PRAMEYA

Prameya News Portal, Prameya Daily, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • ସମ୍ବଲପୁର : ହୀରାକୁଦ ଜଳଭଣ୍ଡାରରେ ଘେରି ମାଛ ଚାଷ ବା କେଜ୍ କଲଚରକୁ ବିରୋଧ, ଆନ୍ଦୋଳନକୁ ଓହ୍ଲାଇବ ବୁଡି ଅଞ୍ଚଳ ସଂଗ୍ରାମ ସମିତି, ଆଗାମୀ ଦିନରେ ସବୁ ପରିବାରରୁ ସରକାରଙ୍କୁ ସ୍ମାରକପତ୍ର ପ୍ରେରଣ ସହ ଜିଲ୍ଲାପାଳ ଓ ମତ୍ସ୍ୟ ଉପନିର୍ଦ୍ଦେଶକଙ୍କ ଅଫିସ ଘେରାଉ କରିବାକୁ ଚେତାବନୀ
  • ||
  • ପାରାଦୀପ : ୧୦ ଗ୍ରାମର ବ୍ରାଉନସୁଗାର ଜବତ କଲା ପାରଦୀପ ଅବକାରୀ ବିଭାଗ
  • ||
  • ସମ୍ବଲପୁର: ଭିସୁଟରେ ୨୫ ଛାତ୍ର କରୋନା ପଜିଟିଭ, ପ୍ରଥମ ଶ୍ରେଣୀ ପାଠପଢା ବାତିଲ, ଜିଲ୍ଲାପାଳଙ୍କ ଘଟଣାସ୍ଥଳରେ ଅନୁଧ୍ୟାନ
  • ||
  • ଭୁବନେଶ୍ଵର : ରାଜ୍ୟରେ ନିର୍ମାଣ ହେବ ୨୦ଟି ସାଇନ୍ସ ପାର୍କ, ପ୍ରଥମ ପର୍ଯ୍ୟାୟରେ ୧୦ଟି ଓ ଦ୍ଵିତୀୟ ପର୍ଯ୍ୟାୟରେ ୧୦ଟି ସାଇନ୍ସ ପାର୍କ ନିର୍ମାଣ ହେବ, ସନ୍ତୋଷ ସିଂ ସାଲୁଜାଙ୍କ ପ୍ରଶ୍ନରେ ଉତ୍ତର ରଖିଲେ ମନ୍ତ୍ରୀ ଅଶୋକ ପଣ୍ଡା
  • ||
  • ଯାଜପୁର : ଯୋଡିକୁଅ ଛକ ନିକଟରେ ଗଛ କଟାଯାଉଥିବା ବେଳେ ଅଘଟଣ, ଗଛ ପଡି ୭ ବର୍ଷର ବାଳକ ମୃତ, ଘଟଣାସ୍ଥଳରେ ତୀବ୍ର ଉତ୍ତେଜନା ସୃଷ୍ଟି
  • ||
  • ଭଦ୍ରକ : ଧାନ ବିକ୍ରିରେ ଅନିୟମିତତା, ଦଲାଲଙ୍କୁ ପ୍ରଶୟ ଦେଇ ଚାଷୀଙ୍କ ଠାରୁ ଧାନ କିଣୁନି ସମବାୟ ସମିତି, ଆନନ୍ଦପୁର ଏନଏଚ ୫୩ ବସନ୍ତିଆ ଛକରେ ଧାନବସ୍ତା ରଖି ରାସ୍ତାରୋକ କଲେ ଶତାଧିକ ଚାଷୀ
  • ||
