ରଥଖଳା ହାଲ୍ଚାଲ୍… ପନ୍ଦାରି ଓ ବଳା ଅନୁକୂଳ, ନାହାକା ଚକ ଚାଲିଛି ପ୍ରସ୍ତୁତ, ପଇରେ ବିନ୍ଧ କାମ ଆରମ୍ଭ
ପୁରୀ, ୩୦/୦୫: ମହାପ୍ରଭୁଙ୍କ ଭଉଁରୀ ଉତ୍ସବରେ ଚକ-ଅଖ ଡେରା ହେବ । ଏହା ହେଉଛି ରଥ ନିର୍ମାଣ ପରମ୍ପରା । ଏଣୁ ଯୁଦ୍ଧକାଳୀନ ଭିତିରେ ଚାଲିଛି ଚକ ନିର୍ମାଣ । ଶନିବାର ରଥଖଳାରେ ରଥର ନାହାକା ଚକ ପ୍ରସ୍ତୁତ ହୋଇଛି । ବିଶ୍ୱକର୍ମାମାନେ ପନ୍ଦାରି ଓ ବଳା ଅନୁକୂଳ କରି ଚକରେ ଲଗାଇଛନ୍ତି । ବିଶ୍ୱକର୍ମା ପଇରେ ବିନ୍ଧ କରୁଛନ୍ତି । ଭୋଇସେବକ ବିଲେଇ ବାଡ଼ିଆ ପଦ୍ଧତିରେ ଅର ଓ ପଇକୁ ସଂଯୋଗ କରୁଛନ୍ତି । ଯନ୍ତାପଟାରେ ପଡ଼ି ସିଙ୍ଗଡ଼ା(ତୁମ୍ବ ସଂଯୁକ୍ତ ଅର)କୁ ପଇ ପିନ୍ଧା ଗଲାପରେ ଖୁସିଅର ଲାଗୁଛି । ପରେ କଳସା କରାଯାଇ ପଇକୁ ବାନେ୍ଧଣୀ କରି ଚକ ପ୍ରସ୍ତୁତ ହେଉଛି । ଚିରଟ ହୋଇ ଖଳାରେ ପହଞ୍ଚିଛି ଜଳଯନ୍ତ୍ର ଓ ଗୁଜ କାଠ ।
ରଥର ସୁରକ୍ଷା କବଚ ହେଉଛି ‘ଗୁଜ’ । ଗୁଜ ଖୁମ୍ବ ସ୍ୱରୁପ ରଥର କୋଣମାନଙ୍କରେ ସ୍ଥାପନ ହେବ । ତାଳଧ୍ୱଜ ଓ ନନ୍ଦିଘୋଷ ରଥରେ ୧୬ଟି ଲେଖାଏଁ ଓ ଦେବଦଳନ ରଥରେ ୧୨ଟି ଗୁଜ ଲାଗିଥାଏ । ଗୁଜରେ ସିଂହ ବିରାଳ ଖୋଦେଇ ଚାଲିଛି । ରଥର ଗୁଜ, କୁଡ଼ୁକା, ଜଳଯନ୍ତ୍ର ଆଦି କାମ ରୂପକାରଙ୍କର । ଜଳଯନ୍ତ୍ର ରଥରେ ସ୍ଥାପନ ହେଲେ ପାଶ୍ୱର୍ ଦେବଦେବୀମାନେ ବିଜେ ହେବେ । କୁଡ଼ୁକା ଦଣ୍ଡାକୁ ଦଣ୍ଡା ସଂଯୁକ୍ତ କରିବ । ଯନ୍ତାଗାଡ଼ରେ ପକାଇ ସିଙ୍ଗଡ଼ା ପ୍ରସ୍ତୁତ କରିବା ପରେ ଭୋଇସେବକମାନେ ରଥଖଳାକୁ ଯୋଗାଉଛନ୍ତି । ଗତକାଲି ଛଅ ସିଙ୍ଗଡ଼ା ପ୍ରସ୍ତୁତ ହୋଇଥିଲା । ଆଜି ମଧ୍ୟ ଛଅଟି ସିଙ୍ଗଡ଼ା ପ୍ରସ୍ତୁତ ହୋଇଛି ।
