ପୁରୀ, ୨୦/୦୫: ଭୁଜ ତଳେ ମୋତେ ରଖ ମହାବାହୁ...,ବାହୁ ତଳେ ମୋତେ ରଖ...,ବିପୁଳ ଭୁଜ ବିସ୍ତାରି ଦେଲେ ଛାର... କି କରିପାରିବ ଦୁଃଖ ମହାବାହୁ... । ରଥଖଳା ପରିବେଶକୁ ଭାବଭକ୍ତି ଭରା କରୁଥିଲା ପଦ୍ମଶ୍ରୀ ସ୍ୱର୍ଗତ ପ୍ରଫୁଲ କରଙ୍କ ଏହି ଜଣାଶୁଣା ଭଜନ । ମହାପ୍ରଭୁଙ୍କ ପ୍ରତି ସେବା ଓ ସମର୍ପଣ ଭାବରେ ନିର୍ମାଣକାରୀଙ୍କ ରଥ ନିର୍ମାଣ ଦର୍ଶନାର୍ଥୀଙ୍କ ଭିତରେ ଭରୁଥିଲା ଅଦ୍ଭୁତ ଆକର୍ଷଣ । ବିଶ୍ୱକର୍ମାମାନେ ତୁମ୍ବରେ ବିନ୍ଧ ଖୋଦେଇ କରିବାରେ ଥିଲେ ନିମଗ୍ନ । କରତି ସେବକ ତୁମ୍ବକୁ ସାଇଜ୍ କରି କାଟୁଛନ୍ତି ।
ଭୋଇ ସେବକମାନେ ତୁମ୍ବ ଟେକାପକା କରିବାରେ ବ୍ୟସ୍ତ । ରଥ ଖଳାରେ ନିର୍ମାଣ କାର୍ଯ୍ୟ ପରିଚାଳନା ପାଇଁ ଜାଗ୍ରତ ରହିଥିଲେ ରଥ ଅମିନ । ଦୋଳବେଦି ଶାଳରେ ଚକ ପାଇଁ ଅରକଣ୍ଟା ଓ ପନ୍ଦାରି ତିଆରିରେ ବ୍ୟସ୍ତ ଥିଲେ କମାର ସେବକମାନେ । ରବିବାର କାର୍ଯ୍ୟ ଶେଷ ସୁଦ୍ଧା ରଥ ତ୍ରୟର ୩୩ ତୁମ୍ବରେ ୧୬ ଯୋଡ଼ା ବିନ୍ଧ ଓ ଅରକଣ୍ଟା ପାଇଁ ଅଗର ବିନ୍ଧ ସରିଛି । ତାଳଧ୍ୱଜର ତାଳଧ୍ୱଜ ରଥର ୧୪ ତୁମ୍ବରୁ ୧୧ଟି ତୁମ୍ବରେ ବିନ୍ଧ ସରିଛି । ସେହିଭଳି ଦର୍ପଦଳନ ରଥର ୧୨ଟି ତୁମ୍ବରୁ ୧୦ଟି ଓ ନନ୍ଦିଘୋଷ ରଥର ୧୬ଟି ଚକରୁ ୧୨ ଗୋଟିରେ ବିନ୍ଧ ନିର୍ମାଣ ସରିଛି । କରତି ସେବକମାନେ ବିନ୍ଧ ହୋଇଥିବା ତୁମ୍ବରେ ଘେର କଟା କାର୍ଯ୍ୟ ଜାରି ରଖିଛନ୍ତି । ରବିବାର ରଥ ନିର୍ମାଣ କାର୍ଯ୍ୟରେ ୧୨୮ ଜଣ ନିଯୋଜିତ ହୋଇଛନ୍ତି ।