରେ ଡାକ୍ତରୀ ମାଇନା ପରେ ଗୁରୁବାର କୋର୍ଟ ଚାଲାଣ କରାଯାଇଥିବା ଆଇଆଇସି ବସନ୍ତ କୁମାର ସେଠୀ କହିଛନ୍ତି।