ଗୋପବନ୍ଧୁନଗର ୧୧/୧୨: ପଢ଼ିବା ପାଇଁ ଭଉଣୀ ବାଧ୍ୟ କରିବାରୁ ଭାଇ ନିଜ ଦେହରେ କିରୋସିନ୍ ଢାଳି ଆତ୍ମହତ୍ୟା କରିଛି । ଘଟଣା ଘଟିଛି ମୟୂରଭଞ୍ଜ ଜିଲ୍ଲା ଖୁଣ୍ଟା ଥାନା ଅନ୍ତର୍ଗତ ଭୋଳପଦା ଗ୍ରାମରେ । ମୃତକ ଗ୍ରାମର ନବୀନ ମାରାଣ୍ଡିଙ୍କ ଅଷ୍ଟମ ଶ୍ରେଣୀରେ ପଢୁଥିବା ପୁଅ କାଳିଦାସ ।
କାଳିଦାସର ବଡ଼ ଭାଇ ପୂର୍ଣ୍ଣଚନ୍ଦ୍ରଙ୍କ କହିବା ଅନୁଯାୟୀ କାଳିଦାସ ଆଜି ସକାଳେ ସ୍କୁଲ ଯିବ ନାହିଁ ବୋଲି ମନା କରିଥିଲା। ଭଉଣୀ ଭାଇକୁ ସ୍କୁଲ ଯିବାକୁ ବାଧ୍ୟ କରିବା ସହ ବିରକ୍ତ ମଧ୍ୟ ହୋଇଥିଲା । ଭଉଣୀର ଏତିକି କଥାରେ ସାନଭାଇ କାଳିଦାସ ଘର କବାଟ ବନ୍ଦ କରି ଦେହରେ କିରୋସିନ ଢାଳି ନିଆଁ ଲଗାଇ ଦେଇଥିଲା । ଘର ଭିତରୁ ଧୂଆଁ ବାହାରିବା ଦେଖି ପରିବାର ଲୋକ ଅନ୍ୟମାନଙ୍କୁ ଡାକ ପକାଇଥିଲେ । ଗ୍ରାମବାସୀ କାଳିଦାସକୁ ଅର୍ଦ୍ଧଦଗ୍ଧ ଅବସ୍ଥାରେ ସ୍ଥାନୀୟ ବଡ଼ସାହି ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ । ସଂକଟାପନ୍ନ ଥିବାରୁ ଡାକ୍ତର ବାରିପଦା ପିଆରଏମ ହସ୍ପିଟାଲକୁ ପଠାଇଥିଲେ । ଅପରାହ୍ନ ପ୍ରାୟ ୨ଟା ୩୦ରେ ଡାକ୍ତର ତାକୁ ମୃତ ଘୋଷଣା କରିଥିଲେ ।
