ବରଗଡ଼ରେ କେନ୍ଦ୍ର ଓ ରାଜ୍ୟ ଉପରେ ବର୍ଷିଲେ ରାହୁଲ: କଂଗ୍ରେସ ଯାହା କହେ, କରେ

ଭୁବନେଶ୍ୱର/ବରଗଡ଼,୧୫ା୩(ବ୍ୟୁରୋ/ଆପ୍ର): କଂଗ୍ରେସ କ୍ଷମତାକୁ ଆସିଲେ ଓଡ଼ିଶାରେ ଛତିଶଗଡ଼ ଭଳି ଉନ୍ନତି ହେବ । ସେଠାରେ ଯେମିତି କୃଷି ଋଣ ଛାଡ଼ ହୋଇଛି, ସେମିତି ଓଡ଼ିଶାରେ ମଧ୍ୟ କୃଷି ଋଣ ଛାଡ଼ କରାଯିବ । ଛତିଶଗଡ଼ ଭଳି ଧାନର ସର୍ବନିମ୍ନ ସହାୟକ ମୂଲ୍ୟ ୨୬ଶହ ଟଙ୍କାକୁ ବଢ଼ିବ ବୋଲି କଂଗ୍ରେସ ମୁଖିଆ ରାହୁଲ ଗାନ୍ଧୀ କହିଛନ୍ତି । ତେବେ ରାଜ୍ୟରେ ବିଜେଡି ଓ କେନ୍ଦ୍ରରେ ବିଜେପି ସରକାର ପାଇଁ ଓଡ଼ିଶାର ଉନ୍ନତି ହୋଇପାରିନାହିଁ ବୋଲି କହି ରାହୁଲ ଉଭୟ ରାଜ୍ୟ ଓ କେନ୍ଦ୍ର ଉପରେ ବର୍ଷିଛନ୍ତି ।
ବରଗଡ଼ଠାରେ ଶୁକ୍ରବାର ଅପରାହ୍ଣରେ ଆୟୋଜିତ ପରିବର୍ତ୍ତନ ସଂକଳ୍ପ ସମାବେଶରେ ଉଦ୍‌ବୋଧନ ଦେଇ ରାହୁଲ କହିଛନ୍ତି, କଂଗ୍ରେସ ଦେଶକୁ ଯୋଡ଼ିବାକୁ ଚେଷ୍ଟା କରୁଛି । ପ୍ରତି ଗ୍ରାମକୁ ସହର ସହିତ, ସହରକୁ ରାଜ୍ୟ ରାଜଧାନୀ ଏବଂ ଦେଶର ରାଜଧାନୀ ସହିତ ଯୋଡ଼ିବାର ପ୍ରଚେଷ୍ଟା ଜାରି ରଖିଛି । ଅନ୍ୟପକ୍ଷରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ଭାରତୀୟ ଜନତା ପାର୍ଟି ସରକାର ଦେଶକୁ ଜାତି, ଧର୍ମ ନାମରେ ବିଭାଜନ କରିବାର ଅପଚେଷ୍ଟା କରୁଛନ୍ତି ବୋଲି ରାହୁଲ କହିଛନ୍ତି । କଂଗ୍ରେସ ଯାହା କହେ, କରେ ।
ସେହିପରି ରାହୁଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ବିଭିନ୍ନ ପ୍ରସଙ୍ଗରେ ତୀବ୍ର ସମାଲୋଚନା କରି କହିଲେ, ଏକଦା ବରଗଡ଼କୁ ଓଡ଼ିଶାର ଭାତହାଣ୍ଡି ବୋଲି କୁହାଯାଉଥିଲା । ଏବେ କିନ୍ତୁ ଏଠି ଚାଷୀ ଆତ୍ମହତ୍ୟା କରୁଛି । ଏମିତି ଗୋଟିଏ ଦିନ ନାହିଁ, ଯେଉଁ ଦିନ ଓଡ଼ିଶା କିମ୍ୱା ଭାରତର କୌଣସି ସ୍ଥାନରେ ଚାଷୀ ଆତ୍ମହତ୍ୟା କରୁନାହାନ୍ତି । ନବୀନ କ୍ଷମତାକୁ ଆସିବା ପୂର୍ବରୁ ଓଡ଼ିଶାରେ ଶୀତଳଭଣ୍ଡାର ସ୍ଥାପନ, ସମସ୍ତଙ୍କୁ ପିଇବା ପାଣି ଯୋଗାଣ ଆଦି ପାଇଁ ପ୍ରତିଶ୍ରୁତି ଦେଇଥିଲେ । ତାହା