ନୂଆଦିଲ୍ଲୀ,୧୬/୦୫: ୨୭ ସପ୍ତାହର ଗର୍ଭବତୀ ଥିବା ଜଣେ ୨୦ ବର୍ଷୀୟା ଛାତ୍ରୀଙ୍କର ଗର୍ଭପାତ ଆବେଦନକୁ ସୁପ୍ରିମକୋର୍ଟ ବୁଧବାର ଖାରଜ କରିଦେଇଛନ୍ତି । ଜଷ୍ଟିସ୍ ବି.ଆର ଗବଇ, ଜଷ୍ଟିସ୍ ଏସବିଏନ୍ ଭଟ୍ଟି ଓ ଜଷ୍ଟିସ୍ ସନ୍ଦୀପ ମେହତା ଯୁବତୀଙ୍କର ଆବେଦନକୁ ଖାରଜ କରିବା ସମୟରେ କହିଛନ୍ତି, ଗର୍ଭରେ ଥିବା ଭ୍ରୂଣର ମଧ୍ୟ ବଞ୍ଚିବାର ଅଧିକାର ରହିଛି । ଆଇନର ବୀପରିତରେ ଆମେ କୌଣସି ଆଦେଶ ପାରିତ କରିପାରିବୁ ନାହିଁ । ଏହା ପୂର୍ବରୁ ଦିଲ୍ଲୀ ହାଇକୋର୍ଟ ଏହି ମାମଲାରେ ମେ ୭ ତାରିଖରେ ଯୁବତୀଙ୍କୁ ଗର୍ଭପାତ ଲାଗି ଅନୁମତି ଦେବାକୁ ମନା କରିଥିଲେ ।
ସେହି ସମୟରେ ହାଇକୋର୍ଟ କହିଥିଲେ, ମେଡିକାଲ ରିପୋର୍ଟରେ ଭ୍ରୁଣ ବିଲକୁଲ୍ ସୁସ୍ଥ ଥିବା ଜଣାପଡିଛି । ଗର୍ଭବସ୍ଥାକୁ ଜାରି ରଖିବାରେ ମା’ ଓ ପିଲାକୁ କୌଣସି ବିପଦ ନାହିଁ । ଏଭଳିସ୍ଥଳରେ ଗର୍ଭପାତ କରାଇବା ନୈତିକତା ଆଧାରରେ ଠିକ୍ ହେବନାହିଁ । ଆଇନ ଦୃଷ୍ଟିରେ ମଧ୍ୟ ଏହା ସ୍ୱୀକାର୍ଯ୍ୟ ନୁହେଁ ।
ଯୁବତୀଜଣକ ନିଜର ଯୁକ୍ତିରେ ଦର୍ଶାଇଥିଲେ ଯେ, ସେ ଛାତ୍ରୀ ହୋଇଥିବାବେଳେ ଏବେ ନିଟ୍ ପରୀକ୍ଷା ଲାଗି ପ୍ରସ୍ତୁତି କରୁଛନ୍ତି । ଏପ୍ରିଲ ୧୬ ତାରିଖରେ ତାଙ୍କୁ ନିଜର ଗର୍ଭାବସ୍ଥା ସଂପର୍କରେ ଜଣାପଡିଥିଲା । କିନ୍ତୁ ସେତେବେଳକୁ ୨୭ ସପ୍ତାହ ବିତିସାରିଥିଲା । ତାଙ୍କର ବିବାହ ହୋଇନଥିବାବେଳେ ରୋଜଗାରର କୌଣସି ଉତ୍ସ ନାହିଁ । ତେଣୁ ଗର୍ଭବସ୍ଥା ଜାରି ରଖିଲେ ତାଙ୍କର ବଦନାମି ହେବା ସହିତ କ୍ୟାରିୟର ଉପରେ ପ୍ରଭାବ ପଡ଼ିବ ବୋଲି ସେ କହିଥିଲେ । ପରେ କୋର୍ଟ ତାଙ୍କୁ ପ୍ରସବ ଲାଗି ଏମ୍ସ ଯିବାକୁ ପରାମର୍ଶ ଦେଇଥିଲେ।
