PRAMEYA

Prameya News Portal, Prameya Daily, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • ଓମିକ୍ରନ୍ ଭୟ : ତାମିଲନାଡୁର ଏକ ସ୍କୁଲ୍‌ରେ କରୋନା ଆତଙ୍କ , ୨୫ ପିଲାଙ୍କୁ କୋଭିଡ୍‌ ପଜିଟିଭ୍
  • ||
  • ୨୯ ଦେଶକୁ ମାଡ଼ି ଗଲାଣି ଓମିକ୍ରନ୍ – ପ୍ରେସମିଟ୍‌ରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ସୂଚନା
  • ||
  • ଭାରତରେ ଓମିକ୍ରନ ,କର୍ଣ୍ଣାଟକରୁ ଚିହ୍ନଟ ହେଲେ ୨ ଓମିକ୍ରନ ଆକ୍ରାନ୍ତ , ପ୍ରେସ୍‌ମିଟ୍‌ରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ସୂଚନା
  • ||
  • ତେଲେଙ୍ଗାନାରେ ଚିହ୍ନଟ ହୋଇନି ଓମିକ୍ରନ , ଏ ନେଇ ଖବରକୁ ଖଣ୍ଡନ କଲା ତେଲେଙ୍ଗାନା ସ୍ୱାସ୍ଥ୍ୟ ବିଭାଗ । ବ୍ରିଟେନ୍‌ ଫେରନ୍ତା ମହିଳା କୋଭିଡ୍‌ ପଜିଟିଭ ଚିହ୍ନଟ
  • ||
  • ଭାରତରେ ପ୍ରଥମ ଓମିକ୍ରନ ଭାରିଆଣ୍ଟ ଚିହ୍ନଟ , ତେଲେଙ୍ଗାନାରୁ ଓମିକ୍ରନ୍‌ ଭାରିଆଣ୍ଟ ଆକ୍ରାନ୍ତ ଚିହ୍ନଟ , ଆକ୍ରାନ୍ତ ମହିଳାଙ୍କର ବୟସ ୩୫ ବର୍ଷ , ଇଂଲଣ୍ଡରୁ ଫେରିଥିଲେ ସଂପୃକ୍ତ ମହିଳା
  • ||
  • କଟକ: ଗାଡ଼ି ଟଣା ବେଳେ ଫାଇନାନ୍ସ କମ୍ପାନି କର୍ମଚାରୀ ଉପରକୁ ବ୍ଲାଙ୍କ ଫାଇରିଙ୍ଗ୍ ଘଟଣା, ଦୁଇ ଅଭିଯୁକ୍ତକୁ ଧରିବା ପାଇଁ କଟକ ପୋଲିସ ଟିମ୍ ଗଞ୍ଜାମରେ
  • ||
  • ଅମ୍ବାଦଳା: ୮ ଲକ୍ଷରୁ ଉର୍ଦ୍ଧ୍ବ ଟଙ୍କାର ଗଞ୍ଜେଇ ଜବତ, ବାଇକ ସହ ୩ ଗିରଫ
  • ||
  • ବ୍ରହ୍ମପୁର: ବିଶିଷ୍ଟ ସିପିଏମ୍ ନେତା ବସନ୍ତ ନନ୍ଦଙ୍କ ହୃଦଘାତରେ ବିୟୋଗ
  • ||
  • ରାୟଗଡା: ୩ ବର୍ଷ ଅଙ୍ଗନବାଡି ଚାକିରି କରିବା ପରେ ଚାକିରିରୁ ବାହାର କରାଯାଇଥିବା ଅଭିଯୋଗ
  • ||
  • କାଶୀପୁର: ହାତଗୁଞ୍ଜା ବିନା ଘୁଞ୍ଚୁନି ଫାଇଲ, ପ୍ରାପ୍ୟ ପାଇବାରେ ହଇରାଣ ଅବସର ଶିକ୍ଷକ
  • ||
  • ପାପଡାହାଣ୍ଡି: ମହୁ ମାଛି ଆକ୍ରମଣରେ ବୃଦ୍ଧ ଗୁରୁତର!