ପୂରଣ କରାଗଲା ନାହିଁ । ନବୀନ ପ୍ରତିବର୍ଷ ଓଡ଼ିଶାରେ ୨ ଲକ୍ଷ ଯୁବକ ଯୁବତୀଙ୍କୁ ନିଯୁକ୍ତି ଦେବାର ପ୍ରତିଶ୍ରୁତି ଦେଇଥିଲେ । କିନ୍ତୁ ଏବେ ଓଡ଼ିଶା ବେରୋଜଗାରୀର କେନ୍ଦ୍ରସ୍ଥଳ ପାଲଟିଛି । ଓଡ଼ିଶାର ଯୁବକ ଦାଦନ ଖଟିବାକୁ ଅନ୍ୟ ରାଜ୍ୟକୁ ଯାଉଛନ୍ତି । ସେହିପରି ନରେନ୍ଦ୍ର ମୋଦି ତାଙ୍କ ଭାଷଣରେ କୃଷକଙ୍କ କଥା କହୁଛନ୍ତି । ଅଥଚ ସେ କୃଷକଙ୍କ ପାଇଁ କିଛି କରୁନାହାନ୍ତି । ବରଂ ଦେଶର ୧୫-୨୦ ଜଣ ସବୁଠାରୁ ଧନୀ ବ୍ୟକ୍ତିଙ୍କର ୩.୫ ଲକ୍ଷ କୋଟି ଟଙ୍କା ଋଣ ଛାଡ଼ କରିଛନ୍ତି ।
ଅପରପକ୍ଷେ କଂଗ୍ରେସ ଛତିଶଗଡ଼, ରାଜସ୍ଥାନ, ମଧ୍ୟପ୍ରଦେଶରେ ନିର୍ବାଚନ ପୂର୍ବରୁ କୃଷିଋଣ ଛାଡ, ଧାନର ସହାୟକ ମୂଲ୍ୟ ବୃଦ୍ଧି ଏବଂ ଆଦିବାସୀ, କୃଷକଙ୍କ ଜମି ଅଧିକାରକୁ ସୁରକ୍ଷିତ ରଖିବାର ତିନିଟି ପ୍ରତିଶ୍ରୁତି ଦେଇଥିଲା । ଯାହାକୁ ଅକ୍ଷରେ ଅକ୍ଷରେ ପାଳନ କରିଛନ୍ତି । ଅଥଚ ପ୍ରଧାନମନ୍ତ୍ରୀ ଲୋକସଭା ଏବଂ ରାଜ୍ୟସଭାରେ ତିନିଥର ଜମି ଅଧିଗ୍ରହଣ ବିଲ୍‌କୁ ରଦ୍ଦ କରିବା ଏବଂ ସେଥିରେ ପରିବର୍ତ୍ତନ କରିବାକୁ ଚେଷ୍ଟା କରିଛନ୍ତି ।
ତେବେ ରାହୁଲ କେବେ ଲୋକଙ୍କ ବ୍ୟାଙ୍କ ଆକାଉଣ୍ଟରେ ୧୫ ଲକ୍ଷ ଟଙ୍କା ଜମାକରିବା କିମ୍ବା ବର୍ଷକୁ ୨ କୋଟି ନିଯୁକ୍ତି ଦେବାର ମିଛ ପ୍ରତିଶ୍ରୁତି ଦେଇନାହାନ୍ତି ବୋଲି ଜୋର୍‌ ଦେଇ କହିଛନ୍ତି । କଂଗ୍ରେସ ଯାହା କହିବ, ତାହାକୁ କାର୍ଯ୍ୟକାରୀ କରିବ ବୋଲି ଯୁକ୍ତି ଦର୍ଶାଇଥିଲେ । ସେ କହିଲେ, ମୋଦି ନିଜକୁ ଦେଶର ଚୌକିଦାର ବୋଲି କହୁଛନ୍ତି । କିନ୍ତୁ ରାଫେଲ୍‌ ଚୁକ୍ତିରେ ସେ ବିରାଟ ଦୁର୍ନୀତି କରିଛନ୍ତି । ଓଡ଼ିଶାର ଶିକ୍ଷା, ସ୍ୱାସ୍ଥ୍ୟ ଅବସ୍ଥା ଅତ୍ୟନ୍ତ ଖରାପ ସ୍ଥିତିରେ ରହିଥିବାବଳେ ବିଜେଡି ଓ ବିଜେପି ଏହି ଦୁଇ କ୍ଷେତ୍ରର ଘରୋଇକରଣକୁ ପ୍ରୋତ୍ସାହିତ କରୁଥିବା ରାହୁଳ ଅଭିଯୋଗ କରିଛନ୍ତି । କଂଗ୍ରେସ କ୍ଷମତାକୁ ଆସିଲେ ସର୍ବନିମ୍ନ ଖର୍ଚ୍ଚରେ ଉଚ୍ଚଶିକ୍ଷା ସହିତ ସ୍ୱାସ୍ଥ୍ୟ ଅଧିକାର ପ୍ରଦାନ କରାଯିବ । ଓଡ଼ିଶାକୁ ୫/୬ ଜଣ ଅଫିସର ଚଳାଉଥିବାବଳେ ନବୀନ ମୋଦିଙ୍କ ରିମୋଟ କଣ୍ଟ୍ରୋଲ୍‌ରେ ପରିଚାଳିତ ହେଉଛନ୍ତି । ଗବର ସିଂ ଟାକ୍ସ (ଜିଏସ୍‌ଟି) କାର୍ଯ୍ୟକାରୀ କରି ମୋଦି ସରକାର କୋଟିକୋଟି ଲୋକଙ୍କର ଦାନାପାଣି ଛଡାଇନେଲେ । କଂଗ୍ରେସ କ୍ଷମତାକୁ ଆସିଲେ ଜିଏସ୍‌ଟିରେ ସଂସ୍କାର ଆଣିବ । ଓଡ଼ିଶାରେ ୫ ହଜାର କୋଟି ଟଙ୍କାର ଚିଟ୍‌ଫଣ୍ଡ୍‌ ଦୁର୍ନୀତି ଏବଂ ୫୦ ହଜାର କୋଟି ଟଙ୍କାର ଖଣି ଦୁର୍ନୀତି ହୋଇଛି । କଂଗ୍ରେସ ସରକାର ଗଠନ କଲେ ଏ ବାବଦରେ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ରାହୁଲ ପ୍ରତିଶ୍ରୁତି ଦେଇଛନ୍ତି ।
ଏହି ଅବସରରେ ଓଡ଼ିଶା ପ୍ରଦେଶ କଂଗ୍ରେସ କମିଟି ସଭାପତି ନିରଞ୍ଜନ ପଟ୍ଟନାୟକ ଉଦ୍‌ବୋଧନ ଦେଇ କହିଲେ, ରାଜ୍ୟ ମୁଖ୍ୟମନ୍ତ୍ରୀ ଗତ ୧୮ ବର୍ଷ ମଧ୍ୟରେ ଚାଷୀଙ୍କ ପାଇଁ ଟଙ୍କାଟିଏ ଦେଇନାହାନ୍ତି । ଅଥଚ ନିର୍ବାଚନ ପୂର୍ବରୁ ଚାଷୀଙ୍କ ନାଁରେ ‘କାଳିଆ’ ଯୋଜନା କରି ଲୋକଙ୍କ ଆକାଉଣ୍ଟ୍‌କୁ ଟଙ୍କା ପଠାଉଛନ୍ତି । ବରଗଡ ଅଞ୍ଚଳରେ ୪୧ଜଣ ଚାଷୀ ଆତ୍ମହତ୍ୟା କରିଥିବା ସେ ପ୍ରକାଶ କରିଥିଲେ । କଂଗ୍ରେସ କ୍ଷମତାକୁ ଆସିଲେ ଚାଷୀଙ୍କ ଋଣଛାଡ ସହିତ ସେମାନଙ୍କୁ ସୌରଶକ୍ତିଚାଳିତ ପମ୍ପସେଟ୍‌ ପ୍ରଦାନ ଏବଂ ୫ବର୍ଷ ପର୍ଯ୍ୟନ୍ତ ଆର୍ଥିକ ସହାୟତା ଦିଆଯିବ ବୋଲି ନିରଞ୍ଜନ କହିଥିଲେ । ରାଜ୍ୟରେ ଶୀତଳଭଣ୍ଡାର ଏବଂ ଖାଦ୍ୟ ପ୍ରକ୍ରିୟାକରଣ ଶିଳ୍ପ ସ୍ଥାପନ ସହିତ ନିଯୁକ୍ତି କ୍ଷେତ୍ରରେ ମହିଳାଙ୍କ ପାଇଁ ୩୩ ପ୍ରତିଶତ ସ୍ଥାନ ସଂରକ୍ଷଣ କରିବାକୁ ରାହୁଳ ଗାନ୍ଧୀ ପ୍ରତିଶ୍ରୁତି ଦେଇଥିବା ସେ କହିଥିଲେ । ଏଥିସହିତ ମହିଳାଙ୍କ ପାଇଁ ସ୍ୱତନ୍ତ୍ର ଭାବେ ଫାଇନାନ୍ସ କମିଶନ ଏବଂ ବେକାର ଯୁବଗୋଷ୍ଠୀଙ୍କ ପାଇଁ ମାସିକ ସର୍ବନିମ୍ନ ଆୟ ଗ୍ୟାରେଣ୍ଟି ଦିଆଯିବା ସହିତ ବରବଡ ଅଞ୍ଚଳରେ ସୁପର ସ୍ପେଶାଲିଟି କ୍ୟାନସର୍‌ ଚିକିତ୍ସା ହସପିଟାଲ୍‌ ସ୍ଥାପନ କରାଯିବ ବୋଲି ନିରଞ୍ଜନ ପ୍ରତିଶ୍ରୁତି ଦେଇଛନ୍ତି ।

