ଗତବର୍ଷ ଡିସେମ୍ବର ମାସରେ ରିଲିଜ୍‌ ହୋଇଥିବା ଫିଲ୍ମ ‘ଦବଙ୍ଗ-୩’ ମାଧ୍ୟମରେ ବଲିଉଡ୍‌ରେ ଡେବ୍ୟୁ କରିଥିଲେ ଅଭିନେତ୍ରୀ ସାଇ ମଞ୍ଜରେକର । ସେଥିରେ ତାଙ୍କ ବିପକ୍ଷରେ ଅଭିନେତା ସଲମାନ୍‌ ଖାନ୍‌ ନଜର ଆସିଥିଲେ । ସେହି ଫିଲ୍ମରେ ତାଙ୍କ ଅଭିନୟକୁ ଖୁବ୍‌ ପ୍ରଶଂସା ମିଳିଥିଲା ।

ସଦ୍ୟତମ ଖବର ଅନୁସାରେ ସାଇ ଏବେ ତାଙ୍କର ଦ୍ୱିତୀୟ ଫିଲ୍ମ ପାଇଁ ଚୁକ୍ତିବଦ୍ଧ ହୋଇଛନ୍ତି । ଉଭୟ ତେଲଗୁ ଏବଂ ହିନ୍ଦୀ ଭାଷାରେ ନିର୍ମିତ ହେଉଥିବା ‘ମେଜର’ ଫିଲ୍ମରେ ସେ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ । ଫିଲ୍ମଟି ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣ ଘଟଣାରେ ସହିଦ ହୋଇଥିବା ଏନ୍‌ଏସ୍‌ଜି କମାଣ୍ଡୋ ସନ୍ଦୀପ ଉନ୍ନିକ୍ରିଷ୍ଣନଙ୍କ ଜୀବନୀ ଉପରେ ପର୍ଯ୍ୟବସିତ । ଶଶି କିରନ୍‌ ଟିକ୍କା ଏହାର ନିର୍ଦ୍ଦେଶନାରେ ଅଛନ୍ତି । ଏଥିରେ ସନ୍ଦୀପଙ୍କ ଭୂମିକାରେ ଅଭିନେତା ଆଦିଭି ଶେଷଙ୍କୁ ଦେଖିବାକୁ ମିଳିବ । ଦୁଇଟି ଭାଷାରେ ମୁକ୍ତିଲାଭ କରିବାକୁ ଥିବାରୁ ଫିଲ୍ମକୁ ନେଇ ସାଇ ଖୁବ୍‌ ଉତ୍ସାହିତ ଥିବା ପ୍ରକାଶ କରିଛନ୍ତି ।