  • ||
  • ସୁନ୍ଦରଗଡ଼: କୋଇଡାରେ ଥମୁନି ହାତୀ ଉପଦ୍ରବ, ଘରେ ଶୋଇଥିବା ବେଳେ ଟାଣି ଦଳି ଦେଲା ଦନ୍ତା, ଘଟଣା ସ୍ଥଳରେ ବୃଦ୍ଧଙ୍କ ଉଡିଗଲା ପ୍ରାଣ ବାୟୁ
  • ||
  • ଭୁବନେଶ୍ୱର: ବିଧାନସଭାର ଶୀତକାଳୀନ ଅଧିବେଶର ଦ୍ବିତୀୟ ଦିନ, ଆରମ୍ଭରୁ ବିରୋଧୀଙ୍କ ହୋହଲ୍ଲା ଓ ହଟ୍ଟଗୋଳ, ୪ ଯାଏଁ ଗୃହ ମୁଲତବୀ
  • ||
  • ଭୁବନେଶ୍ୱର: ୧୨ ଘଣ୍ଟାରେ ଅବପାତ, ୨୪ ଘଣ୍ଟା ମଧ୍ୟରେ ବାତ୍ୟା ରପୂ ନେବ ସମ୍ଭାବନା
  • ||
  • ଭୁବନେଶ୍ୱର: ରାଜ୍ୟରେ ଆଉ ୨ ଜଣଙ୍କ ଜୀବନ ନେଲା କରୋନା, ମୃତ୍ୟୁ ସଂଖ୍ୟା ୮୪୧୫କୁ ବୃଦ୍ଧି
  • ||
  • ଭୁବନେଶ୍ଵର: ୨୪ ଘଣ୍ଟାରେ ୨୫୨ କୋଭିଡ୍ ପଜିଟିଭ୍ ଚିହ୍ନଟ, ଆକ୍ରାନ୍ତଙ୍କ ସଂଖ୍ୟା ୧୦୪୯୫୯୭ ଜଣକୁ ବୃଦ୍ଧି
  • ||
  • ନୂଆଦିଲ୍ଲୀ:୨୩ ରାଷ୍ଟ୍ରକୁ ବ୍ୟାପିଲା ଓମ୍ରିକନ୍, ଆନ୍ତର୍ଜାତିକ ବିମାନ ଉଡାଣ ସ୍ଥଗିତ
  • ||
  • ସୋର: ମନ୍ଦିରରୁ ଲକ୍ଷାଧିକ ଟଙ୍କାର ସୁନା ଓ ରୂପା ଗହଣା ଚୋରି
  • ||
  • କୋକସରା: ବିଦ୍ୟୁତ ସଂଯୋଗ ପାଇଁ ରାସ୍ତା ଅବରୋଧ କଲେ ଗ୍ରାମବାସୀ
  • ||
  • କନ୍ଧମାଳ: ପେଟ୍ରୋଲ ପମ୍ପକୁ ତେଲ ପକାଇବା ଆସିଥିବା ଗାଡ଼ିରୁ ମୋବାଇଲ ଚୋରି
  • ||

ଦିନକ ପରେ ଖଣ୍ଡଗିରି ମେଳା, ଲାଗିଲାଣି ଗହଳିଚହଳି

ଭୁବନେଶ୍ୱର,୧୦ା୨(ବ୍ୟୁରୋ): ପ୍ରସିଦ୍ଧ ଖଣ୍ଡଗିରି କୁମ୍ଭମେଳାକୁ ଆଉ ଦୁଇ ଦିନ ରହିଲା । ମେଳା ପାଇଁ ସମଗ୍ର ଖଣ୍ଡଗିରି ଅଞ୍ଚଳ ଉତ୍ସବମୁଖର ହୋଇ ଉଠିଛି । ଏବେଠୁ ଗହଳିଚହଳି ଲାଗିଲାଣି । ବାହାର ରାଜ୍ୟର ବେପାରୀମାନେ ଡେରା ପକାଇଲେଣି । ଅପେରା ପାର୍ଟିଗୁଡ଼ିକ ରାସ୍ତାକଡ଼ରେ ବ୍ୟାନର୍‌ ଟଙ୍ଗାଇବା ସହ ନିଜ ନିଜର ଟେଣ୍ଟ୍‌କୁ ଆକର୍ଷଣୀୟ କରି ଗଢ଼ି ତୋଳିବାରେ ଲାଗି ପଡ଼ିଛନ୍ତି । ସ୍ଥାନୀୟ ଅଞ୍ଚଳର ଦୋକାନୀମାନେ ନିଜ ନିଜର ଦୋକାନକୁ ସଜାଇ ସାରିଲେଣି । ସେହିପରି ମେଳାରେ ସାଧୁସନ୍ଥଙ୍କ ଭିଡ଼ ଜମିବ । ଦୂରଦୂରାନ୍ତରୁ ଆସିଥିବା ସାଧୁସନ୍ଥମାନେ ଏଠାରେ ଭଜନ କୀର୍ତ୍ତନ ଓ ଯଜ୍ଞ ଆରମ୍ଭ କରିବେ । ଏଥିପାଇଁ ସେମାନଙ୍କ ଚେଲା ଚାମୁଣ୍ଡାମାନେ ଆଗୁଆ ଆସି ସ୍ଥାନ ନିରୁପଣ କରି ସେଠାରେ ପ୍ରସ୍ତୁତି ଚଳାଇଛନ୍ତି । ଖଣ୍ଡଗିରିର ଅଧିଷ୍ଠାତ୍ରୀ ଦେବୀ ମା’ ବାରଭୂଜାଙ୍କ ନିକଟରେ ଅଖଣ୍ଡ ଦୀପ ଲାଗିବା ସହିତ ଗୁମ୍ଫା ସଲଗ୍ନ ଶ୍ରୀ ଶ୍ରୀ ହନୁମାନଜୀଙ୍କ ମନ୍ଦିର ପ୍ରାଙ୍ଗଣରେ ୯ ଦିନ ବ୍ୟାପୀ ଶ୍ରୀରାମଚରିତ ମାନସ ନବାହ୍ନ ପରାୟଣ ଓ ପ୍ରବଚନ ଆରମ୍ଭ ହେବ । ୯ ଦିନ ବ୍ୟାପୀ ଏଠାରେ ବିଶ୍ୱଶାନ୍ତି ଯଜ୍ଞ ମଧ୍ୟ ଅନୁଷ୍ଠିତ ହେବ । ଏଥିପାଇଁ ଏବେଠାରୁ ପ୍ରସ୍ତୁତି ଆରମ୍ଭ ହୋଇଗଲାଣି ।

ଡେରା ପକାଇଲେଣି ବେପାରୀ
ଖଣ୍ଡଗିରି ମେଳାକୁ ପ୍ରତ୍ୟେହ ଦେଶର କୋଣ ଅନୁକୋଣରୁ ଲକ୍ଷାଧିକ ପର୍ଯ୍ୟଟକ ଆସିବେ । ମେଳା ଉପଲକ୍ଷେ ମୀନାବଜାର ଠାରୁ ଆରମ୍ଭ କରି ସର୍କସପାର୍ଟି, ମନୋହରି ଦୋକାନ, ଜଳଖିଆ ଦୋକାନ, ବାଉଁଶ ତିଆରି ସାମଗ୍ରୀ, କାଠ ସାମଗ୍ରୀ, ମାଟିପାତ୍ର ଓ ବିଭିନ୍ନ ଅଞ୍ଚଳର କାରୀଗରି ଜିନିଷର ହାଟ ବସିବ । ଏଥିଲାଗି ବେପାରୀମାନେ ତତ୍ପର ହୋଇ ପଡ଼ିଲେଣି । ବିଏମ୍‌ସିରୁ ପିଣ୍ଡିମାନ କିଣି ଦୋକାନ ସଜାଇବା ଆରମ୍ଭ କରିଦେଲେଣି । ଯାଜପୁରର ବାସୁଦେବ ଏଣ୍ଟରପ୍ରାଇଜର୍ସ ପକ୍ଷରୁ ମୀନାବଜାର ପାଇଁ ସଜବାଜ ଆରମ୍ଭ କରି ସାରିଲାଣି । ଏଥର ଚକ୍ରି ଦୋଳି ସାଙ୍ଗକୁ ବ୍ରେକ୍‌ ଡ୍ୟାନ୍ସ, ପିଲାମାନଙ୍କ ପାଇଁ ଡ୍ରାଗନ୍‌ ଟ୍ରେନ୍‌, ଚାନ୍ଦ୍‌ତାରା, କୁନିକୁନି ପିଲାଙ୍କ ପାଇଁ ଘୋଡ଼ା ଓ କାର୍‌ ଚକ୍ରି ଖେଳ ଆଦିର ବନ୍ଦୋବସ୍ତ କରାଯାଇଛି । ସେହିପରି ଆଠଗଡ଼ର ବଳିଆ ବେହେରା ଓ ତାଙ୍କ ମା’ ବାଉଁଶ ତିଆରି କୁଲା, ଡାଲା, ବାଉଁଶିଆଠାରୁ ଆରମ୍ଭକରି ବିଞ୍ଛଣା ପର୍ଯ୍ୟନ୍ତ ସବୁକିଛି ଆଣି ଆସିଛନ୍ତି । ପ୍ରତିବର୍ଷ ମେଳାରୁ ସେ କିଛି ଲାଭ ପାଉଥିବା ବେଳେ ଚଳିତବର୍ଷ ଅଧିକ ଜିନିଷ ଆଣି ଆସିଥିବା କହିଛନ୍ତି । ଧୀରେଧୀରେ ବେପାରୀମାନେ ଏଠାରେ ଭିଡ଼ ଜମାଇବାରେ ଲାଗିଛନ୍ତି ।

ପିଣ୍ଡିରେ କଳାବଜାରୀ
ବିଏମ୍‌ସି ପକ୍ଷରୁ ଏଥର ମେଳାରେ ବ୍ୟବସାୟୀ ମାନଙ୍କଠାରୁ ପିଣ୍ଡି ପିଛା ୬ହଜାର ୫ଶହ ଟଙ୍କା ଲେଖାଏଁ ଆଦାୟ କରାଯାଇଛି । କିନ୍ତୁ ବିଏମ୍‌ସିର କିଛି ଅସାଧୁ କର୍ମଚାରୀ ଓ ସ୍ଥାନୀୟ ଅଞ୍ଚଳର କିଛି ଲୋକ ବିଏମ୍‌ସିରୁ ପିଣ୍ଡିମାନ କିଣି ବାହାରୁ ଆସିଥିବା ବ୍ୟବସାୟୀମାନଙ୍କୁ ଚଢ଼ା ଦରରେ ପିଣ୍ଡି ବିକୁଥିବା ଅଭିଯୋଗ ହୋଇଛି । ପିଣ୍ଡି ପିଛା ୧୨ ହଜାରରୁ ଆରମ୍ଭ କରି ୧୫ ହଜାର ଟଙ୍କା ଲେଖାଏଁ ବିକୁଛନ୍ତି । ଫଳରେ ମେଳାକୁ ରାଜ୍ୟ ବାହାରୁ ଆସିଥିବା ବ୍ୟବସାୟୀମାନେ ବାଧ୍ୟ ହୋଇ ଏହି ଦଲାଲ୍‌ଙ୍କ ଠାରୁ ଚଢ଼ା ଦରରେ ପିଣ୍ଡି କିଣିବାକୁ ବାଧ୍ୟ ହେଉଛନ୍ତି ।

ଯାହାଙ୍କ ମେଳା ତାଙ୍କୁ ଉପେକ୍ଷା
