ରାଜ୍ୟପାଳ ଗାଇଲେ ଗୀତ – ଏ ମାଟି ଓଡ଼ିଶା ଏ ଜାତି ଓଡ଼ିଆ.. ଭିଡିଓରେ ଖର୍ଚ୍ଚ ହେବ ୧୫ ଲକ୍ଷ, ମ୍ୟୁଜିକ୍ ଭିଡିଓରେ ରହିବେ ମୁଖ୍ୟମନ୍ତ୍ରୀ
କଟକ,୨୮ା୨(ବ୍ୟୁରୋ): ଓଡ଼ିଶାର ପ୍ରଥମ ନାଗରିକ ତଥା ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଆଜି ଓଡ଼ିଆରେ ଗୀତ ଗାଇଛନ୍ତି । ଭୁବନଶ୍ୱେରର ଏକ ଷ୍ଟୁଡିଓରେ ଲୋକପ୍ରିୟ ସଙ୍ଗୀତ ନିର୍ଦ୍ଦେଶକ ପ୍ରେମ ଆନନ୍ଦଙ୍କ ସ୍ୱର ସଂଯୋଜନାରେ ପ୍ରସ୍ତୁତ ‘ଏ ମାଟି ଓଡ଼ିଶା ଏ ଜାତି ଓଡ଼ିଆ’ ଗୀତରେ ରାଜ୍ୟପାଳଙ୍କ ଭଏସ୍ ରେକର୍ଡିଂ କରାଯାଇଛି । ବିଶିଷ୍ଟ ଗୀତିକାର ବସନ୍ତରାଜ ସାମଲଙ୍କ ଦ୍ୱାରା ରଚନା କରାଯାଇଥିବା ଆଜି ଏହି ଗୀତର କେବଳ ଟ୍ୟାଗ୍ ଲାଇନ୍ ‘ଏ ମାଟି ଓଡ଼ିଶା ଏ ଜାତି ଓଡ଼ିଆ’ ଗାଇ ରାଜ୍ୟପାଳ ଖୁସିବ୍ୟକ୍ତ କରିଛନ୍ତି । ଏହି ଗୀତରେ ଓଡ଼ିଶାର ୧୪ ଜଣ ଆଗଧାଡ଼ିର କଣ୍ଠଶିଳ୍ପୀ କଣ୍ଠଦାନ କରିଛନ୍ତି । ଏହି ଗୀତ ମ୍ୟୁଜିକ୍ ଭିଡିଓ ଭାବେ ଉତ୍କଳ ଦିବସରେ ରିଲିଜ୍ ହେବ ବୋଲି ସୂଚନା ମିଳିଛି ।
ସୂଚନା ଅନୁସାରେ, କିଛି ଦିନ ତଳେ ସଂଗୀତ ନିର୍ଦ୍ଦେଶକ ପ୍ରେମ ଆନନ୍ଦ ରାଜ୍ୟପାଳଙ୍କୁ ଭେଟି ଓଡ଼ିଆ ଜାତି ପାଇଁ ତିଆରି ହୋଇଥିବା ଏହି ଗୀତରେ କଣ୍ଠଦାନ କରିବାକୁ ଅନୁରୋଧ କରିଥିଲେ । ଗୀତର ଲେଖା ଏବଂ ସ୍ୱର ଶୁଣିବା ପରେ କଣ୍ଠଦାନ କରିବାକୁ ରାଜ୍ୟପାଳ ରାଜି ହୋଇଥିଲେ । ସେହି ଅନୁସାରେ ଆଜି ଦିନ ପ୍ରାୟ ଗୋଟାଏ ବେଳେ ଏହି ଗୀତର ରେକର୍ଡିଂ କରାଯାଇଛି ।
ଏହି ଗୀତରେ ଓଡ଼ିଶାର ଆଗଧାଡ଼ିର କଣ୍ଠଶିଳ୍ପୀ ହ୍ୟୁମାନ ସାଗର, ଅନନ୍ୟା ଶ୍ରୀତମ ନନ୍ଦ, ଲୋପାମୁଦ୍ରା, ଆଶୁତୋଷ, ଶଶାଙ୍କ, ପ୍ରଜ୍ଞା, ଦେବକୃପା, ସବିଶେଷ, ସୋନମ୍, ବିଶ୍ୱଜିତ, ଅଲ୍କା, ସମୀକ୍ଷା, ଶ୍ରୀୟା ପ୍ରମୁଖ କଣ୍ଠଦାନ କରିଛନ୍ତି । ଏହାର ଭିଡିଓ ଖୁବ୍ଶୀଘ୍ର ପ୍ରସ୍ତୁତ ହେବ । ପାଖାପାଖି ୧୫ ଲକ୍ଷ ଟଙ୍କା ଏହି ଭିଡିଓ ପ୍ରସ୍ତୁତ କରାଯିବ । ଏହି ଭିଡିଓରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମଧ୍ୟ ଦେଖିବାକୁ ମିଳିବ । ଏହା ସହିତ ଏହି ଗୀତରେ କଣ୍ଠଦାନ କରିଥିବା ସମସ୍ତ କଣ୍ଠଶିଳ୍ପୀ ମଧ୍ୟ ଏହି ଭିଡିଓରେ ଅଭିନୟ କରିବେ ବୋଲି ଜଣାପଡ଼ିଛି । ଆସନ୍ତା ଆଜି ଷ୍ଟୁଡିଓରେ ଏହି ଗୀତଟି ଗାଇବା ସହିତ ରାଜ୍ୟପାଳ ପ୍ରେମ ଆନନ୍ଦଙ୍କୁ ପ୍ରଶଂସା କରିବା ସହିତ ଏହି ଗୀତ ସାରା ବିଶ୍ୱକୁ ଝଙ୍କୃତ କରିବ ବୋଲି କହିଥିଲେ ।
ଏହି ଅବସରରେ ରାଜ୍ୟପାଳ କହିଥିଲେ ଯେ, ଏହି ଗୀତର ସ୍ୱର ଅତ୍ୟନ୍ତ ଚମତ୍କାର ହୋଇଛି । ଯାହାକୁ ଶୁଣି ସମସ୍ତେ ଆତ୍ମହରା ହୋଇପଡ଼ିବେ । କେବଳ ଓଡ଼ିଶା ନୁହେଁ ସାରା ବିଶ୍ୱରେ ଏହି ଗୀତ ଓଡ଼ିଆଙ୍କୁ ଗର୍ବିତ କରିବ । ଗୀତର ସଙ୍ଗୀତ ନିର୍ଦ୍ଦେଶକ ପ୍ରେମ ଆନନ୍ଦ କହିଥିଲେ ଯେ, ମୋର ପରମ ସୌଭାଗ୍ୟ ଆମ ରାଜ୍ୟପାଳ ଗୀତଟି ଗାଇଲେ । ଏହି ଗୀତ ସବୁ ବର୍ଗର ଶ୍ରୋତାଙ୍କ ହୃଦୟରେ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିବ ବୋଲି ସେ ଆଶାବ୍ୟକ୍ତ କରିଛନ୍ତି ।
