ବାଲେଶ୍ୱର ୧୭/୧୨: ବାଲେଶ୍ୱର ସଦର ବ୍ଲକ ଜୟଦେବକସବା ପଞ୍ଚାୟତ ଅନ୍ତର୍ଗତ ନ’ ହଜାର ଲୁଣପାହି ଅଞ୍ଚଳରେ ବୁଧବାର ରାତିରେ ଆକାଶରୁ କୌଣସି ରକେଟ ଭଳି ଯାନର ଭଗ୍ନାବଶେଷ ଖସିଥିଲା। ଏହାକୁ ନେଇ ଲୋକେ ଆତଙ୍କିତ ହୋଇ ପଡ଼ିଥିଲେ।
ଗ୍ରାମବାସୀଙ୍କ ସୂଚନା ମୁତାବକ, ରାତି ପ୍ରାୟ ୮ଟାରେ ପ୍ରଚଣ୍ଡ ଶବ୍ଦ ହୋଇଥିଲା। ଶବ୍ଦ ଶୁଣି ଲୋକେ ତାଜୁବ୍ ହୋଇ ଯାଇଥିଲେ। ପରେ ଘଟଣାସ୍ଥଳକୁ ଦୌଡ଼ିଥିଲେ । ସେଠାରେ ଏହି ଭଗ୍ନାବଶେଷ ପଡ଼ିଥିବା ସେମାନେ ଦେଖିଥିଲେ। ଏଥିରେ କେହି ଆହତ ହୋଇନାହାନ୍ତି । ଭଗ୍ନାବଶେଷ କ୍ଷେପଣାସ୍ତ୍ରର ଭଗ୍ନାବଶେଷ ବୋଲି ସ୍ଥାନୀୟ ଲୋକେ କହୁଛନ୍ତି। ମାତ୍ର ଏନେଇ ଡିଆର୍ଡିଓ ପକ୍ଷରୁ କୌଣସି ସୂଚନା ମିଳିନି ।
ଏପଟେ ଚାନ୍ଦିପୁରସ୍ଥିତ ଆଇଟିଆର ପକ୍ଷରୁ ବୁଧବାର କ୍ଷେପଣାସ୍ତ୍ର ପୃଥ୍ୱୀ-୨ର ରାତ୍ରକାଳୀନ ବ୍ୟାବହାରିକ ପରୀକ୍ଷଣ କରାଯାଇଛି । ବୁଧବାର ରାତି ୭ଟା ୬ରେ ଆଇଟିଆର ୩ ନମ୍ବର ଲଞ୍ଚ ପ୍ୟାଡ୍ରୁ ଏକ ଚଳମାନ ଯାନରେ ଏହି ପରୀକ୍ଷଣ କରାଯାଇଥିଲା। ରକ୍ଷା ଅନୁସନ୍ଧାନ ଓ ବିକାଶ ସଙ୍ଗଠନ (ଡିଆରଡିଓ)ର ରାଡାର ଓ ଇଲେକ୍ଟ୍ରୋ ଅପ୍ଟିକାଲ ଟ୍ରାକିଂ ସିଷ୍ଟମ ଦ୍ୱାରା ଓଡ଼ିଶା ଉପକୂଳସ୍ଥ ଟେଲିମେଟ୍ରି ଷ୍ଟେସନ ସହାୟତାରେ କ୍ଷେପଣାସ୍ତ୍ରର ଗତିପଥ ଉପରେ ନଜର ରଖାଯାଇଥିଲା।
ସମ୍ପୂର୍ଣ୍ଣ ସ୍ୱଦେଶୀ ଜ୍ଞାନ କୌଶଳରେ ନିର୍ମିତ ଏହି କ୍ଷେପଣାସ୍ତ୍ରଟି ଭୂପୃଷ୍ଠରୁ ଭୂପୃଷ୍ଠକୁ ଉତ୍କ୍ଷେପଣ କରାଯାଇପାରିବ। ଏହାର ଲକ୍ଷ୍ୟଭେଦ କ୍ଷମତା ୩୫୦ କିମି। ପୃଥ୍ୱୀ-୨ କ୍ଷେପଣାସ୍ତ୍ର ୫୦୦ରୁ ୧୦୦୦ କିଗ୍ରା ଯାଏ ଯୁଦ୍ଧାସ୍ତ୍ର ବହନ କରି ପାରିବ। ଏହାର ଲମ୍ବ ୯ ମିଟର, ମୋଟେଇ ୧୧୦ ସେମି, ଓଜନ ୪.୬ ଟନ୍ ରହିଛି। କ୍ଷେପଣାସ୍ତ୍ରକୁ ୨୦୦୩ ମସିହାରୁ ଭାରତୀୟ ସେନାରେ ସାମିଲ କରାଯାଇଛି। ଡିଆର୍ଡିଓ ସହଯୋଗରେ ପ୍ରତିରକ୍ଷା ବାହିନୀର ଷ୍ଟ୍ରାଟେଜିକ୍ ଫୋର୍ସର କମାଣ୍ଡୋଙ୍କ ପକ୍ଷରୁ ନିୟମିତ ଏହାର ପରୀକ୍ଷଣ ହୋଇଥାଏ। ପୂର୍ବରୁ ଏହି କ୍ଷେପଣାସ୍ତ୍ରର ରାତିରେ ପରୀକ୍ଷଣ କରାଯାଇଥିଲା। ଗତବର୍ଷ ନଭେମ୍ବରରେ ଗୋଟିଏ ଦିନରେ କ୍ରମାଗତ ୨ଥର ସଫଳ ପରୀକ୍ଷଣ କରି ଚାନ୍ଦିପୁର ଆଇଟିଆର୍ ବିରଳ ଇତିହାସ ରଚିଥିଲା। ଚଳିତ ବର୍ଷ ସେପ୍ଟେମ୍ବର ୨୩ରେ ମଧ୍ୟ ଚାନ୍ଦିପୁରରୁ ସଫଳତାର ସହ ପୃଥ୍ୱୀ-୨ର ପରୀକ୍ଷଣ କରାଯାଇଥିଲା।