ଭୁବନେଶ୍ବର, ୨୬/୧ : ଓଲିଉଡରେ ନୂଆ ଯୋଡ଼ିଙ୍କୁ ନେଇ ସବୁବେଳେ ଆଲୋଚନା ହୋଇ ଆସୁଥିଲାବେଳେ ଏବେ ନୂଆ ବର୍ଷ ଆରମ୍ଭରୁ ଆଉ ଏକ ନୂଆ ଯୋଡ଼ିଙ୍କୁ ନେଇ ଢ଼େର ସାରା ଚର୍ଚ୍ଚା ଲାଗି ରହିଛି । ସେମାନେ ହେଲେ ଓଲିଉଡର ଜେଣ୍ଟଲମ୍ୟାନ୍ ଆକାଶ ଦାସ ନାୟକ ଏବଂ ସୁନ୍ଦରୀ ନାୟିକା ତମନ୍ନା । ସିନେମା ‘କରୁକ୍ଷେତ୍ର’ ପାଇଁ ଦୁହେଁ ପ୍ରଥମ ଥର ଏକାଠି ହୋଇଛନ୍ତି । ଜୀସାର୍ଥକ ଫିଲ୍ମସ୍ ବ୍ୟାନରରେ ପ୍ରସ୍ତୁତ ସିନେମାରେ ଉଭୟେ ଯୋଡ଼ି ସାଜି ପରଦାରେ ନଜର ଆସିବେ । ଯାହାଙ୍କୁ ଦର୍ଶକ ଖୁବ୍ଶୀଘ୍ର ଦେଖିବାକୁ ପାଇବେ ।
ସିନେମାଟି ଆସନ୍ତା ଫେବୃଆରୀ ୧୦ରେ ପ୍ରେକ୍ଷାଳୟ ପରେ ଟେଲିଭିଜନରେ ମୁକ୍ତିଲାଭ କରିବ । ଅଫ୍ସ୍କ୍ରିନ୍ରେ ଆକାଶ ଓ ତମନ୍ନାଙ୍କ ଅଭିନୟ ସାଙ୍ଗକୁ ଯୋଡ଼ି ଖୁବ୍ ଜମିଛି । ଅନ୍ସ୍କ୍ରିନ୍ରେ ମଧ୍ୟ ଦର୍ଶକଙ୍କୁ ପସନ୍ଦ ଆସିବ । ସବୁବେଳେ କିଛି ସମାନ ଯୋଡ଼ିଙ୍କୁ ପରଦାରେ ଦେଖି ଆସୁଥିବା ସିନେପ୍ରେମୀ ଏଥର କିଛି ନୂଆ ଦେଖିବେ ବୋଲି କହିଛନ୍ତି ସିନେମାର ନିର୍ଦ୍ଦେଶକ ଅଶ୍ୱିନୀ ତ୍ରିପାଠୀ । ପରସ୍ପର କାମ କରିବା ସହ ନିଜ ନିଜ ଚରିତ୍ରକୁ ନେଇ ନାୟକ-ନାୟିକା ବହୁତ ଖୁସି ଅଛନ୍ତି । ଏବେ ଉତ୍ସାହର ସହ ସେମାନେ ସିନେମା ରିଲିଜ୍କୁ ଅପେକ୍ଷା କରିଛନ୍ତି ।
ସିନେମାରେ ଅନ୍ୟମାନଙ୍କ ମଧ୍ୟରେ ସମରେଶ, ପିଣ୍ଟୁ ନନ୍ଦ, ଈଲୁ ବାନାର୍ଜୀଙ୍କ ଭଳି ଅନେକ ପରିଚିତ କଳାକାର ଅଭିନୟ କରିଛନ୍ତି । ପ୍ରଯୋଜନା କ୍ଷୀରୋଦ ପଟ୍ଟନାୟକ କରିଥିଲା ବେଳେ ସଂଳାପ ଦୀପକ କୁମାର, ସଙ୍ଗୀତ ଗୁଡଲି ରଥ, ଡିଓପି ଅକ୍ଷୟ କୁମାର ନାୟକ, କୋରିଓଗ୍ରାଫିରେ ଲୁବୁନ-ଟୁବନ ଏବଂ ଏଡିଟିଂରେ ମାନସ କୁମାର ସାହୁ ସହାୟତା କରିଛନ୍ତି ।