ପୁରୀ ୨୯/୮: କୃଷ୍ଣପ୍ରସାଦ ଉପକୂଳରେ ଲାଗିଥିବା ମାଲେସିଆ ଜାହାଜର ଟ୍ୟାଙ୍କରରୁ ତେଲ ଖାଲି କରିବାକୁ ପ୍ରଶାସନ ପଦକ୍ଷେପ ନେଇଛି । ଛୋଟ ଛେଟ ଟ୍ୟାଙ୍କରରେ ଜାହାଜରୁ ପାଇପ୍ ଲଗାଇ ତେଲ କଢ଼ାଯାଉଛି । ଏହି ଜାହାଜରେ ୩୦ ହଜାର ଲିଟର ତେଲ ରହିଛି । ତେଲ ଖାଲି କରିବାକୁ ୩ଦିନ ଲାଗିଯିବା ଅନୁମାନ କରାଯାଉଛି । ଜିଲ୍ଲାପାଳ ବଲୱନ୍ତ ସିଂହ କହିଛନ୍ତି କାଲିଠାରୁ ମାଲେସିଆ ଜାହାଜରୁ ତେଲ ନିଷ୍କାସନ ପାଇଁ ସ୍ୱତନ୍ତ୍ର ଦଳ ନିୟୋଜିତ ହୋଇଛନ୍ତି । ଜାହାଜରୁ ତେଲ ନିଷ୍କାସନ ପାଇଁ ସମୟ ଲାଗିବ । ଏହା ଦ୍ୱାରା ତେଲ ପ୍ରଦୂଷଣ ନେଇ ଚାଲିଥିବା ନାନା କଳ୍ପନାଜଳ୍ପନାର ଅବସାନ ଘଟିବା ଆଶା କରାଯାଉଛି ।
କୋଲକାତା, ବାଲେଶ୍ୱର ଓ ପାରାଦୀପ ବନ୍ଦରରୁ ୩ଟି ଟିମ୍ ଘଟଣା ସ୍ଥଳରେ ପହଞ୍ଚି ଜାହାଜରୁ ତେଲ କାଢ଼ିବା ପାଇଁ ପାଇପ୍ ବିଛାଇଥିଲେ । ସମୁଦ୍ର କୂଳରେ ଥିବା ଜାହାଜରୁ ପାଇପ୍ ଚିଲିକା କୂଳ ପର୍ଯ୍ୟନ୍ତ ବିଛା ଯାଇଛି । ବ୍ରହ୍ମପୁରରୁ ଆସିଥିବା ବଡ଼ ବଡ଼ ଡ୍ରମ୍ ମାଧ୍ୟମରେ ତେଲ କଢ଼ା ଯାଇ ଚିଲିକାରେ ଘେରିକଟା ଭେସେଲ ଦ୍ୱାରା ସାତପଡ଼ାସ୍ଥିତ ସିଡିଏ କାର୍ଯ୍ୟାଳୟକୁ ଅଣାଯିବାର ବ୍ୟବସ୍ଥା ହୋଇଛି ।
ଇତିମଧ୍ୟରେ ଜାହାଜ କମ୍ପାନି ନିର୍ଦ୍ଦେଶକଙ୍କ ସହ ରାଜ୍ୟ ପ୍ରଶାସନ ଯୋଗାଯୋଗ କରିବାରେ ସଫଳ ହୋଇଥିବାର ପରିବହନ ବିଭାଗ କହିଛି । ଜାହାଜ କମ୍ପାନିର ନିର୍ଦ୍ଦେଶକ ପହଞ୍ଚିବା ପରେ ଜାହାଜକୁ ଉଦ୍ଧାର କରାଯିବ ।