ମୁମ୍ବାଇ: ଇମ୍ତିଆଜ ଅଲିଙ୍କ ଅପ୍କମିଙ୍ଗ ଫିଲ୍ମକୁ ନେଇ ସାରା ଅଲି ଖାନ୍ ଏବେ ଚର୍ଚ୍ଚାରେ । ତାଙ୍କ ସହ ଖବରରେ ଅଛନ୍ତି କୋ-ଷ୍ଟାର୍ କାର୍ତ୍ତିକ ଆର୍ଯ୍ୟନ୍ । କାର୍ତ୍ତିକଙ୍କ ସହ ଡେଟ୍ କରିବାକୁ ଚାହୁଁଥିବା କଥା ନିକଟରେ ଏକ ସାକ୍ଷାତକାରରେ ସାରା କହିବା ପରେ ଉଭୟ କଳାକାରଙ୍କ ଉପରେ ବି-ଟାଉନ୍ର ନଜର ଥିଲା । ଏହି ଯୋଡ଼ିକୁ ନେଇ ଫିଲ୍ମ କରିବାକୁ ଫିଲ୍ମମେକର୍ ଆଗଭର ହେଲେ । ତେବେ ସତସତିକା କାର୍ତ୍ତିକସାରାଙ୍କୁ ନେଇ ଫିଲ୍ମ କରିବାକୁ ଯାଉଛନ୍ତି ଇମ୍ତିଆଜ ଅଲି । ସୁଟିଂ ବି ଚାଲିଛି । ନିକଟରେ ସାରା ଦିଲ୍ଲୀରେ ନିଜ ସିନ୍ର କିଛି ସୁଟିଂ ଶେଷ କରିଛନ୍ତି । ସେତିକି ନୁହେଁ, ନିଜ ଇନ୍ଷ୍ଟାଗ୍ରାମ୍ ଆକାଉଣ୍ଟରେ ଏ ନେଇ ଏକ ଭିଡିଓ ମଧ୍ୟ ପୋଷ୍ଟ କରିଛନ୍ତି । ସୈଫ୍ ଅଲି ଖାନ୍-ଦୀପିକା ପାଦୁକୋନ ଷ୍ଟାରର୍ ‘ଲଭ୍ ଆଜ୍ କଲ୍’ର ଏଇଟି ସିକ୍ୱେଲ ବୋଲି ପୂର୍ବରୁ ଚର୍ଚ୍ଚା ହେଉଥିଲା । ତେବେ ଏ ନେଇ କୌଣସି ପ୍ରକାର ଚୂଡ଼ାନ୍ତ ଘୋଷଣା ହୋଇନଥିଲା ।
ବର୍ତ୍ତମାନର ରିପୋର୍ଟ ଅନୁସାରେ, ଫିଲ୍ମମେକର୍ ଫିଲ୍ମର ଟାଇଟଲ୍ ରଖିଛନ୍ତି ‘ଆଜ୍ କଲ୍’ । ‘ଲଭ୍ ଆଜ୍ କଲ୍’ର ଏହା ସିକ୍ୱେଲ୍ ହୋଇପାରେ ବୋଲି ଜଣାପଡୁଛି । ସିକ୍ୱେଲ୍ କି ନୁହେଁ, ତାହା ବଡ଼ କଥା ନୁହେଁ । ସାରା-କାର୍ତ୍ତିକଙ୍କ ଅନସ୍କ୍ରିନ୍ କେମିଷ୍ଟ୍ରିକୁ ନେଇ ସମସ୍ତେ ଉତ୍ସାହିତ । ଆସନ୍ତା ଭାଲେନ୍ଟାଇନ୍ସ ଡେ’ରେ ଫିଲ୍ମ ରିଲିଜ୍ ହେବ ବୋଲି ଶୁଣିବାକୁ ମିଳୁଛି । ‘ସିମ୍ବା’ ପରେ ସାରାଙ୍କ ଅଭିନୟ ଦକ୍ଷତାକୁ ସମସ୍ତେ ପ୍ରଶଂସା କରୁଛନ୍ତି । ଖୁବ୍ଶୀଘ୍ର ଆଗଧାଡ଼ିର ନାୟିକାଙ୍କ ରେସ୍ରେ ସେ ସାମିଲ ହେବେ ବୋଲି ସବୁଠି ଚର୍ଚ୍ଚା ।