ନୂଆଦିଲ୍ଲୀ: ଭାରତୀୟ ଜନତା ପାର୍ଟୀର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡା ଆଜି (ଶୁକ୍ରବାର) ରାଜସ୍ଥାନ ବିଜେପିର ସମସ୍ତ ବରିଷ୍ଠ ନେତାଙ୍କୁ ଦିଲ୍ଲୀ ଡକାଇଛନ୍ତି । ଏହାକୁ ନେଇ ରାଜସ୍ଥାନରେ ରାଜନୈତିକ ପାଣିପାଗ ଉଷ୍ମ ହୋଇଛି । ଜେପି ନଡାଙ୍କୁ ଭେଟିବାକୁ ପ୍ରଦେଶ ଅଧ୍ୟକ୍ଷ ସତୀଶ ପୁନିଆ, ବିଧାୟକ ଦଳ ନେତା ଗୁଲାବଚନ୍ଦ କଟାରିଆ, ଏବଂ ରାଜେନ୍ଦ୍ର ରାଠୋର ଦିଲ୍ଲୀ ପହଞ୍ଚିଛନ୍ତି । ସବୁଠୁବଡ କଥା ହେଉଛି ରାଜସ୍ଥାନ ରାଜନୀତି ସହ ଜଡିତ ଏହି ବୈଠକକୁ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେଙ୍କୁ ଡକାଯାଇନାହିଁ । ହଠାତ୍ ଜେପି ନାଡାଙ୍କର ଏହି ନେତାଙ୍କ ଡାକରାକୁ ନେଇ ଅନେକ ପ୍ରକାରର କଳ୍ପନାଜଳ୍ପନା କରାଯାଉଛି । ଶେଷ ଥର ପାଇଁ ଯେତେବେଳେ ଏହି ଲୋକମାନେ ସାକ୍ଷାତ କରିବାକୁ ଯାଇଥିଲେ, ରାଜସ୍ଥାନରେ କଂଗ୍ରେସର ରାଜନୈତିକ ସଙ୍କଟ ଆରମ୍ଭ ହୋଇଥିଲା ।
ବର୍ତ୍ତମାନ ପୁଣି ଥରେ ସାକ୍ଷାତ କରିବାକୁ ଯାଇଛନ୍ତି, ତେବେ ସାଧାରଣ ଲୋକମାନେ ଆଲୋଚନା ଆରମ୍ଭ କରିଛନ୍ତି ଯେ ଜେପି ନାଡା ରାଜସ୍ଥାନର ଏହି ତିନିଜଣ ବରିଷ୍ଠ ନେତାଙ୍କୁ କାହିଁକି ଦିଲ୍ଲୀ ଡାକିଛନ୍ତି ? କୁହାଯାଉଛି ଯେ ଜେପି ନାଡାଙ୍କ ସହ ଏହି ସାକ୍ଷାତ ପରେ ରାଜ୍ୟ ରାଜନୀତିରେ କୌଣସି ବଡ ପରିବର୍ତ୍ତନ ହୋଇପାରେ । ତେବେ ରାଜ୍ୟ ସଭାପତି ସତୀଶ ପୁନିଆ କହିଛନ୍ତି ଯେ ଏହା ଏକ ସାଧାରଣ ବୈଠକ ଏବଂ ରାଜସ୍ଥାନରେ ବିଧାନସଭା ପାଇଁ ତିନିଟି ଉପ-ନିର୍ବାଚନ ଅନୁଷ୍ଠିତ ହେବଏହାର ପ୍ରସ୍ତୁତି ସମ୍ପର୍କରେ ଏହି ବୈଠକ ଡକାଯାଇଛି । କିନ୍ତୁ ଏହି ବୈଠକରେ ବସୁନ୍ଧରା ରାଜେଙ୍କୁ ଡକାଯାଇନଥିବା ସ୍ପଷ୍ଟ ହୋଇଛି । ଏଥିରୁ ସ୍ପଷ୍ଟ ହୋଇଛି ଯେ ରାଜସ୍ଥାନ ବିଜେପି ରାଜନୀତିରେ ବସୁନ୍ଧରା ରାଜେଙ୍କ ଦିନ ଅନ୍ତ ହୋଇଛି ।
ନିକଟରେ ବସୁନ୍ଧରା ରାଜେଙ୍କ ବିରୋଧୀ ନେତା ଘନଶ୍ୟାମ ତିୱାରୀ ବିଜେପିକୁ ଫେରିଥିଲେ । ବସୁନ୍ଧରା ରାଜେଙ୍କ ବିରୋଧ ଯୋଗୁଁ ଘନଶ୍ୟାମ ତିୱାରୀଙ୍କ ଦଳକୁ ଫେରିବା ସମ୍ଭବ ହେଉନଥିଲା । କିନ୍ତୁ ବର୍ତ୍ତମାନ ବିଶ୍ୱାସ କରାଯାଉଛି ଯେ ରାଜସ୍ଥାନ ରାଜନୀତିରେ ବସୁନ୍ଦରାଙ୍କ ବିରୋଧୀ ଶିବିର ଅଧିକ ଶକ୍ତିଶାଳୀ ହେଉଛି ଏବଂ ଘନଶ୍ୟାମ ତିୱାରୀଙ୍କ ପ୍ରତ୍ୟାବର୍ତ୍ତନ ଏହି ଆଡକୁ ଦର୍ଶାଉଛି ।