   ସମ୍ବନ୍ଧିତ ଖବର


ଆଜି ୧୨ ଘଣ୍ଟିଆ ଅତାବିରା ବ୍ଲକ୍ ବନ୍ଦ : ଖୋଲିନି ଦୋକାନ ବଜାର, ଗାଡ଼ି ଚଳାଚଳ ବାଧାପ୍ରାପ୍ତ

ସୁନୀଲ ଗାଭାସ୍କରଙ୍କ ଟିପ୍ପଣୀକୁ ନେଇ କଡା ଜବାବ୍ ଦେଲେ ଅନୁଷ୍କା ଶର୍ମା, କହିଲେ ଏଭଳି

ଗଙ୍ଗା ନଦୀରୁ ମିଳିଲା ଦକ୍ଷିଣ ଆମେରିକାର ମାଛ, ବୈଜ୍ଞାନିକଙ୍କୁ ଘାରିଲା ଏହି ଭୟ

ରିୟାଙ୍କ ଉପରେ ସବୁ ଦୋଷ ଲଦିଲେ ରକୁଲ: କହିଲେ-ମୁଁ କେବେ ଡ୍ରଗ୍ସ ନେଇନି…

ବିହାର ନିର୍ବାଚନ : କରୋନା ସାଥିରେ ଚାଲିବ ମତଦାନ , ନିର୍ବାଚନ ଆୟୋଗ କରିବେ ସ୍ୱତନ୍ତ୍ର ବ୍ୟବସ୍ଥା

ପରଲୋକରେ ପ୍ରଖ୍ୟାତ କଣ୍ଠଶିଳ୍ପୀ ଏସପି ବାଲାସୁବ୍ରମଣ୍ୟମ, ଶୋକରେ ବୁଡିଲା ସାରା ଦେଶ