ନୂଆଦିଲ୍ଲୀ: ସିଙ୍ଗାପୁରରେ କ୍ରମାଗତ ଭାବେ ବଢୁଛି କରୋନା ମାମଲା । ଏହା ଏବେ ବିଶ୍ବର ଅନ୍ୟ ଦେଶମାନଙ୍କରେ ମଧ୍ୟ ଭୟ ସୃଷ୍ଟି କରିବା ଆରମ୍ଭ କରିଛି । ଏହା କ’ଣ କରୋନାର ଆଉ ଏକ ନୂଆ ଲହର କି ? ପୁଣି ଥରେ ବିଶ୍ବରେ ଆତଙ୍କ ସୃଷ୍ଟି କରିବାକୁ ଯାଉଛି କି କରୋନା ? ଏଭଳି ଅନେକ ପ୍ରଶ୍ନ ଏବେ ଲୋକଙ୍କୁ ଆତଙ୍କିତ କରୁଛି । ଆଉ ଏହି ସମୟରେ କରୋନା ରୋଗୀଙ୍କ ସଂଖ୍ୟା ମଧ୍ୟ ସିଙ୍ଗାପୁରରେ ବୃଦ୍ଧି ପାଇବାରେ ଲାଗିଛି । କୋଭିଡ-19 ର ଏକ ନୂଆ ଲହର ଏଠାରେ ଦେଖାଯାଉଛି । କୋଭିଡ୍-19 ମାମଲା କ୍ରମାଗତ ଭାବରେ ବୃଦ୍ଧି ପାଉଛି । ମେ ୫ ରୁ ୧୧ ମଧ୍ୟରେ ପ୍ରାୟ ୨୬ ହଜାର ମାମଲା ପଂଜିକୃତ ହୋଇସାରିଲାଣି । ପରିସ୍ଥିତିକୁ ଦୃଷ୍ଟିରେ ରଖି ସିଙ୍ଗାପୁରର ସ୍ୱାସ୍ଥ୍ୟମନ୍ତ୍ରୀ ଓଙ୍ଗ ୟେ କୁଙ୍ଗ ମାସ୍କ ପିନ୍ଧିବାକୁ ପରାମର୍ଶ ଦେଇଛନ୍ତି।
ମନ୍ତ୍ରୀ କହିଛନ୍ତି ଯେ, 'ଆମେ ଏକ ନୂଆ ଲହରର ଆରମ୍ଭ ଦେଖୁଛୁ, ଯେଉଁଠାରେ ଏହା କ୍ରମାଗତ ଭାବେ ବୃଦ୍ଧି ପାଉଛି । ତେଣୁ,ଆଗାମୀ ଦୁଇରୁ ଚାରି ସପ୍ତାହ ମଧ୍ୟରେ ଲହର ଶିଖରରେ ପହଞ୍ଚିପାରେ । ଏହାର ସ୍ପଷ୍ଟ ଅର୍ଥ ହେଉଛି ଜୁନ୍ ମଧ୍ୟଭାଗରୁ ଶେଷ ପର୍ଯ୍ୟନ୍ତ ସିଙ୍ଗାପୁରରେ ଏକ ନୂଆ ଲହର ଦେଖିବାକୁ ମିଳିବ ।
ସ୍ୱାସ୍ଥ୍ୟ ମନ୍ତ୍ରଣାଳୟ (MOH) କହିଛି ଯେ, ମେ ୫ ରୁ ୧୧ ମଧ୍ୟରେ କୋଭିଡ -19 ମାମଲାର ଆନୁମାନିକ ସଂଖ୍ୟା ୨୫୯୦୦ କୁ ବୃଦ୍ଧି ପାଇଛି। କରୋନା ମହାମାରୀର ଦୈନିକ ମାମଲା ୧୮୧ ରୁ ପ୍ରାୟ ୨୫୦ କୁ ବୃଦ୍ଧି ପାଇଛି ।
ଡାକ୍ତରଖାନା ଗୁଡିକରେ ଶଯ୍ୟା କ୍ଷମତା ସଂରକ୍ଷଣ ପାଇଁ ନୂତନ ପଦକ୍ଷେପ ନିଆଯାଉଛି ବୋଲି ମନ୍ତ୍ରଣାଳୟ କହିଛି । ସରକାରୀ ଡାକ୍ତରଖାନାଗୁଡ଼ିକୁ ସେମାନଙ୍କର ଅଣ-ଜରୁରୀ ସର୍ଜରୀ ମାମଲା ହ୍ରାସ କରିବାକୁ ଏବଂ ଉପଯୁକ୍ତ ରୋଗୀଙ୍କୁ ଚିକିତ୍ସା ସୁବିଧା ଯୋଗାଇବାକୁ କୁହାଯାଇଛି । ଘରେ ସାମାନ୍ୟ ଅସୁସ୍ଥ ବ୍ୟକ୍ତିଙ୍କ ଯତ୍ନ ନେବାକୁ ମଧ୍ୟ କୁହାଯାଇଛି।
ସେ ସିଙ୍ଗାପୁରବାସୀଙ୍କୁ ମାସ୍କ ପିନ୍ଧିବାକୁ ଏବଂ ଅସୁସ୍ଥ ଥିଲେ ଘରେ ରହିବାକୁ ଏବଂ ଟୀକାକରଣ କରିବାକୁ କହିଛନ୍ତି । ସେ କହିଛନ୍ତି ଯେ ବରିଷ୍ଠ ନାଗରିକ କିମ୍ବା ଗୁରୁତର ରୋଗରେ ପୀଡିତ ଲୋକମାନଙ୍କ ପାଇଁ ବର୍ଷକୁ ଥରେ ଟୀକାକରଣ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ, କାରଣ ସେମାନେ ସଂକ୍ରମଣରେ ଅଧିକ ଅସୁରକ୍ଷିତ ଅଟନ୍ତି।