  • ମାଲକାନାଗିରି : ମାଓ ଯୋଜନା ପଣ୍ଡ, ମାଲକାନଗିରି ସୀମାନ୍ତ ଛତିଶଗଡ଼ କାଙ୍କେର୍ ଜିଲ୍ଲାରେ ମର୍କାନାର-ବଡ଼ପରା ରାସ୍ତା ନିକଟରେ ଆଇଇଡି ଠାବ କଲେ ବି.ଏସ.ଏଫ୍ ଯବାନ
  • ||
  • ରାୟଗଡ଼ା: କାଶୀପୁର ବ୍ଲକ ବଡପୁକେଲ ଗ୍ରାମରେ ହାଜି ମାଝୀ ନାମକ ଜଣେ ବ୍ୟକ୍ତିଙ୍କୁ ହତ୍ୟା, କାରଣ ଅସ୍ପଷ୍ଟ
  • ||
  • ଭୁବନେଶ୍ଵର : ୫ଟି ହାଇ ରିସ୍କ ରାଜ୍ୟ ଫେରନ୍ତାଙ୍କ ଉପରେ କଡା ନଜର, ୭ ଦିନ ହୋମ ଆଇସୋଲେସନରେ ରହିବେ ଏହି ୫ ରାଜ୍ୟ ଫେରନ୍ତା, ସମସ୍ତ ଜିଲ୍ଲାପାଳ, ପୌରାଞ୍ଚଳ କମିଶନଙ୍କୁ ସ୍ଵାସ୍ଥ୍ୟ ବିଭାଗର ନିର୍ଦ୍ଦେଶ
  • ||
  • ବ୍ରହ୍ମପୁର : ଆନ୍ଧ୍ରପ୍ରଦେଶକୁ ବାଲି ଚୋରା ଚାଲାଣ ବେଳେ ଚଢାଉ, ୮ଟି ବାଲି ବୋଝେଇ ହାଇୱା ଜବତ କଲା ଛତ୍ରପୁର ପୋଲିସ
  • ||
  • ଜଳେଶ୍ଵର : ଆଜି ପଦ୍ମଭୂଷଣ ମନୋଜ ଦାସଙ୍କ ଜନ୍ମଦିନ, ସେ ଏକାଧାରାରେ ଜଣେ ଦାର୍ଶନିକ, ଜଣେ ଚିନ୍ତକ-ଲେଖକ, ସେ ଜଣେ ଅଗ୍ରଣୀ ଦ୍ୱିଭାଷୀ ଓଡିଆ ଲେଖକ
  • ||
  • କୋରାପୁଟ: ନାରାୟଣ ପାଟଣା ଜଙ୍ଗଲରେ କମ୍ବିଂ ଅପରେସନ ଚାଲିଥିବା ବେଳେ ମାଓ ସାମଗ୍ରୀ ଜବତ, ୬୦ଟି ଜିଲେଟିନ,୫୦ଟି ଇଲେକଟ୍ରିକ ଡିଟୋନେଟର,୫ ବଣ୍ଡେଲ ବିଦ୍ୟୁତ ତାର,୨.୫ କେଜି ଗନ ପାଉଡର ଜବତ କଲା ବିଏସଏଫ
  • ||
  • ଭୁବନେଶ୍ବର: ରାଜଧାନୀରେ ୪୦ ଡିଗ୍ରୀ ଡେଇଁଲା ପାରଦ, ମାର୍ଚ୍ଚ ୬ରେ ଅସମ୍ଭାଳ ତାତି ଆଶଙ୍କା
  • ||
  • ପୁରୀ: ଆଜି ମାଘ ପୂର୍ଣ୍ଣମୀ, ମହାପ୍ରଭୁଙ୍କ ଗଜୋଦ୍ଧାରଣ ବେଶ
  • ||
  • ଖୋର୍ଦ୍ଧା : ବେଗୁନିଆ ବ୍ଲକ ସାରୁଅ ଗାଁରେ ଗତକାଲି ବିଳମ୍ବିତ ରାତ୍ରୀରେ ଭୟାବହ ଅଗ୍ନିକାଣ୍ଡ। ୨ ବଖରା ଘର ସହ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ
