ଭୁବନେଶ୍ୱର ୦୩/୧୨: ବଲିଉଡ୍ ଅଭିନେତ୍ରୀ ସ୍ୱର୍ଗତ ଶ୍ରୀଦେବୀଙ୍କ ଉପରେ ପୁସ୍ତକ ରଚନା କରି ଚର୍ଚ୍ଚାରେ ରହିଛନ୍ତି ଓଡ଼ିଆ ପୁଅ ସତ୍ୟାର୍ଥ ନାୟକ । ତାଙ୍କ ରଚିତ ଶ୍ରୀଦେବୀ- ଦ ଏଟରନାଲ୍ ସ୍କ୍ରିନ୍ ଗଡେସ୍ ଗତକାଲି ସନ୍ଧ୍ୟାରେ ନୂଆଦିଲ୍ଲୀ ଇଣ୍ଡିଆ ହାବିଟାଟ ସେଣ୍ଟର ଠାରେ ଅନୁଷ୍ଠିତ ଟାଇମ୍ସ ଲିଟ୍ ଫେଷ୍ଟରେ ଲୋକାର୍ପିତ ହୋଇଛି । କାର୍ଯ୍ୟକ୍ରମରେ ବଲିଉଡର ଅନ୍ୟତମ ସୁନ୍ଦରୀ ନାୟିକା ଦୀପିକା ପାଦୁକୋନ ଯୋଗଦେଇ ପୁସ୍ତକଟିକୁ ଲୋକର୍ପିତ କରିଥିଲେ । ଏଥିରେ ଶ୍ରୀଦେବୀଙ୍କ ସ୍ୱାମୀ ତଥା ପ୍ରଯୋଜକ ବୋନି କପୁର ଏବଂ ନିର୍ଦ୍ଦେଶକ ଗୌରୀ ସିନ୍ଦେ ଉପସ୍ଥିତ ଥିଲେ ।
ପୁସ୍ତକଟି ପେଙ୍ଗୁଇନ ପ୍ରକାଶନୀ ସଂସ୍ଥା ଦ୍ୱାରା ପ୍ରକାଶିତ । ଏହା ଆମାଜନ୍ ସାଇଡ୍ରେ ବିକ୍ରି ହେଉଥିବାବେଳେ ଏହାର ଦାମ୍ ୫୩୯ ଟଙ୍କା ରହିଛି । ବହିର ମୁଖବନ୍ଧରେ ଶ୍ରଦ୍ଧାଞ୍ଜଳି ସ୍ୱରୂପ ଶ୍ରୀଦେବୀଙ୍କ ଉଦ୍ଦେଶ୍ୟରେ ସ୍ମୃତି ବଖାଣିଛନ୍ତି ଆଉ ନାୟିକା କାଜଲ । ସେ ପ୍ରଥମ ଥର ପାଇଁ ଜଣେ ଭାରତୀୟ ସିନେ ଜଗତର ସୁପର୍ଷ୍ଟାର୍ ନାୟିକାଙ୍କ ପାଇଁ ଏହି ଲେଖାଟି ଲେଖିଥବା କଥା ଟ୍ୱିଟ୍ କରି ଜଣାଇବା ସହ ବୋନି କପୁର, ସତ୍ୟାର୍ଥ ଏବଂ ପ୍ରକାଶନୀ ସଂସ୍ଥାଙ୍କୁ ଧନ୍ୟବାଦ ଜଣାଇଛନ୍ତି ।
ପୂର୍ବରୁ ସତ୍ୟାର୍ଥ ମେଗା ବଜେଟ୍ ଐତିହାସିକ ସିରିଏଲ୍ ‘ପୋରଷ’ର କାହାଣୀ ଲେଖିବାକୁ ଚୁକ୍ତିବଦ୍ଧ ହୋଇଥିଲେ । ନୂଆଦିଲ୍ଲୀରେ ରହୁଥିବା ସତ୍ୟାର୍ଥ ଜଣେ ଲେଖକ ଏବଂ ଚିତ୍ରନାଟ୍ୟକାର । ସେଣ୍ଟ୍ ଷ୍ଟିଫେନ୍ସରେ ଇଂରାଜୀରେ ମାଷ୍ଟର ଡିଗ୍ରୀ କରିଥିବା ସତ୍ୟାର୍ଥ ସିଏନଏନ୍-ଆଇବିଏନ୍ର ପ୍ରତିନିଧି ଭାବେ କାର୍ଯ୍ୟ କରିଛନ୍ତି । ୨୦୦୮ ମସିହାରେ ସ୍ୱାସ୍ଥ୍ୟ ସମ୍ପର୍କିତ ରିପୋର୍ଟଂ କରି ସେ ପ୍ରଶଂସିତ ଏବଂ ପୁରସ୍କୃତ ହୋଇଛନ୍ତି । ୨୦୧୪ ମସିହାରେ ସତ୍ୟାର୍ଥୀଙ୍କ ଦ୍ୱାରା ପ୍ରକାଶିତ ନଭେଲ ‘ଦି ଏମ୍ପେରର୍ସ ରିଡଲ୍ସ’ ବେଷ୍ଟ ସେଲିଂ ହୋଇଥିଲା ।