ପୁରୀ ୧୪/୧୨: ଡିସେମ୍ବର ୨୫ ତାରିଖରୁ ଶ୍ରୀମନ୍ଦିରରେ ଲାଗୁ ହେଉଛି ସୂର୍ଯ୍ୟପରାଗର ସ୍ୱତନ୍ତ୍ର ନୀତି ନିର୍ଘଣ୍ଟ । ଡିସେମ୍ବର ୨୬ ତାରିଖ ପୂର୍ବାହ୍ନ ୮ଟା ୨୦ ମିନିଟ ୮ ସେକେଣ୍ଡରେ ପାକ ତ୍ୟାଗ ଏବଂ ଦେବ ନୀତି ନିଷେଧ କଟକଣା ଲାଗୁ ହେବ। ୨୦୧୯ ଡିସେମ୍ବର ୨୫, ଧନୁ ୧୦ ଦିନ, ବୁଧବାର, ଜ୍ୟେଷ୍ଠା ବିଚ୍ଛା ନକ୍ଷତ୍ର ତିଥିରେ ଏହି ସୂର୍ଯ୍ୟପରାଗ ପଡୁଛି । ସୂର୍ଯ୍ୟପରାଗ ପାଇଁ ଶ୍ରୀମନ୍ଦିର ନୀତି ସବ୍ କମିଟିର ବୈଠକ ଡକାଯାଇଥିଲା । ବୈଠକରେ ସୂର୍ଯ୍ୟପରାଗ ନୀତି ସମ୍ପର୍କରେ ସବିଶେଷ ଆଲୋଚନା ହୋଇଥିଲା । ଏହି ନୀତି ନିର୍ଘଣ୍ଟ ଉପରେ ଛତିଶା ନିଯୋଗର ମୋହର ଲାଗି ନାହିଁ ଏବଂ ତେଣୁ କିଛି ପରିବର୍ତ୍ତନ ହେବାର ସମ୍ଭାବନା ରହିଛି । ତେଣୁ ନୀତି ନିର୍ଘଣ୍ଟକୁ ସାର୍ବଜନୀନ କରାଯାଇନାହିଁ ।
ନିର୍ଭରଯୋଗ୍ୟ ସୂତ୍ରରୁ ସୂଚନା ମିଳିଛି, ୨୬ ତାରିଖ ସକାଳ ୮ଟା ୨୦ ମିନିଟ ୮ ସେକେଣ୍ଡରେ ସୂର୍ଯ୍ୟପରାଗ ସ୍ପର୍ଶର୍ କରିବ । ପରେ ମହାପ୍ରଭୁଙ୍କ ଗ୍ରହଣ ମହାସ୍ନାନ, ତଡ଼ପ ମଇଲମ, ବେଶ, ମଙ୍ଗଳ ଆଳତି, ଅବକାଶ, ରୋଷହୋମ, ସୂର୍ଯ୍ୟପୂଜା, ଦ୍ୱାରପାଳ ପୂଜା, ଗ୍ରହଣ ସାଧା ବେଶ ପରେ ଗ୍ରହଣ ଭୋଗ, ମଇଲମ, ବେଶ, ଗୋପାଳ ବଲ୍ଲଭ ସରି ପହିଲି ଭୋଗ ଓ ସକାଳ ଧୂପ ନୀତି ବଢ଼ିବ । ପରେ ମହାପ୍ରଭୁଙ୍କ ଗୁରୁବାର ମାଜଣା, ଏକାନ୍ତ ଆଦି ନୀତି ସମ୍ପାଦନ ହେବାର ନୀତି ନିର୍ଘଣ୍ଟ ରହିଛି । ଡିସେମ୍ବର ୨୫ରେ ରାତି ତିନିଟାରେ ଦ୍ୱାରଫିଟା ଏବଂ ଭିତର ଶୋଧ ପରେ ସୂର୍ଯ୍ୟପରାଗ ପାକ ତ୍ୟାଗ ନୀତି ରାତି ୮ଟା ୨୦ ସୁଦ୍ଧା ଶେଷ ହେବ ।