ଖଣ୍ଡଗିରି ମେଳା କହିଲେ ଠାକୁର ଅନନ୍ତ କେଶରୀ ଦେବଙ୍କ ଯାତ୍ରାକୁ ବୁଝାଇଥାଏ । ଠାକୁର ଅନନ୍ତ କେଶରୀ ଜାଗମରା ନାଗାମଠ ନିକଟରୁ ଶୋଭାଯାତ୍ରାରେ ଆସି ରାଣୀହଂସପୁରରେ ବିଜେ ହେବାପରେ ଏହି ମେଳା ଆରମ୍ଭ ହୋଇଥାଏ । ଏଥିପାଇଁ ଜାଗମରା ଗ୍ରାମ୍ୟ କମିଟି ସମସ୍ତ ପ୍ରକାର ପ୍ରସ୍ତୁତ କରି ସାରିଛି । ରାଜଧାନୀର ଏହି ବଡ଼ ମେଳାରୁ ବିଏମ୍‌ସି ପ୍ରାୟ ୫୦ ଲକ୍ଷରୁ ଅଧିକ ଟଙ୍କା ଆଦାୟ କରୁଛି । ସ୍ଥାନୀୟ ଦୋକାନୀଙ୍କ ଠାରୁ ଆରମ୍ଭ କରି ଉଠାଦୋକାନୀ, ଅପେରା ପେଣ୍ଡାଲ ଏପରିକି ରାସ୍ତାଘାଟକୁ ମଡ଼ାଇ ବିଏମ୍‌ସି ବ୍ୟବସାୟୀଙ୍କ ଠାରୁ ଟଙ୍କା ଆଦାୟ କରୁଛି । କିନ୍ତୁ ଯାହାଙ୍କ ପାଇଁ ଏହି ମେଳା ତାଙ୍କ ଶୋଭାଯାତ୍ରା ପାଇଁ ବିଏମ୍‌ସି ଉପେକ୍ଷା କରୁଥିବା ଅଭିଯୋଗ ହେଉଛି । ଠାକୁର ଅନନ୍ତ କେଶରୀଙ୍କ ଶୋଭାଯାତ୍ରା ପାଇଁ ୫ ଲକ୍ଷରୁ ଅଧିକ ଟଙ୍କା ଖର୍ଚ୍ଚ ହେଉଛି । ମାତ୍ର ବିଏମ୍‌ସି ଠାକୁରଙ୍କ ଶୋଭାଯାତ୍ରା ପାଇଁ ମାତ୍ର ୭୦ ହଜାର ଟଙ୍କା ଅନୁଦାନ ଦେଉଛି । ଗତବର୍ଷ ଗ୍ରାମ୍ୟ କମିଟି ପକ୍ଷରୁ ଅନୁଦାନ ଅର୍ଥ ବଢ଼ାଇବାକୁ ଦାବି ହେବାରୁ ବିଏମ୍‌ସି ଅନୁଦାନ ବଢ଼ାଇ ମାତ୍ର ୬୦ ହଜାର ଟଙ୍କା ଦେଇଥିଲା । ଚଳିତ ବର୍ଷ ୨ ଲକ୍ଷ ଟଙ୍କା ଦାବି ହୋଇଥିଲେ ମଧ୍ୟ ମାତ୍ର ୧୦ ହଜାର ବଢ଼ାଇ ଅନୁଦାନ ପରିମାଣକୁ ୭୦ ହଜାର ଟଙ୍କାକୁ ବୃଦ୍ଧି କରିଛି । ତେବେ ଯାହାଙ୍କ ମେଳାରୁ ବିଏମ୍‌ସି ଏତେ ଟଙ୍କା ଆଦାୟ କରୁଛି ତାଙ୍କ ଶୋଭାଯାତ୍ରାକୁ ବିଏମ୍‌ସି ଉପେକ୍ଷା କରୁଛି ବୋଲି ସ୍ଥାନୀୟ କର୍ପୋରେଟର ରଘୁନାଥ ମହାନ୍ତି ଅଭିଯୋଗ କରିଛନ୍ତି ।