ପୁରୀ ୨୦/୦୫ : ଓଡିଶାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସୋମବାର ସକାଳୁ ସକାଳୁ ବାୟୁସେନାର ସ୍ୱତନ୍ତ୍ର ହେଲିକପ୍ଟର ଯୋଗେ ପୁରୀରେ ପହଞ୍ଚିଛନ୍ତି । ଏହାପରେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିଛନ୍ତି । ଏହାପରେ ପୁରୀ ବଡ଼ଦାଣ୍ଡରେ ରୋଡ୍ ସୋ’ କରିବେ । ଏଥିପାଇଁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଛି ଜିଲ୍ଲା ପୁଲିସ୍ । ତାଳବଣିଆଠୁ ଆରମ୍ଭ କରି ସିଟି ରୋଡ୍, ଭିଭିଆଇପି ରୋଡ୍, ମେଡିକାଲ୍ ଛକ ଓ ସିଂହଦ୍ୱାର ପର୍ଯ୍ୟନ୍ତ ସୁରକ୍ଷା ବଳୟରେ ରଖାଯାଇଛି ।
ମୋଦି ସୋମବାର ସକାଳ ସାଢ଼େ ୭ଟା ସୁଦ୍ଧା ତାଳବଣିଆ ହେଲିପ୍ୟାଡ୍ରେ ସ୍ୱତନ୍ତ୍ର ହେଲିକପ୍ଟରରେ ଅବତରଣ କରିଥିଲେ । ସେଠାରୁ ସିଧାସଳଖ କାରକେଡ୍ ସିଟି ରୋଡ୍, ସୁଭାଷ ବୋଷ ଛକ ଓ ମେଡିକାଲ ଛକ ଦେଇ ସିଂହଦ୍ୱାରରେ ପହଞ୍ଚବା ପରେ ପ୍ରଥମେ ପ୍ରଧାନମନ୍ତ୍ରୀ ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ କରିବେ । ପାଖାପାଖି ୪୦ ମିନିଟ୍ ମନ୍ଦିର ପରିସରରେ ରହିବେ । ପ୍ରଧାନମନ୍ତ୍ରୀଙ୍କ ଶ୍ରୀମନ୍ଦିର ଗସ୍ତର ୧ ଘଣ୍ଟା ପୂର୍ବରୁ ସକାଳ ୬ଟାରୁ ୮ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ । ମହାପ୍ରଭୁଙ୍କ ଦର୍ଶନ ପରେ ପ୍ରଧାନମନ୍ତ୍ରୀଙ୍କ ରୋଡ୍ ସୋ’ ମରିଚିକୋଟ ଛକଠାରୁ ଆରମ୍ଭ ହେବ । ସକାଳ ୮ଟା ୧୫ରୁ ରୋଡ୍ ସୋ’ ଆରମ୍ଭ ହୋଇ ୯ଟାରେ ମେଡିକାଲ୍ ଛକରେ ଶେଷ ହେବ । ପରେ ପ୍ରଧାନମନ୍ତ୍ରୀ ପରବର୍ତ୍ତୀ କାର୍ଯ୍ୟସ୍ଥଳକୁ ଯିବାର କାର୍ଯ୍ୟକ୍ରମ ରହିଛି । ମୋଦିଙ୍କ ଗସ୍ତକୁ ଦୃଷ୍ଟିରେ ରଖି ୩ଜଣ ଏସ୍ପି, ୮ଜଣ ଅତିରିକ୍ତ ଏସ୍ପି, ୨୨ଜଣ ଡିଏସ୍ପି, ୪୨ଜଣ ଇନ୍ସପେକ୍ଟର, ୧୦୯ଜଣ ସବ୍ ଇନ୍ସପେକ୍ଟର, ୩୪ଜଣ ହାବିଲଦାର୍, ୨୦୨ଜଣ କନେଷ୍ଟବଳ, ୨୫୦ଜଣ ହୋମଗାର୍ଡଙ୍କ ସମେତ ୬୩ ପ୍ଲାଟୁନ୍ ଫୋର୍ସ ମୁତୟନ କରାଯାଇଛି।