ଗୋଟେ ପୁଅ ବଡ ଅଫିସର ଆଉ ଜଣେ ନେତା, ହେଲେ ମା’ ରାସ୍ତାରେ ପଡି ମୁଣ୍ଡରେ ଲାଗିଯାଇଥିଲା ପୋକ

ଭଟିଣ୍ଡା,୧୯।୮: ୮୦ ବ​‌ର୍ଷର ଜଣେ ମହିଳା ରାସ୍ତାକଡରେ ପଡିରହିଛନ୍ତି। ମହିଳାଙ୍କ ମୁଣ୍ଡରେ  ପୋକ ମଧ୍ୟ ଲାଗିଯାଇଛନ୍ତି। ଏଭଳି ଏକ ହୃଦୟ ବିଦାରକ ଘଟଣା ପଞ୍ଜାବର ଭଟିଣ୍ଡାରେ ଦେଖିବାକୁ ମିଳିଛି।  ଏଭଳି ଜଣେ ମା’ର ଅତି ଦୟନୀୟ ଅବସ୍ଥା ଦେଖି ଭାବିବେ ତାଙ୍କର ବୋଧହୁଏ କେହି ନିଜ ଲୋକ ନଥିବେ। ତେବେ ବାସ୍ତବିକ୍ କଥାଟା କିନ୍ତୁ ସମ୍ପୂର୍ଣ୍ଣ ଭିନ୍ନ। କାରଣ ଏହି ବୁଢି ମା’ ଜଣଙ୍କର ଅଛନ୍ତି ଦୁଇ ପୁଅ। ଜଣେ ପୁଅ ବଡ ଅଫିସର ହୋଇଥିବା ବେଳେ ଆଉ ଜଣେ ନେତା।

ଅସୁସ୍ଥ ମହିଳା ଜଣକୁ ଏନଜିଓ ଓ ପୋଲିସ ସହାୟତାରେ ଲୋକମାନେ ହସ୍ପିଟାଲରେ ଭର୍ତ୍ତି କରାଇଥିଲେ। ଯେତେବେଳେ ତାଙ୍କର ପରିବାର ବିଷୟରେ ବୁଝାଯାଇଥିଲା ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। ମହିଳା ଜଣଙ୍କର ପରିବାର ଖୁବ୍ ସ୍ବଚ୍ଛଳ ପରିବାରର। ତାଙ୍କର ବଡ ପୁଅ ଜଣେ ସରକାରୀ ଅଧିକାରୀ ଓ ସାନ ପୁଅ ରାଜନେତା। ମୁକ୍ତସର ଗାଁ ଆଡକୁ ଯାଉଥିବା ସଡକ ନିକଟରୁ ଏକ ଖୋଲା ପଡିଆରେ ମହିଳାଙ୍କୁ ଉଦ୍ଧାର କରାଯାଇଥିଲା। ତାଙ୍କର ମୁଣ୍ଡରେ ପୋକ ଲାଗିଯାଇଥିବା ବେଳେ ଶାରୀରିକ ଅବସ୍ଥା ଖୁବ୍ ଖରାପ ଥିଲା। ଯେତେବେଳେ ଲୋକମାନେ ମହିଳାଙ୍କୁ ଏହି ଅବସ୍ଥାରେ ଦେଖିଥିଲେ ତାଙ୍କୁ ତୁରନ୍ତ ଏନଜିଓ ଓ ପୋଲିସକୁ ମାମଲାର ସୂଚନା ଦେଇଥିଲେ।

ବୟସ୍କ ମହିଳାଙ୍କ ସୂଚନା ମିଳିବା ପରେ ଏନଜିଓ ଓ ପୋଲିସ ସେଠାରେ ପହଁଞ୍ଚିଥି ମହିଳାଙ୍କୁ ତୁରନ୍ତ ସିଭିଲ ହସ୍ପିଟାଲରେ ଭର୍ତ୍ତି କରାଇଥିଲେ। ଲୋକଙ୍କ କହିବା ଅନୁସାରେ, ମହିଳାଙ୍କୁ ଅନେକ ସମୟ ପର୍ଯ୍ୟନ୍ତ ରାସ୍ତା କଡରେ ଖାଲି ପଡିଆରେ ଇଟାର ଏକ ଝୁମ୍ପୁଡି ଘରେ ଥିବାର ଦେଖିବାକୁ ମିଳିଥିଲା। ତାଙ୍କର ଏଭଳି ଅବସ୍ଥା ଦେଖି ଉଦ୍ଧାରକାରୀ ଦଳଙ୍କ ଆଖି ଲୁହ ଭରିଯାଇଥିଲା।

