ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି (ମଙ୍ଗଳବାର) ତୃତୀୟ ଥର ପାଇଁ ବାରାଣାସୀରୁ ଲୋକସଭା ନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି । ଏହି ସମୟରେ ଭାରତୀୟ ଜନତା ପାର୍ଟିର କିଛି ବଡ ନେତାଙ୍କ ସହ ଏନଡିଏ ମିଳିତ ମଞ୍ଚର ଅନେକ ବରିଷ୍ଠଙ୍କୁ ଦେଖିବାକୁ ମିଳିଥିଲା । ପିଏମ ମୋଦୀ ଏହି ସମୟ ମଧ୍ୟରେ ନିର୍ବାଚନ ଆୟୋଗଙ୍କୁ ଦେଇଥିବା ଆଫିଡେଭିଟ୍ ଯାଞ୍ଚ କରିବା ପରେ ଜଣାପଡିଛି ଯେ, ପ୍ରଧାନମନ୍ତ୍ରୀଙ୍କ ପାଖରେ କେତେ ସମ୍ପତ୍ତି ଅଛି ।
ସର୍ବପ୍ରଥମେ, ଯଦି ଆମେ ନଗଦ ଅର୍ଥରାଶି ବିଷୟରେ ଆଲୋଚନା କରିବା ତେବେ, ପିଏମ ମୋଦୀଙ୍କ ପାଖରେ ନଗଦ ୫୨ ହଜାର ଟଙ୍କା ରହିଛି । ଏହା ପରେ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆରେ ତାଙ୍କର ଦୁଇଟି ଆକାଉଣ୍ଟ ଅଛି । ଏହି ଖାତାଗୁଡ଼ିକ ମଧ୍ୟରୁ ଗୋଟିଏ ଗୁଜୁରାଟର ଗାନ୍ଧିନଗରରେ ଏବଂ ଅନ୍ୟ ଖାତା ବାରାଣାସୀର ଶିବାଜୀ ନଗର ଶାଖାରେ ଅଛି । ପ୍ରଧାନମନ୍ତ୍ରୀ ମୋଦୀଙ୍କ ଗୁଜୁରାଟ ବ୍ୟାଙ୍କ ଆକାଉଣ୍ଟରେ ୭୩ ହଜାର ୩୦୪ ଟଙ୍କା ଏବଂ ବାରାଣାସୀ ଆକାଉଣ୍ଟରେ ମାତ୍ର ୭ ହଜାର ଟଙ୍କା ରହିଛି । ପ୍ରଧାନମନ୍ତ୍ରୀ ମୋଦୀଙ୍କର ମଧ୍ୟ ଏସବିଆଇରେ ୨ କୋଟି ୮୫ ଲକ୍ଷ ୬୦ ହଜାର ୩୩୮ ଟଙ୍କାର ଏଫଡି ରହିଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ନ୍ୟାସନାଲ ସେଭିଂ ସାର୍ଟିଫିକେଟରେ ୯ ଲକ୍ଷ ୧୨ ହଜାର ଟଙ୍କା ବିନିଯୋଗ କରିଛନ୍ତି । ଏହା ବ୍ୟତୀତ, ଚଳନଶୀଳ ସମ୍ପତ୍ତି ମଧ୍ୟରେ ତାଙ୍କର ଚାରୋଟି ସୁନା ମୁଦି ଅଛି, ଯାହାର ମୋଟ ଓଜନ ୪୫ ଗ୍ରାମ ଏବଂ ମୂଲ୍ୟ ୨ ଲକ୍ଷ ୬୭ ହଜାର ୭୫୦ ଟଙ୍କା । ପ୍ରଧାନମନ୍ତ୍ରୀ ମୋଦିଙ୍କ ଆଫିଡେଭିଡ୍ ଅନୁଯାୟୀ, ତାଙ୍କ ପାଖରେ କୌଣସି ଘର କିମ୍ବା ଜମି ନାହିଁ। ଆଉ ଏହି ଭଳି ଭାବେ ମୋଦୀଙ୍କ ମୋଟ୍ ସମ୍ପତିର ମୂଲ୍ୟ ହେଉଛି ୩ କୋଟି ୨ ଲକ୍ଷ ୬ ହଜାର ୮୮୯ ।
ନିର୍ବାଚନ ଆଫିଡେଭିଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ତାଙ୍କ ଶିକ୍ଷା ଯୋଗ୍ୟତା ସମ୍ପର୍କରେ ସୂଚନା ଦେଇଛନ୍ତି। ଏହା ଅନୁଯାୟୀ, ପ୍ରଧାନମନ୍ତ୍ରୀ ମୋଦୀ ୧୯୬୭ ମସିହାରେ ଗୁଜୁରାଟ ବୋର୍ଡରୁ ସ୍ରୁଲ ପାଠପଢା ସମାପ୍ତ କରିଛନ୍ତି । ଏହା ପରେ ସେ ୧୯୭୮ରେ ଦିଲ୍ଲୀ ବିଶ୍ୱବିଦ୍ୟାଳୟରୁ ବି.ଏ କରିଛନ୍ତି । ୧୯୮୩ରେ ଗୁଜୁରାଟ ବିଶ୍ୱବିଦ୍ୟାଳୟରୁ ପିଏମ ମୋଦୀ ମାଷ୍ଟର ଅଫ୍ ଆର୍ଟସ କରିଛନ୍ତି ।
ଏଥର ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲୋକସଭା ନିର୍ବାଚନ ପାଇଁ ଉତ୍ତରପ୍ରଦେଶର ବାରାଣାସୀକୁ ଚୟନ କରିଛନ୍ତି । ସେ ୨୦୧୪ ରେ ପ୍ରଥମ ଥର ପାଇଁ ବାରାଣାସୀରୁ ସାଂସଦ ଭାବରେ ନିର୍ବାଚିତ ହୋଇଥିଲେ ଏବଂ ପରେ ଦେଶର ପ୍ରଧାନମନ୍ତ୍ରୀ ହୋଇଥିଲେ । ୨୦୧୯ ରେ ମଧ୍ୟ ସେ ବାରାଣାସୀ ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ ଏବଂ ୨୦୨୪ ନିର୍ବାଚନ ଯୁଦ୍ଧରେ ସେ ବାରାଣାସୀର ପ୍ରାର୍ଥୀ ମଧ୍ୟ ହୋଇଛନ୍ତି ।