ଜୟପୁର,୨୬/୦୧: ରାଜସ୍ଥାନର ଦୌସା ଜିଲ୍ଲାରେ ଗୋଟିଏ ପରିବାରର ୪ ଜଣଙ୍କୁ ଜଣେ ବ୍ୟକ୍ତି ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଦୁଷ୍କର୍ମର ଶିକାର ହୋଇଥିବା ପୀଡ଼ିତାଙ୍କ ମଧ୍ୟରେ ଜଣେ ନାବାଳିକା ଅଛନ୍ତି । ଦୌସାରେ ଢାବା ଚଳାଉଥିବା ବିଷ୍ଣୁ ଗୁର୍ଜର ନାମକ ଜଣେ ବ୍ୟକ୍ତି ଏଭଳି ଜଘନ୍ୟ କାଣ୍ଡ ଘଟାଇଛି । ତାକୁ ଗିରଫ କରାଯାଇଛି ।
ଥାନା ସୂତ୍ରରୁ ଜଣାପଡ଼ିଛି ଯେ ବିଷ୍ଣୁ ଗୁର୍ଜର ପ୍ରଥମେ ଉକ୍ତ ପରିବାରର ଜଣେ ମହିଳାଙ୍କୁ ବର୍ଷେ ପର୍ଯ୍ୟନ୍ତ ଦୁଷ୍କର୍ମ କରିଥିଲା । ପରେ ବିଷ୍ଣୁ ପରିବାରର ଅନ୍ୟ ସଦସ୍ୟାଙ୍କୁ ଜାଲରେ ଫସାଇବାକୁ ଚେଷ୍ଟା କରୁଥିବା ନେଇ ପୀଡ଼ିତା ଜାଣିବା ପରେ ପୁଲିସରେ ଏତଲା ଦେଇଥିଲେ । କିନ୍ତୁ ଏହି ଏତଲା ପରେ ଅନ୍ୟମାନେ ଥାନାର ଦ୍ୱାରସ୍ଥ ହୋଇଥିଲେ । ସେମାନେ ମଧ୍ୟ ବିଷ୍ଣୁ ଦ୍ୱାରା ଦୁଷ୍କର୍ମ ଶିକାର ହୋଇଥିବା ଅଭିଯୋଗରେ ଦର୍ଶାଇଥିଲେ । ପ୍ରଥମ ଏତଲା ଚଳିତମାସ ୨୧ରେ ହୋଇଥିବା ବେଳେ ଗତ ୨୩ ଓ ୨୪ରେ ଆଉ ଦୁଇଟି ମାମଲା ହୋଇଛି । ପ୍ରଥମ ଅଭିଯୋଗକାରିଣୀଙ୍କ ଦୁଇ ସାନ ଭଉଣୀ ଓ ନାବାଳିକା ଝିଅ ଦୁଷ୍କର୍ମ ଶିକାର ହୋଇଥିବା ଅଭିଯୋଗରୁ ଜଣାପଡ଼ିଛି ।