  • ||
  • ନୂଆଦିଲ୍ଲୀ : ଆଜି ଦେଶର ପ୍ରଥମ “ଭାରତ ଖେଳନା ମେଳା”ର ଉଦଘାଟନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି
  • ||
  • ଭୁବନେଶ୍ବର: ୧୦ ରାଜ୍ୟରୁ ଫେରୁଥିବା ଓଡିଆ ପ୍ରବାସୀଙ୍କ ଲାଗି ୭ ଦିନିଆ ଆଇସୋଲେସନ ବାଧ୍ୟତାମୂଳକ
  • ||
  • ବଢ଼ୁଛି ଗ୍ରୀଷ୍ମ ପ୍ରବାହ, ମାର୍ଚ୍ଚ ୧ରୁ ସକାଳୁଆ ସ୍କୁଲ ପାଇଁ ରାଜ୍ୟ ସରକାର ନେଲେ ନିଷ୍ପତ୍ତି
  • ||

ଓଡ଼ିଶା ଏବେ ପରିବର୍ତ୍ତନର ସୂତ୍ରଧର: ବିକାଶରେ ରାଜ୍ୟବାସୀ ସାମିଲ୍‌ ହୋଇଛନ୍ତି

source:www.livemint.com

ଭୁବନେଶ୍ୱର,୬ ।୨(ବ୍ୟୁରୋ): ବିକାଶରେ ଆମ ରାଜ୍ୟ ବେଶ୍‌ ଆଗକୁ ଆଗକୁ ଯାଉଛି । ଦ୍ରୁତ ବିକାଶରେ ଆମେ ଜାତୀୟ ଓ ଆନ୍ତର୍ଜାତିକସ୍ତରରେ ନୂଆ ବେଞ୍ଚମାର୍କ ପ୍ରତିଷ୍ଠା କରିଛୁ । ସବୁଠାରୁ ବଡ଼ କଥା ହେଲା ସରକାରଙ୍କ ଏ ବିକାଶ ପ୍ରକ୍ରିୟା ଉଦ୍ୟମରେ ରାଜ୍ୟବାସୀ ସାମିଲ୍‌ ହୋଇଛନ୍ତି, ଯାହା ଆମକୁ ଉତ୍ସାହିତ କରୁଛି । ଓଡ଼ିଶା ଏବେ ପରିବର୍ତ୍ତନର ସୂତ୍ରଧର ସାଜିଛି । ଦେଶ ଆମକୁ ଆଜି ଅନୁକରଣ କରୁଛି ।
ରାଜ୍ୟପାଳଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଲୋଚନାରେ ଅଂଶଗ୍ରହଣ କରି ଏହା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ବିଧାନସଭାରେ ନିଜ ଅଭିଭାଷଣ ରଖି ମୁଖ୍ୟମନ୍ତ୍ରୀ କହିଲେ, ଆମେ ଅଭିବୃଦ୍ଧିରେ ଏବେ ବହୁ ଆଗରେ । ଏକମାତ୍ର ରାଜ୍ୟ ଭାବେ ଓଡ଼ିଶା ଚାଷୀଙ୍କ ଆୟ ଦି’ଗୁଣା କରିପାରିଛି । ସାଧାରଣ ବଣ୍ଟନ ବ୍ୟବସ୍ଥାକୁ ସର୍ବାଧିକ ଯୋଗଦାନ ଆମ ରାଜ୍ୟର ରହିଛି । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ହେଉଛି ସମଗ୍ର ଦେଶରେ ଏକ ସ୍ୱତନ୍ତ୍ର ସ୍ୱାସ୍ଥ୍ୟସେବା ଯୋଜନା । ଏଥିରେ ସାଢ଼େ ୩ କୋଟି ଲୋକଙ୍କୁ ସରକାର ସ୍ୱାସ୍ଥ୍ୟସେବା ଯୋଗାଇ ଦେଉଛନ୍ତି ।
