ଭୁବନେଶ୍ୱର,୧୮/୧୦: ପେଟ୍ରୋଲ ପମ୍ପରେ ଘଟିଥିବା ସାଂଘାତିକ ବିସ୍ଫୋରଣରେ ଏକାଧିକ ମୃତାହାତ ହେଲେ। ଶହ ଶହ ଲୋକଙ୍କ ଘର, ବାଇକ୍, କାର ଭାଙ୍ଗିଲା । କିନ୍ତୁ ଘଟଣାକୁ ୧୦ ଦିନ ବିତିବା ପରେ ବି କାର୍ଯ୍ୟାନୁଷ୍ଠାନ ଜିରୋ । ଏମିତିକି କାହାର ଚରମ ଅବେହଳା ଯୋଗୁଁ ବିସ୍ଫୋରଣ ଘଟିଲା, ତାହା ବି ସ୍ପଷ୍ଟ ହେଲାନି । କି ମୃତକଙ୍କୁ ନେଇ ନିର୍ଦ୍ଧିଷ୍ଟ ତଥ୍ୟ ଦିଆଯାଉନି । ପୁଲିସ ବି ଆଖିଦୃଶିଆ ତଦନ୍ତ କରୁନି । ଏଭଳି ଆଭିଯୋଗ ଆଣିଛନ୍ତି ଏକାଧିକ ସାମାଜିକ ସଂଗଠନ। ତୁରନ୍ତ ଅଘଟଣର ଏକ ବିଚାର ବିଭାଗୀୟ ତଦନ୍ତ କରିବାକୁ ଦାବି କରିଛନ୍ତି ।
ୟୁନିଟ୍-୯ସ୍ଥିତ ଲୋହିଆ ଏକାଡେମୀରେ ଅଲ୍ ଇଣ୍ଡିଆ ଫରୱାର୍ଡ ବ୍ଲକ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ଆୟୋଜିତ ହୋଇଥିଲା । ସମ୍ପାଦକ ଜ୍ୟୋତି ରଞ୍ଜନ ମହାପାତ୍ର ଅଭିଯୋଗ କରିଥିଲେ, କେନ୍ଦ୍ର ସରକାରଙ୍କ ଡାଇରେକ୍ଟର ଜେନେରାଲ ଅଫ୍ ଫେକ୍ଟୋରିଜ୍ ସେଫ୍ଟି ସଂସ୍ଥା ପକ୍ଷରୁ ଏଯାଏଁ ପ୍ରାଥମିକ ତଦନ୍ତ ହୋଇନାହିଁ । ରାଜ୍ୟ ସରକାରଙ୍କ ବିପର୍ଯ୍ୟୟ ପ୍ରସମନ ବିଭାଗ ମୃତାହତ କି କ୍ଷୟକ୍ଷତିର ଆକଳନ କରିନି ।
ସେ ଦାବି କରିଛନ୍ତି, ବିସ୍ଫୋରଣ ପଛର ପ୍ରକୃତ କାରଣ ଜାଣିବାକୁ ତୁରନ୍ତ ବିଚାର ବିଭାଗୀୟ ତଦନ୍ତ କରାଯାଉ। ଏହାଛଡ଼ା ମୃତକଙ୍କ ପରିବାରକୁ ଅତି କମ୍ରେ ୫୦ ଲକ୍ଷ ଟଙ୍କା କ୍ଷତିପୂରଣ ଦିଆଯାଉ । ସପ୍ତାହେ ମଧ୍ୟରେ ଏହି ଦାବି ସରକାର ନ ମାନିଲେ, ସାମାଜିକ ସଂଗଠନ ପକ୍ଷରୁ ଗଣଆନ୍ଦୋଳନ କରିବାକୁ ସଂଗଠନ ପକ୍ଷରୁ ଚେତାବନୀ ଦିଆଯାଇଛି।
