ପୁରୀ,୨୭/୦୪: ସାଂସ୍କୃତିକ ମହାକୁମ୍ଭ ‘ସାହିଯାତ’ ପାଇଁ ପୁରୀ ସହର ଉତ୍ସବ ମୁଖର । ଆଧ୍ୟାତ୍ମିକ ଚେତନା ସାଙ୍ଗକୁ ପାରମ୍ପରିକ ନୃତ୍ୟ ଓ ଉତ୍କର୍ଷ ସମରକଳାର ନିଦର୍ଶନ । ଚନ୍ଦନ ଓ ମଲ୍ଲୀଫୁଲର ମହକ ସାଙ୍ଗକୁ ଭାଇଚାରାରେ ମସଗୁଲ ପୁରୀବାସୀ । ଶୁକ୍ରବାର ଥିଲା ମହାପ୍ରଭୁଙ୍କ ଶ୍ରୀରାମଲୀଳାର ମହତ୍ତ୍ୱପୂର୍ଣ୍ଣ ଅଂଶ ‘ରାବଣ ବଧ’ ପର୍ବ । ଏହି ଅବସରରେ ରଣଭୂମି ପାଲଟିଥିଲା ବାଲିସାହି ଓ ହରଚଣ୍ଡୀ ସାହି । ଶ୍ରୀରାମ ଓ ରାବଣଙ୍କ ସେନା ମଧ୍ୟରେ ହେଲା ଘମାଘୋଟ ଲଢେଇ । ଶେଷରେ ଜଗନ୍ନାଥବଲ୍ଲଭ ପରିସରରେ ରାବଣ ବଧ ନୀତି ସମ୍ପନ୍ନ ହେଲା । ମର୍ଯ୍ୟାଦାପୁରୁଷ ଶ୍ରୀରାମଙ୍କ ହାତରେ ଦୁରାଚାରୀ ରାବଣଙ୍କ ପ୍ରାଣ ଗଲା ।  ଏପଟେ ବାଲିସାହିର ଭୁଆସିକଙ୍କ ପାରମ୍ପରିକ ନୃତ୍ୟ ଓ ସମରକଳା ପ୍ରଦର୍ଶନ ଦେଖଣାହାରୀଙ୍କୁ ରାତି ପାହିବା ପର୍ଯ୍ୟନ୍ତ ବାନ୍ଧି ରଖିଥିଲା । ରାତି ପାହିଲା ପର୍ଯ୍ୟନ୍ତ ଲୋକାରଣ୍ୟ ଥିଲା ଉଭୟ ସାହି ।    

ମହାପ୍ରଭୁଙ୍କ ଶ୍ରୀରାମଲୀଳାର ରାବଣ ବଧ ଅଧ୍ୟାୟ ବାଲିସାହିଆଙ୍କ ଦ୍ୱାରା ସମ୍ପନ୍ନ ହୋଇଥିଲା । ଲୁହାଗଡ଼ ଜାଗା ପକ୍ଷରୁ ଚଳିତ ବର୍ଷ ରାବଣ ବାହାରିଥିଲା । ମହାବୀର ସୁବୁଦ୍ଧି ସକାଳେ ରାବଣ ବନ୍ଧାଇ ସାହି ଭ୍ରମଣ କରିଥିଲେ । ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଆଜ୍ଞାମାଳ ଆଣିଥିଲେ । ରାତିରେ ବଳଭଦ୍ର ମହାସୁଆର ରାବଣ ଚରିତ୍ରରେ ଅବତୀର୍ଣ୍ଣ ହୋଇଥିଲେ । ରାବଣଙ୍କ ସହିତ ରାକ୍ଷସ ସେନା ମଧ୍ୟ ଥିଲେ । ହରଚଣ୍ଡୀ ସାହି ଭ୍ରମଣ ପରେ ଗୌଡ଼ବାଡ଼ ସାହିସ୍ଥିତ ଜମ୍ବେଶ୍ୱରଙ୍କ ମନ୍ଦିରରେ ଥିବା ନିକୁମ୍ବିଲା ବଟମୂଳେ ରାବଣ ଯଜ୍ଞ କରିଥିଲେ । ଶ୍ରୀମନ୍ଦିର ପାଶ୍ୱର୍ ଗଡ଼ନ୍ତିଛକ ନିକଟ ଭଗବତୀ କୋଟରେ ପଣା ଗ୍ରହଣ କରିବା ସହ ସ୍ୱର୍ଗକୁ ନିଶୁଣି ଓ ଶକ୍ତି ପ୍ରାପ୍ତ ହୋଇଥିଲେ । ଏପଟେ ଶ୍ରୀରାମଲକ୍ଷ୍ମଣ ଶ୍ରୀମନ୍ଦିରରୁ ପଟୁଆରରେ ଯାଇ ଜଗନ୍ନାଥବଲ୍ଲଭ ମଠରେ ବିଜେ ହୋଇଥିଲେ । ଜଗନ୍ନାଥ ବଲ୍ଲଭ ମଠ ପରିସରରେ ଶ୍ରୀରାମଙ୍କ ସହିତ ଯୁଦ୍ଧରେ ରାବଣଙ୍କ ଜୀବନ ଯାଇଥିଲା । 

ବାଲିସାହିର ବିଭିନ୍ନ ଜାଗା ଓ ବିଭିନ୍ନ ଅନୁଷ୍ଠାନରୁ ଭୁଆସିକ ବାହାରି ହରଚଣ୍ଡୀ ସାହିରେ ନୃତ୍ୟ ପରିବେଷଣ କରିଥିଲେ । ନାଗା, ମେଢ, ନଶିରା, ସପ୍ତଶିରା ଆଦି ସାଙ୍ଗକୁ ଜାଗା ସାଙ୍ଗମାନେ ତଲୁଆର୍‌ ବାଜି, ବାଡ଼ି ଖେଳ ସହ ପାରମ୍ପରିକ ଖେଳ ପ୍ରଦର୍ଶନ କରିଥିଲେ । ପ୍ରଜ୍ଞାପନ ମେଢ଼ରେ ଭୋଟର ସଚେତନତା ମଧ୍ୟ କରାଯାଇଥିଲା । ଅଧିକରୁ ଅଧିକ ଲୋକ ମତଦାନ ପ୍ରକ୍ରିୟାରେ ସାମିଲ ହେବାକୁ ବାର୍ତ୍ତା ଦିଆଯାଇଥିଲା । ହରଚଣ୍ଡୀ ସାହିର ଜାଗା ଆଖଡ଼ାରେ ବାଲି ସାହିଆଙ୍କ ପାଇଁ ଅତିଥି ଅଭ୍ୟାଗତର ବ୍ୟବସ୍ଥା ହୋଇଥିଲା । ଉଭୟ ସାହିର ମୁରବିମାନେ ଭାଇଚାରାର ବନ୍ଧନରେ ବାନ୍ଧି ହୋଇଥିଲେ । ବାଲିସାହି ଆଖଡ଼ା ସଭାପତି ତଳୁଛ ନୀଳକଣ୍ଠ ମହାପାତ୍ର, ସଂପାଦକ ନରେନ୍ଦ୍ର ମହାନ୍ତି, କୋଷାଧ୍ୟକ୍ଷ ନାରାୟଣ ତ୍ରିପାଠୀ, ଜିତୁ ମୁଦୁଲି, କ୍ଷେତ୍ର ମୋହନ ରଣାଙ୍କ ତତ୍ତ୍ୱାବଧାନରେ ସମସ୍ତ କାର୍ଯ୍ୟ ସଂପାଦିତ ହୋଇଥିଲା । ୮ ସାହି ସମନ୍ୱୟ କମିଟିର କର୍ମକର୍ତ୍ତାମାନେ ଶୃଙ୍ଖଳିତ ଭାବେ ସାହିଯାତ ସମାପନ ପାଇଁ ଜାଗ୍ରତ ଥିଲେ ।