ମୁଖ୍ୟମନ୍ତ୍ରୀ କହିଲେ, ସରକାର ଚାଷୀଙ୍କ କଲ୍ୟାଣ ପାଇଁ ‘କାଳିଆ’ ଯୋଜନା ଆରମ୍ଭ କରିଛନ୍ତି । ଆମର ଏହି ଅଭିନବ ଯୋଜନାକୁ ସମଗ୍ର ଦେଶରେ ବେଶ୍‌ ପ୍ରଶଂସା ମିଳିଛି । ଏପରିକି କେନ୍ଦ୍ର ସରକାର ଏ ଢ଼ାଞ୍ଚାରେ ଯୋଜନା ଆଣିଛି । ତେବେ କେନ୍ଦ୍ର ଯୋଜନାରେ ଭାଗ ଚାଷୀ, ଭୂମିହୀନ ଶ୍ରମିକଙ୍କ ପାଇଁ କିଛି ସୁବିଧା ନାହିଁ । ଆମ ଯୋଜନାରେ ୯୨% ଚାଷୀ ଲାଭବାନ ହେବେ । ଆମେ ଅଧିକ ୧୦ ଲକ୍ଷ ହେକ୍ଟର ଜମିକୁ ସେଚ ଦେବାକୁ ଲକ୍ଷ୍ୟ ନେଇଥିଲୁ । ଆସନ୍ତା ଏପ୍ରିଲ ସୁଦ୍ଧା ଆମେ ଏହି ଲକ୍ଷ୍ୟ ପୂରଣ କରିବୁ ।
ଗତ ଅକ୍ଟୋବର ମାସରୁ ଆମେ ନିଜସ୍ୱ ଖାଦ୍ୟ ସୁରକ୍ଷା ଯୋଜନା ଆରମ୍ଭ କରିଛୁ । ଏଥିରେ ୨୩ ଲକ୍ଷ ହିତାଧିକାରୀ ସାମିଲ୍‌ ହୋଇଛନ୍ତି । ଆମ ଗାଁ ଆମ ବିକାଶରେ ୩୧୪ ବ୍ଲକର ପଞ୍ଚାୟତକୁ ନୂଆ ପ୍ରକଳ୍ପ ଦିଆଯାଇଛି । ଏଥିରେ ୬୨ ହଜାର ୮୫୭ ନୂଆ ପ୍ରକଳ୍ପ ପାଇଁ ୧୫୫୪ କୋଟି ଟଙ୍କା ଦିଆଯାଇଛି । ସରକାର ନୂତନ ଭାବେ ଆରମ୍ଭ କରିଥିବା ‘ପିଠା’ କାର୍ଯ୍ୟକ୍ରମରେ ସାମାଜିକ ସୁରକ୍ଷା ଯୋଜନାର ହିତାଧିକାରୀଙ୍କୁ ପ୍ରାପ୍ୟ ସହ ସାମଗ୍ରୀ ବଣ୍ଟନ କରାଯାଉଛି । ଏହାଦ୍ୱାରା ଯୋଗ୍ୟ ହିତାଧିକାରୀ ଠିକଣା ସମୟରେ ତାଙ୍କ ହକ୍‌ ପାଉଛନ୍ତି ।
