୧୧୯ ଜଣଙ୍କୁ ପଦ୍ମ ପୁରସ୍କାର : ଗାୟକ ଏସ୍.ପି ବାଲାସୁବ୍ରମଣ୍ୟମ(ମରଣୋତ୍ତର) ଏବଂ ଜାପାନର ପୂର୍ବତନ ପ୍ରଧାନମନ୍ତ୍ରୀ ସିନ୍ଜୋ ଆବେଙ୍କୁ ପଦ୍ମ ବିଭୂଷଣ
ନୂଆଦିଲ୍ଲୀ,୨୬/୦୧: କେନ୍ଦ୍ର ସରକାରଙ୍କ ପକ୍ଷରୁ ଚଳିତବର୍ଷ ପାଇଁ ପଦ୍ମ ପୁରସ୍କାର ଘୋଷଣା କରାଯାଇଛି । ଏଥର ମୋଟ ୧୧୯ ଜଣଙ୍କୁ ପଦ୍ମ ପୁରସ୍କାର ମିଳିବ । ସେଥିରେ ୭ ଜଣ ପଦ୍ମ ବିଭୂଷଣ, ୧୦ ଜଣ ପଦ୍ମ ଭୂଷଣ ଓ ୧୦୨ ଜଣ ପଦ୍ମଶ୍ରୀ ସମ୍ମାନ ପାଇବେ । ପଦ୍ମ ବିଭୂଷଣ ପାଇଁ ମନୋନୀତ ବ୍ୟକ୍ତିମାନଙ୍କ ମଧ୍ୟରେ ଅଛନ୍ତି ଜାପାନର ପୂର୍ବତନ ପ୍ରଧାନମନ୍ତ୍ରୀ ସିନ୍ଜୋ ଆବେ, ଗାୟକ ଏସ୍.ପି ବାଲାସୁବ୍ରମଣ୍ୟମ (ମରଣୋତ୍ତର), ହୃଦ୍ରୋଗ ବିଶେଷଜ୍ଞ ଡକ୍ଟର ବେଲେ ମୋନାପ୍ପା ହେଗ୍ଡେ, ଭାରତ-ଆମେରିକୀୟ ପଦାର୍ଥବିଜ୍ଞାନୀ ନରିନ୍ଦର ସିଂହ କାପାନୀ (ମରଣୋତ୍ତର), ଇସ୍ଲାମିକ ଶିକ୍ଷାବିତ୍ ମୌଲାନା ୱାହିଦୁଦ୍ଦିନ ଖାନ୍, ଭାରତୀୟ ପ୍ରତ୍ନତତ୍ତ୍ୱବିଦ୍ ବି.ବି. ଲାଲ୍ ଏବଂ ଓଡ଼ିଆ ଭାସ୍କର୍ଯ୍ୟ ଶିଳ୍ପୀ ସୁଦର୍ଶନ ସାହୁ ।
ହିଭଳି ପଦ୍ମ ଭୂଷଣ ପାଇବାକୁ ଥିବା ବ୍ୟକ୍ତିଙ୍କ ମଧ୍ୟରେ ଅଛନ୍ତି ପ୍ରଚ୍ଛଦପଟ୍ଟ ଗାୟିକା କେ.ଏସ୍. ଚିତ୍ରା, ଆସାମର ପୂର୍ବତନ ମୁଖ୍ୟମନ୍ତ୍ରୀ ତରୁଣ ଗୋଗୋଇ (ମରଣୋତ୍ତର), ବିଶିଷ୍ଟ ସାହିତ୍ୟିକ ଚନ୍ଦ୍ରଶେଖର କମ୍ବାର, ଲୋକସଭାର ପୂର୍ବତନ ବାଚସ୍ପତି ସୁମିତ୍ରା ମହାଜନ, ପୂର୍ବତନ ପ୍ରଶାସନିକ ଅଧିକାରୀ ନୃପେନ୍ଦ୍ର ମିଶ୍ର, ପୂର୍ବତନ କେନ୍ଦ୍ରମନ୍ତ୍ରୀ ରାମବିଳାସ ପାଶ୍ୱାନ (ମରଣୋତ୍ତର), ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ କେଶୁଭାଇ ପଟେଲ (ମରଣୋତ୍ତର), ଇସ୍ଲାମିକ ଶିକ୍ଷାବିତ୍ କାଲ୍ବେ ସାଦିକ୍ (ମରଣୋତ୍ତର), ବ୍ୟବସାୟୀ ରଜନିକାନ୍ତ ଦେବୀଦାସ ଶ୍ରଫ ଏବଂ ପୂର୍ବତନ ସାଂସଦ ତାରଲୋଚନ ସିଂହ ।
ପଦ୍ମଶ୍ରୀ ପାଇଁ ମନୋନୀତ ବ୍ୟକ୍ତିଙ୍କ ମଧ୍ୟରେ ଅଛନ୍ତି ଗୋଆର ପୂର୍ବତନ ରାଜ୍ୟପାଳ ମୃଦୁଳା ସିହ୍ନା, ବ୍ରିଟିଶ ଫିଲ୍ମ ନିର୍ଦ୍ଦେଶକ ପିଟର ବ୍ରୁକ୍, ବିଶିଷ୍ଟ ଲେଖକ ଫାଦର ଭାଲିସ୍ (ମରଣୋତ୍ତର), ଖ୍ୟାତନାମା ସାହିତ୍ୟିକ ପ୍ରଫେସର ଚମନଲାଲ ସାପ୍ରୁ (ମରଣୋତ୍ତର) । ଆସନ୍ତା ମାର୍ଚ୍ଚ-ଏପ୍ରିଲରେ ରାଷ୍ଟ୍ରପତି ଭବନରେ ଆୟୋଜିତ ଏକ ସମାରୋହରେ ରାଷ୍ଟ୍ରପତି ରାମନାଥ କୋବିନ୍ଦ ଏହି ପୁରସ୍କାର ପ୍ରଦାନ କରିବେ ।
