ଖଲ୍ଲିକୋଟ, ୧୮।୫ : ଖଲ୍ଲିକୋଟ ଥାନା ଅନ୍ତର୍ଗତ ଶ୍ରୀକୃଷ୍ଣଶରଣପୁର ଗ୍ରାମରେ ବୁଧବାର ରାତିରେ ପୋଷ୍ଟର ମାରିବାକୁ ନେଇ ଦିଲ୍ଲୀପ ପାହାନଙ୍କୁ ହତ୍ୟା କରାଯାଇଥିଲା। ଏହି ଘଟଣା ପରେ ଶ୍ରୀକୃଷ୍ଣ ଶରଣପୁର ଗ୍ରାମରେ ଉତ୍ତେଜନା ଦେଖା ଦେଇଥିଲା। ଏସଆଇଟି ଟିମ୍ ଘଟଣାର ତଦନ୍ତ କରିବ ବୋଲି ଡିଜିପି ନିର୍ଦ୍ଦେଶ ଦେଇଥିଲେ।
ଶନିବାର ସନ୍ଧ୍ୟାରେ ଗ୍ରାମରେ ପହଞ୍ଚିଛନ୍ତି ଏସଆଇଟି ଟିମ । ଏସଆଇଟି ଟିମ୍ରେ ପୋଲିସ ଅଧିକାରୀ କିରଣ ଚନ୍ଦ୍ର ପାତ୍ର, ଜ୍ୟୋତି ରଞ୍ଜନ ବେହେରା ଓ ମସିରାଣୀ ପୃଷ୍ଟି ପ୍ରମୁଖ ଥିବା ବେଳେ ସେମାନଙ୍କ ସହ ଫରେନସିକ ଟିମ ଓ ସନ୍ଧାନୀ କୁକୁର ମଧ୍ୟ ଆସିଥିଲେ। ମୃତ ଦିଲ୍ଲୀପ ପାହାନଙ୍କ ଘରକୁ ଯାଇ ପରିବାର ଲୋକଙ୍କୁ ଘଟଣା ସମ୍ପର୍କରେ ପଚାରି ବୁଝିବା ସହ କେତେକ ଗ୍ରାମବାସୀଙ୍କୁ ପଚାରିଥିଲେ। ଘଟଣାସ୍ଥଳକୁ ଯାଇ ତଦନ୍ତ କରିବା ସହ ଫରେନସିକ ଟିମ ରକ୍ତ ଭିଜା ମାଟି ସଂଗ୍ରହ କରିଥିଲେ। ଘଟଣା ସ୍ଥଳରେ ପଡ଼ିଥିବା ଚପଲ ଶୁଙ୍ଘିବା ପରେ ସନ୍ଧାନୀ କୁକୁର କିଛି ଦୂର ଯାଇ ଅଟକି ଯାଇଥିଲା। ଏହି ହତ୍ୟା ଘଟଣାରେ ଏ ପର୍ଯ୍ୟନ୍ତ ପୋଲିସ ୯ ଜଣଙ୍କୁ ଗିରଫ କରିଛି। ଏସଆଇଟି ତଦନ୍ତ ବେଳେ ଖଲ୍ଲିକୋଟ ଆଇଆଇସି ନରେଶ କୁମାର ସାହୁ ଉପସ୍ଥିତ ଥିଲେ।