ନୂଆଦିଲ୍ଲୀ,୧୦।୫: ଆସନ୍ତା ୧୦ ବର୍ଷରେ ବିଶ୍ବରେ ବହୁତ ବଡ ପରିବର୍ତ୍ତନ ହେବାକୁ ଯାଉଛି। ଆମେରିକାର ସ୍ଥିତି ଆଉ ଆଗ ଭଳି ନାହିଁ ଓ ତା’ର ପ୍ରଭାବ ମଧ୍ୟ କମି ଯାଇଛି ବୋଲି ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର କହିଛନ୍ତି। ସେ କହିଛନ୍ତି, ଏଭଳି ସମୟରେ ଏହା ଜରୁରୀ ଯେ, ଆମ ଦେଶର ଏକ ମଜୁବୁତ ହାତରେ ରହିଛି। ଜୟଶଙ୍କର କହିଛନ୍ତି, ୨୦୩୦ ପର୍ଯ୍ୟନ୍ତ ଦୁନିଆରେ ବହୁତ କିଛି ବଦଳି ସାରିଥିବ। ବିଶ୍ବ ଶାନ୍ତି ସନ୍ତୁଳନର ଏହି ଆକଳନରେ ବୈଦେଶିକ ମନ୍ତ୍ରୀ ନିଜ ୫୦ ବର୍ଷର ଅନୁଭବ ଆଧାରରେ କିଛି ଚିନ୍ତିତ କଲା ଭଳି ତଥ୍ୟ ଆଗତ କରିଛନ୍ତି। ଜୟଶଙ୍କର କହିଛନ୍ତି, ଆଜି ଦୁନିଆରେ ସଂଘର୍ଷ, ବିବାଦ ଓ ବିଭାଜନର ସ୍ଥିତି ଲାଗି ରହିଛି।
ସେ କହିଛନ୍ତି, ୟୁକ୍ରେନ୍ ଯୁଦ୍ଧ, ଗାଜାର ସଂଘର୍ଷ, ଲୋହିତ ସାଗରରେ ଆକ୍ରମଣ, ଦକ୍ଷିଣ ଚୀନ୍ ସାଗରରେ ବିବାଦ ଓ ଅନ୍ୟ ବହୁ ସ୍ଥାନରେ ଆତଙ୍କବାଦକୁ ଚ୍ୟାଲେଞ୍ଜ ଓ ନୂଆ ଟେକ୍ନୋଲୋଜି ଆସିବା ଫଳରେ ପରିବର୍ତ୍ତନ ପାଇଁ ମୁଖ୍ୟ ଭାବରେ ଦାୟୀ। ଆମ ଆଗରେ ମଧ୍ୟ ଏଲଏସି ଉପରେ ଚୀନ୍ ସହିତ ସମସ୍ୟ ରହିଛି, କିନ୍ତୁ ଅନ୍ୟ ଦେଶର ମଧ୍ୟ ଚୀନ୍ ସହିତ ନିଜର ଅଲଗା ପ୍ରସଙ୍ଗ ରହିଛି। ଏହା ସହିତ ବିଶ୍ବ ଅର୍ଥବ୍ୟବସ୍ଥାରେ ପରିବର୍ତ୍ତନକୁ ନେଇ ପ୍ରତିଯୋଗିତା ବଢିବାରେ ଲାଗିଛି।
ଏନ୍ଡିଏ ପୁଣିଥରେ କ୍ଷମତାକୁ ଫେରିବାର ଦାବି କରି ଜୟଶଙ୍କର କହିଛନ୍ତି, ମୋ ହିସାବରେ ଆଜିର ସ୍ଥିତିରେ ଭାରତୀୟ ମତଦାତାଙ୍କୁ ଏହା ଭାବିବା ଦରକାର ଯେ, କେଉଁ ଦେଶକୁ ଭଲ ଭାବରେ ସମ୍ଭାଳିହେବ। ମତଦାତାଙ୍କୁ ଏହା ଦେଖିବାର ଅଛି ଭାରତର ଶାସନ ଦେବା ପାଇଁ କିଏ ଭରସାଯୋଗ୍ୟ। ମତଦାତାଙ୍କୁ ବିବେକପୂର୍ଣ୍ଣ ଭାବରେ ନିର୍ବାଚନ କରିବା ଦରକାର, ଯାହାଫଳରେ ଭାରତରେ ଏକ ମଜବୁତ, ସ୍ଥିର ଓ ପରିପକ୍ବ ନେତୃତ୍ବ କାୟମ ରହିବ।