କନ୍ୟାକୁମାରୀ,୧।୩:ତାମିଲନାଡୁର କନ୍ୟାକୁମାରୀରେ ପହଁଞ୍ଚିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୁଲଓ୍ବାମା ଆକ୍ରମଣ ଘଟଣାକୁ ଆଲୋଚନା କରି କହିଥିଲେ ବୀର ଯବାନଙ୍କୁ ମୋର ସଲାମ। ପୂର୍ବ ସରକାର ଆତଙ୍କବାଦ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିପାରିନଥିଲେ। କିନ୍ତୁ ଆମ ସରକାର ସେନାକୁ ଆତଙ୍କବାଦୀଙ୍କ ଠାରୁ ପ୍ରତିଶୋଧ ନେବା ପାଇଁ ଖୋଲାଖୋଲି ଭାବରେ ସ୍ବାଧୀନତା ଦେଇଛି। ମୋଦି ତାଙ୍କ ଭାଷଣର ଆରମ୍ଭ ବାୟୁସେନାର ଓ୍ବିଙ୍ଗ କମାଣ୍ଡର ଅଭିନନ୍ଦନଙ୍କ ପ୍ରଶଂସା କରି ଆରମ୍ଭ କରିଥିଲେ। ଅଭିନନ୍ଦନ ଭାରତ ଫେରିବା ପୂର୍ବରୁ ମୋଦି କହିଛନ୍ତି ସାରା ଦେଶକୁ ଗର୍ବ ଯେ ଅଭିନନ୍ଦନ ତାମିଲନାଡୁର। ଗତ କିଛି ଦିନ ହେବ ଯେଉଁ ଭଳି ଘଟଣା ଘଟିଛି ତାହା ଆମ ସେନାର ଶକ୍ତି ଓ କ୍ଷମତାକୁ ଦେଖାଉଛି ଏହା ଏକ ନୂତନ ଭାରତ। ବହୁ ସମୟ ହେବ ଭାରତ ଆତଙ୍କବାଦର ସାମନା କରୁଛି। ଏବେ ଆମେ ଆତଙ୍କବାଦକୁ ସହ୍ୟ କରିବୁ ନାହିଁ। ଦେଶର ଲୋକ ଚାହାଁନ୍ତି ଆତଙ୍କବାବୀଙ୍କୁ ଦଣ୍ଡ ମିଳିବା ଦରକାର। କିନ୍ତୁ ପୂର୍ବରୁ ଏଭଳି ହୋଇନଥିଲା। ୨୬/୧୧ ଆକ୍ରମଣ ପରେ ଏଭଳି ହୋଇନଥିଲା। ତେବେ ଉରି ଓ ପୁଲଓ୍ବାମା ଆକ୍ରମଣ ଘଟଣାର ଆମେ ପ୍ରତିଶୋଧ ନେଇଛୁ।
୨୦୦୪ ରୁ ୨୦୧୪ ପର୍ଯ୍ୟନ୍ତ ବହୁ ଆତଙ୍କବାଦୀ ଆକ୍ରମଣ ହୋଇଛି। ଜୟପୁର, ମୁମ୍ବାଇ, ପୁନେ, ହାଇଦ୍ରାବାଦ ଆଦି ବହୁ ସ୍ଥାନରେ ଆତଙ୍କବାଦୀ ଆକ୍ରମଣ ହୋଇଥିଲା କିନ୍ତୁ କେବେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲା। କିଛି ଲୋକ ଏଭଳି ଅଛନ୍ତି ଯେଉଁମାନଙ୍କର ବୟାନରେ ଭାରତର କ୍ଷତି ହେଉଛି ଓ ପାକିସ୍ତାନକୁ ଲାଭ ହେଉଚି। ସେମାନଙ୍କ ବୟାନ ପକିସ୍ତାନ ସଂସଦ ଓ ପାକିସ୍ତାନ ରେଡିଓରେ ଭାରି ଖୁସିରେ କୋଟ୍ କରାଯାଉଛି। ମୁଁ ସେମାନଙ୍କୁ ପଚାରିବାକୁ ଚାହେଁ ସେମାନେ ସେନାକୁ ସମର୍ଥନ କରୁଛନ୍ତି ନା ପାକିସ୍ତାନକୁ?