ମହିଳା ସଶକ୍ତିକରଣ କ୍ଷେତ୍ରରେ ରାଜ୍ୟର ପ୍ରଗତି ବେଶ୍‌ ଉଲ୍ଲେଖନୀୟ ବୋଲି ଦର୍ଶାଇ ମୁଖ୍ୟମନ୍ତ୍ରୀ କହିଲେ, ମିଶନଶକ୍ତିରେ ୩ ଲକ୍ଷ ନୂଆ ସ୍ୱୟଂ ସହାୟକ ଗୋଷ୍ଠୀକୁ ଯୋଡ଼ାଯାଇଛି । ଏଥିରେ ୭୦ ଲକ୍ଷ ମହିଳାଙ୍କୁ ସଶକ୍ତ କରାଯାଇଛି । ମଧୁବାବୁ ପେନସନ ଯୋଜନାରେ ଅଧିକ ୫ ଲକ୍ଷ ହିତାଧିକାରୀଙ୍କୁ ନିଆଯାଇଥିଲା ବେଳେ ହିତାଧିକାରୀଙ୍କ ପେନସନ ପରିମାଣରେ ମଧ୍ୟ ୨୦୦ ଟଙ୍କା ବୃଦ୍ଧି କରାଯାଇଛି ।
ମେକ ଇନ୍‌ ଓଡ଼ିଶା କନକ୍ଲେଭ ୨୦୧୮ରେ ସରକାରଙ୍କୁ ସଫଳତା ମିଳିଛି । ଦେଶର ପ୍ରମୁଖ ଶିଳ୍ପପତିମାନେ ଏଥିରେ ଅଂଶଗ୍ରହଣ କରିବା ସହ ୪.୨୦ ଲକ୍ଷ କୋଟିର ନିବେଶ ପ୍ରତିଶ୍ରୁତି ମିଳିଛି । ଏଥିରେ ୫.୯୧ ଲକ୍ଷର କର୍ମସଂସ୍ଥାନ ସୃଷ୍ଟି ହୋଇପାରିବ । ଷ୍ଟାର୍ଟଅପ ପଲିସି ଆଣି ସମଗ୍ର ଦେଶରେ ଓଡ଼ିଶା ଶ୍ରେଷ୍ଠ ପ୍ରଦର୍ଶନକାରୀ ଭାବେ ପରିଗଣିତ ହୋଇଛି । ସିଙ୍ଗାପୁରର ଆଇଟିଇଇଏସ ସହ ଅନୁବନ୍ଧିତ ହୋଇ ସରକାର ଏକ ବିଶ୍ୱସ୍ତରୀୟ ଦକ୍ଷତା ବିକାଶ କେନ୍ଦ୍ର ଭୁବନେଶ୍ୱରରେ ପ୍ରତିଷ୍ଠା କରିବେ । ପୁରୀ ଶ୍ରୀମନ୍ଦିରର ବିକାଶକୁ ମଧ୍ୟ ସରକାର ଅଗ୍ରାଧିକାର ଦେଉଛନ୍ତି ।
ବିଶ୍ୱ କପ ହକିର ସଫଳ ଆୟୋଜନ କରି ଓଡ଼ିଶା ଏବେ ଦେଶର ଏକ ପ୍ରମୁଖ କ୍ରୀଡ଼ା ରାଜଧାନୀ ଭାବେ ପରିଚିତ ହୋଇପାରିଛି । ଆଗକୁ ସୁଇମିଂ, ସୁଟିଂ, ଫୁଟବଲ, ହକି ଓ ବ୍ୟାଡମିିଣ୍ଟନରେ ଉତ୍କର୍ଷକେନ୍ଦ୍ର ପ୍ରତିଷ୍ଠା କରିବାକୁ ଯୋଜନା ରହିଛି ।
ଗୃହକୁ ଅବଗତ କରାଇ ମୁଖ୍ୟମନ୍ତ୍ରୀ କହିଲେ, ସମୟ ସହ ତାଳଦେଇ ଆମ ରାଜ୍ୟ ପରିବର୍ତ୍ତନ ଆଡକୁ ମାଡ଼ି ଚାଲିଛି । ରାଜ୍ୟର ସାମଗ୍ରିକ ବିକାଶ ସହ ଆର୍ଥିକ ଅଭିବୃଦ୍ଧି ପାଇଁ ସରକାରଙ୍କର ନିରନ୍ତର ଉଦ୍ୟମ ଜାରି ରହିଛି ବୋଲି ମୁଖ୍ୟମନ୍ତ୍ରୀ ସ୍ପଷ୍ଟ କରିଥିଲେ ।

ସମ୍ବନ୍ଧିତ ଖବର