ପଞ୍ଜାବ: ପଞ୍ଜାବର ହୋଶିଆରପୁରର ଗାଡିୱାଲା ନିକଟ ଏକ ଗାଁରେ ଏକ ଅଭାବନୀୟ ଘଟଣା ଘଟିଛି । ଏଠାରେ ଆଜି (ରବିବାର) ଜଣେ ୬ ବର୍ଷର ବାଳକ ପ୍ରାୟ ୨ ଶହ ଫୁଟ ଗଭୀର ଏବଂ ୮ ଇଞ୍ଚ ଚଉଡା ବୋରୱେଲରେ ଖସି ପଡିଛି । ତେବେ ଏହି ଘଟଣାଟି ସେହି ସମୟରେ ଘଟିଥିଲା ଯେତେବେଳେ ଶିଶୁଟିର ପିତାମାତା କ୍ଷେତରେ କାମ କରୁଥିଲେ, ଆଉ ସେହି ସମୟରେ ଏକ କୁକୁର ଛୁଆ ବାଳକର ପାଖକୁ ଆସିଥିଲା । ପିଲାଟି କୁକୁରଠାରୁ ନିଜକୁ ରକ୍ଷା କରିବାକୁ ଚେଷ୍ଟା କଲା ଏବଂ ବୋରୱେଲରେ ଖସି ପଡିଲା । ଏହି ଘଟଣା ସକାଳ ପ୍ରାୟ ୧୦ ଟା ବେଳେ ଘଟିଥିବା କୁହାଯାଉଛି। ବୋରୱେଲରେ ପଡ଼ିଥିବା ଏହି ଶିଶୁର ନାମ ହ୍ରିତିକ୍ ।
ଶିଶୁକୁ ବଞ୍ଚାଇବା ପାଇଁ ପ୍ରଶାସନିକ କର୍ମଚାରୀ ଏବଂ ଏନଡିଆରଏଫ ଟିମ୍ ଘଟଣାସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରିବା ପାଇଁ ପଦକ୍ଷେପ ନେଇଛନ୍ତି । ତେବେ ପିଲାଟି ପ୍ରାୟ ୧୦୦ ଫୁଟ ତଳେ ବୋରୱେଲରେ ଅଟକି ରହିଛି ବୋଲି କୁହାଯାଉଛି । କ୍ୟାମେରାରେ ବାଳକର ପ୍ରତ୍ୟେକ ଗତିବିଧି ଉପରେ ନଜର ରଖିବାକୁ ଚେଷ୍ଟା କରାଯାଉଛି । ଲାଇଫ୍ ସପୋର୍ଟ ସିଷ୍ଟମକୁ ମଧ୍ୟ ଘଟଣାସ୍ଥଳରେ ଡକାଯାଇଛି । ଶିଶୁକୁ ଯେପରି ଅମ୍ଳଜାନର ଅଭାବ ନହେବ ସେଥିପାଇଁ NDRF ଦଳ ବ୍ୟବସ୍ଥା କରୁଛି । ଅନ୍ଧାର ହେବା ପୂର୍ବରୁ ପିଲାଟିକୁ ବାହାରକୁ ଆଣିବାକୁ ଚେଷ୍ଟା କରୁଛି ଦଳ । ଘଟଣାସ୍ଥଳରେ ସ୍ଥାନୀୟ ଲୋକଙ୍କ ଭିଡ ଜମିଛି ।