ପୁରୀ,୦୬/୦୫: ଶ୍ରୀମନ୍ଦିରର ୩ ପ୍ରବେଶ ଦ୍ୱାର ରୁପା ଛାଉଣୀ ହେବ । ଏନେଇ ଆସନ୍ତା ୮ ତାରିଖରେ ଶ୍ରୀମନ୍ଦିର କାର୍ଯ୍ୟାଳୟରେ ଏକ ବୈଠକ ବସିବ । ଶ୍ରୀମନ୍ଦିର ଉତ୍ତର ଦ୍ୱାର ବା ହାତୀ ଦ୍ୱାର, ବାଘ ଦ୍ୱାର ବା ପଶ୍ଚିମ ଦ୍ୱାର ଓ ଅଶ୍ୱ ଦ୍ୱାର ବା ଦକ୍ଷିଣ ଦ୍ୱାର ରୁପା ଛାଉଣି ନେଇ ଆଲୋଚନା କରାଯିବ । ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ଅଧ୍ୟକ୍ଷତାରେ ବୈଠକ ହେବ । ଏଥିରେ ଛତିଶା ନିଯୋଗର ମୁଖିଆ, ଶ୍ରୀମନ୍ଦିର ପରିଚାଳନା କମିଟି ସଦସ୍ୟ, ଭାରତୀୟ ପ୍ରତ୍ନତତ୍ତ୍ୱ ବିଭାଗର ସୁପରିଟେଣ୍ଡେଣ୍ଟ ଓ ଶ୍ରୀମନ୍ଦିର କାର୍ଯ୍ୟାଳୟର ଅଧିକାରୀମାନେ ଯୋଗଦେବାର କାର୍ଯ୍ୟକ୍ରମ ରହିଛି ।
ଏହି ୩ ଦ୍ୱାର ମରାମତି ଓ ଉନ୍ନତୀକରଣ ନିମନ୍ତେ ମୁଖ୍ୟତଃ ବୈଠକରେ ଆଲୋଚନା ହେବ । ଶ୍ରୀମନ୍ଦିର ଭିତର ଓ ସିଂହଦ୍ୱାରକୁ ମିଶାଇ ପ୍ରାୟ ୧୦ଟି ଦ୍ୱାର ରୁପା ଛାଉଣି ହୋଇଛି । ଏହାମଧ୍ୟରେ ରହିଛି ସିଂହଦ୍ୱାର, ସାତପାହାଚ, ଜୟବିଜୟ, ବେହେରଣ, କଳାହାଟ, ଭୋଗ ମଣ୍ଡପ, ଆଦି ନୃସିଂହ ମନ୍ଦିର, ବିମଳା ମନ୍ଦିର, ଲକ୍ଷ୍ମୀ ମନ୍ଦିର, ସୂର୍ଯ୍ୟ ମନ୍ଦିର । ଦାତା ରୁପା ଦେଇଥିବାରୁ ଏହାକୁ ବ୍ୟବହାର କରି ଶ୍ରୀମନ୍ଦିର ସମସ୍ତ ଦ୍ୱାରକୁ ରୁପା ଛାଉଣି କରିବାକୁ ଶ୍ରୀମନ୍ଦିର ପ୍ରଶାସନ ଲକ୍ଷ୍ୟ ରଖିଛି ।