ମହିଳାଙ୍କର ପରିବାର ବିଷୟରେ ଯେତେବେ​‌ଳେ ଯାଞ୍ଚ କରାଯାଇଥିଲା,ଜଣାପଡିଥିଲା ତାଙ୍କର ଦୁଇ ପୁଅ ଖୁବ୍ ଆର୍ଥିକ ସ୍ବଚ୍ଛଳ। ବଡ ପୁଅ ସରକାରୀ ଅଧିକାରୀ ସାନ ପୁଅ ସେଠାର ଜଣେ ନେତା। ଏପରିକି ନାତୁଣୀ ମଧ୍ୟ ଜଣେ କ୍ଲାସ ଓ୍ବାନ ଅଫିସର। ଏହି ମାମଲାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାପରେ ମହିଳାଙ୍କ ପରିବାରକୁ ଲୋକମା​‌ନେ ଖବର ଦେଇଥିଲେ।

ଏହାପରେ ମହିଳାଙ୍କର ଜଣେ ପୁଅ ନିଜ ସହିତ ମା’ଙ୍କୁ ଫରିଦାକୋଟ୍ ନେଇଯାଇଥିଲେ, କିନ୍ତୁ ସୋମବାର ସକାଳେ ତାଙ୍କର ମୃତ୍ୟୁ ହୋଇଯାଇଥିଲା। ଏହାପରେ ପରିବାର ଲୋକ ଚୁପଚାପ୍ ତାଙ୍କର ଅନ୍ତିମ ସଂସ୍କାର କରିଦେଇଥିଲେ। ମହିଳାଙ୍କ ନାତୁଣୀ ଜଣେ ପୋଲିସ ଅଧିକାରୀ ହୋଇଥିବାରୁ  ପୋଲିସ ଏନେଇ କିଛି କହିବାକୁ ପ୍ରସ୍ତୁତ ନାହିଁ କିମ୍ବା ମାମଲା ରୁଜୁ କରିନି। କେବଳ ସେତିକି ନୁହେଁ ମହିଳାଙ୍କ ପରିବାର ଲୋକ ମଧ୍ୟ ଏନେଇ ଚୁପ୍ ରହିଛନ୍ତି।

   ସମ୍ବନ୍ଧିତ ଖବର


ରାଜ୍ୟ ସରକାର ଜାରି କଲେ ଡିସେମ୍ବର ଗାଇଡଲାଇନ୍

Ola-Uber ଉପରେ ସରକାରଙ୍କ କଟକଣା, ଆଉ ନେଇ ପାରିବେନି ଅଧିକ ଭଡ଼ା

ଏବେ ବାହନ ପଞ୍ଜୀକରଣ ବେଳେ ନୋମିନିଙ୍କ ନାଁ ଦେବାକୁ ପଡିବ, କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରାଳୟର ପ୍ରସ୍ତାବ

PNB ଗ୍ରାହକଙ୍କ ପାଇଁ ଜରୁରୀ ସୂଚନା : ୧ ଡିସେମ୍ୱରରୁ ବଦଳିବ ଟଙ୍କା ଉଠାଇବାର ନିୟମ

ଚୀନ୍‌ର ଚୋରପଣ- କହିଲା ଭାରତରୁ ବ୍ୟାପିଛି କରୋନା ଭାଇରସ୍‌

ଚୀନ୍ ସୈନିକଙ୍କୁ ଜିନପିଙ୍ଗ୍‌ଙ୍କ ମନ୍ତ୍ର: ମୃତ୍ୟୁକୁ ଭୟ ନକରି ଯୁଦ୍ଧ ଜିତିବାର ପ୍ରସ୍ତୁତି କର