ଭୁୁବନେଶ୍ୱର,୧୭/୦୫: ଅଥୟ କଲାଣି ‘ଚର୍ମ’ ରୋଗ । ଏକ୍ଜିମା, ଯାଦୁ ଓ ଆଲର୍ଜୀରେ ରୋଗୀ ବହୁଳ ଭାବେ ଆକ୍ରାନ୍ତ ହେଉଛନ୍ତି । ଚିକିତ୍ସା ଲାଗି ରୋଗୀ ଗୋଟିଏ ହସ୍ପିଟାଲରୁ ଆଉ ଗୋଟିଏ ହସ୍ପିଟାଲ ଧାଉଁଛନ୍ତି । ବିଶେଷଜ୍ଞଙ୍କ କହିବା କଥା, ଲୋକେ ମନଇଚ୍ଛା ଔଷଧ ବ୍ୟବହାର କରିବା, ଜଳବାୟୁ ପରିବର୍ତ୍ତନ, ବାୟୁମଣ୍ଡଳ ବିଷାକ୍ତ ହେବା, ଜିନ୍ସ କପଡ଼ା ବ୍ୟବହାର ଓ ଫାଷ୍ଟ୍ଫୁଡ୍ ଖାଇବା ଯୋଗୁ ଚର୍ମ ରୋଗ ବ୍ୟାପୁଛି । ୫ ବର୍ଷ ଭିତରେ ଏହି ରୋଗୀଙ୍କ ସଂଖ୍ୟା ପ୍ରାୟ ୩ ଗୁଣା ବଢ଼ିଛି ବୋଲି ସେମାନେ କହିଛନ୍ତି ।
କ୍ୟାପିଟାଲ ହସ୍ପିଟାଲରୁ ମିଳିଥିବା ସୂଚନା ଅନୁଯାୟୀ, ଗତ ୫ ବର୍ଷ ପୂର୍ବେ ହସ୍ପିଟାଲକୁ ଦୈନିକ ୧୦୦ରୁ ୧୮୦ ଭିତରେ ଚର୍ମ ରୋଗୀ ଆସୁଥିଲେ । ଏବେ ଦୈନିକ ରୋଗୀ ସଂଖ୍ୟା ପ୍ରାୟ ୪୫୦ରୁ ୫୦୦ ପର୍ଯ୍ୟନ୍ତ ଗଲାଣି। କ୍ୟାପିଟାଲ ହସ୍ପିଟାଲ ଚର୍ମ ରୋଗ ବିଶେଷଜ୍ଞ ଡାକ୍ତର ରାଜେନ୍ଦ୍ର କୁମାର ପାଣିଗ୍ରାହୀ କହିଛନ୍ତି, ହସ୍ପିଟାଲରେ ଚର୍ମ ରୋଗୀଙ୍କ ବହୁତ ଭିଡ଼ ହେଉଛି । ଏବେ ହସ୍ପିଟାଲରୁ ଆସୁଥିବା ରୋଗୀଙ୍କ ମଧ୍ୟରେ ପ୍ରାୟତଃ ୮୦ ପ୍ରତିଶତ ଏହି ରୋଗୀ । ଏହି ରୋଗକୁ ନିୟନ୍ତ୍ରଣ କରିବା ଏବେ କଷ୍ଟକର ହେଲାଣି । ରୋଗୀ ଡାକ୍ତରୀ ପରାମର୍ଶ ନେଉନାହାନ୍ତି । ଔଷଧ ଦୋକାନକୁ ଯାଇ ମନଇଚ୍ଛା ଔଷଧ ଓ ମଲମ ଲଗାଉଛନ୍ତି । ଏହାର ମାତ୍ରା ସମ୍ପର୍କରେ ସେମାନେ ମଧ୍ୟ ଅଜଣା। ଫଳରେ ପରବର୍ତ୍ତୀ ସମୟରେ ଶରୀର ରୋଗ ପ୍ରତିରୋଧକ ଶକ୍ତି ହରାଉଛି । ରୋଗ ବଢ଼ିଲା ପରେ ସେମାନେ ଡାକ୍ତରଙ୍କ ପାଖକୁ ଆସୁଛନ୍ତି। ତେଣୁ ଲୋକେ ଡାକ୍ତରଙ୍କ ବିନା ପରାମର୍ଶରେ ଔଷଧ ବ୍ୟବହାର ନ କରିବା ଲାଗି ସେ ପରାମର୍ଶ ଦେଇଛନ୍ତି ।
ଚର୍ମରୋଗ ବିଶେଷଜ୍ଞ ବିଶ୍ୱଜିତ ସାମଲ କହିଛନ୍ତି, ଏବେ ବାୟୁମଣ୍ଡଳ ପ୍ରଦୂଷଣ, ଜୀବନ ଶୈଳୀରେ ପରିବର୍ତ୍ତନ ଓ ଶିଳ୍ପାଞ୍ଚଳ ବୃଦ୍ଧି ଯୋଗୁଁ ଏକ୍ଜିମା ବଢ଼ୁଛି । ଚର୍ମ ଶୁଷ୍କ ରହିବା ଦ୍ୱାରା ଏହା ବଢ଼ିଥାଏ । ତେଣୁ ନିୟମିତ ଶରୀରରେ ନଡ଼ିଆ ତେଲ ଲଗାଇବା ଦରକାର । ସେହିପରି ଶରୀରରେ ଝାଳ ଜମି ରହିଲେ ଯାଦୁ ହୋଇଥାଏ । ଏହାର ମୂଳ କାରଣ ହେଉଛି ଚିପା ପୋଷାକ ସହ ଜିନ୍ସ ପିନ୍ଧିବା । ଏବେ ହଷ୍ଟେଲ୍ରେ ରହୁଥିବା ପିଲାଙ୍କୁ ବେଶୀ କାଛୁ, କୁଣ୍ଡିଆ ହେଉଥିବା ଦେଖାଯାଉଛି । କାରଣ ସେମାନେ ଅଧିକାଂଶ ସମୟରେ ପରିଷ୍କାର ପରିଚ୍ଛନ୍ନ ରହୁନାହାନ୍ତି, ମଇଳା କପଡ଼ା ବ୍ୟବହାର କରୁଛନ୍ତି । ନିୟମିତ ହଷ୍ଟେଲ ପିଲା ଚର୍ମ ରୋଗରେ ସଂକ୍ରମିତ ହୋଇ ବହୁ ସଂଖ୍ୟାରେ ହସ୍ପିଟାଲ୍କୁ ଆସୁଛନ୍ତି । ତେଣୁ ଅଭିଭାବକମାନେ ଏହି ପ୍ରତି ଦୃଷ୍ଟି ଦେବାକୁ ସେ ପରାମର୍ଶ ଦେଇଛନ୍ତି ।