କରୋନା କାଳରେ ପଞ୍ଜାବ କଂଗ୍ରେସରେ କଳହ, ଦିଲ୍ଲୀରେ ପାର୍ଟି ପ୍ୟାନେଲ ସହିତ ଆଲୋଚନା କଲେ ସିଦ୍ଧୁ

ନୂଆଦିଲ୍ଲୀ: କରୋନା ସଙ୍କଟ ଦେଇ ଦେଶ ଗତି କରୁଥିବା ବେଳେ ପଞ୍ଜାବ ରାଜନୀତିରେ ହଟଚମଟ। ଯାହା ପଞ୍ଜାବ କଂଗ୍ରେସରେ କିଛି ଠିକ୍‌ ଚାଲୁନଥିବାର ସଙ୍କେତ ଦେଉଛି। ଏସବୁ ମଧ୍ୟରେ କଂଗ୍ରେସ ହାଇକମାଣ୍ଡ ସମସ୍ତ ବିଧାୟକ, ମନ୍ତ୍ରୀ ଓ ରାଜ୍ୟ ନେତା ମାନଙ୍କୁ ଦିଲ୍ଲୀ ଡକାଇଛନ୍ତି। ଅନ୍ୟପଟେ ମଙ୍ଗଳବାର ଦିନ କଂଗ୍ରେସ ନେତା ତଥା ପୂର୍ବତନ କ୍ରିକେଟର ନଭଜୋତ ସିଂ ସିଦ୍ଧୁ ଦିଲ୍ଲୀ ଆସି ହାଇ କମାଣ୍ଡଙ୍କ ଦ୍ବାରା ହୋଇଥିବା ପ୍ୟାନେଲକୁ ସାକ୍ଷାତ କରି ଯାଇଛନ୍ତି।

ସାକ୍ଷାତ ପରେ ସିଦ୍ଧୁ କହିଛନ୍ତି ଯେ, ହାଇକମାଣ୍ଡଙ୍କ ଡାକରା ପାଇ ମୁଁ ଏଠାକୁ ଆସିଛି। ପଞ୍ଜାବ ଲୋକଙ୍କ ସ୍ବର ଦିଲ୍ଲୀ ପର୍ଯ୍ୟନ୍ତ ପହଁଞ୍ଚେଇବା ପାଇଁ ମୁଁ ଆସିଛି। ମୁଁ ପଞ୍ଜାବର ସତ୍ୟ ଓ ବାସ୍ତବତା ବିଷୟରେ କହିଛି ବୋଲି ସେ କହିଛନ୍ତି।

ସିଦ୍ଧୁ ଆହୁରି କହିଛନ୍ତି ଯେ, ମୋର ଷ୍ଟାଣ୍ଡ ହେଉଛି ପଞ୍ଜାବ ଲୋକ ମାନଙ୍କର ଗଣାତାନ୍ତ୍ରିକ ଶକ୍ତି ଅଛି। ସେମାନେ ଏହା ପାଇବା ଉଚିତ୍। ଯାହା ସତ୍ୟ ଅଟେ ମୁଁ ସମ୍ପୂର୍ଣ୍ଣ ଭାବେ ପ୍ରଶସ୍ତ କରି ଆସିଛି। ନବଜୋତ ସିଂ ସିଦ୍ଧୁ ଆହୁରି କହିଛନ୍ତି ଯେ, ସତ୍ୟ କେବେ ପରାସ୍ତ ହୋଇପାରିବ ନାହିଁ। ଆମେ ପଞ୍ଜାବକୁ ଜିତେଇବାକୁ ପଡ଼ିବ।