ନୂଆଦିଲ୍ଲୀ: ଇଲେକ୍‌ଟ୍ରୋନିକ୍‌ ଭୋଟିଂ ମେସିନ(ଇଭିଏମ)ରେ ପଡ଼ୁଥିବା ଭୋଟ ଏବଂ ଭିଭିପାଟ୍‌ରେ ବାହାରୁଥିବା ସ୍ଲିପ୍‌କୁ ମେଳ କରିବା ନେଇ ଆବେଦନ ସୁପ୍ରିମକୋର୍ଟରେ ଖାରଜ ହୋଇଛି । ଶୁଣାଣି ସମୟରେ ସୁପ୍ରିମକୋର୍ଟ କହିଛନ୍ତି ଯେ, ଫଳଫଳ ଘୋଷଣା ହେବାର ୭ ଦିନ ମଧ୍ୟରେ ପ୍ରାର୍ଥୀ ଦ୍ବିତୀୟ ଥର ଲାଗି EVM ଯାଞ୍ଚ କରିପାରିବେ । ମାଇକ୍ରୋ କଂଟ୍ରୋଲର ମେମୋରିକୁ ଇଞ୍ଜିନିୟର ଯାଞ୍ଚ କରିବେ  । ହେଲେ ଏହି ବାବଦରେ ସମସ୍ତ ଖର୍ଚ୍ଚ ସଂପୃକ୍ତ ପ୍ରାର୍ଥୀ ଦେବେ । 

ଏହା ସହ ଜଷ୍ଟିସ୍‌ ସଂଜୀବ ଖାନ୍ନା ଏବଂ ଦୀପାଙ୍କର ଦତ୍ତଙ୍କ ଖଣ୍ଡପୀଠ ଭିଭିପାଟକୁ ନେଇ ନିର୍ବାଚନ କମିଶନଙ୍କୁ ପରାମର୍ଶ ଦେଇଛନ୍ତି । ଭବିଷ୍ୟତରେ ଭିଭିପିଏଟି ସ୍ଲିପ୍‌ରେ ବାରକୋଡ୍‌ ରଖିବା ଉପରେ ବିଚାର କରିବାକୁ ଇସିଆଇଙ୍କୁ କହିଛନ୍ତି ସୁପ୍ରିମକୋର୍ଟ । ଗତ ଶୁଣାଣି ସମୟରେ ସୁପ୍ରିମକୋର୍ଟ ଇଭିଏମ୍‌ରେ ଦିଆଯାଉଥିବା ଭୋଟ୍‌କୁ ଭିଭିପାଟ୍‌ ସହ ମେଳ କରିବା ସଂପର୍କିତ ଆବେଦନ ଉପରେ ନିଜର ରାୟ ସଂରକ୍ଷିତ ରଖିଥିଲେ । 

ଦେଶରେ ଦ୍ବିତୀୟ ପର୍ଯ୍ୟାୟ ନିର୍ବାଚନ ଚାଲିଥିବା ସମୟରେ ଶୁକ୍ରବାର ସୁପ୍ରିମକୋର୍ଟ ଭିଭିପାଟ୍‌ ଯାଞ୍ଚ ସଂପର୍କିତ ସମସ୍ତ ଆବେଦନକୁ ଖାରଜ କରିଦେଇଛନ୍ତି । ବାଲାଟ ପେପରକୁ ନେଇ ଆବେଦନ ମଧ୍ୟ ସୁପ୍ରିମକୋର୍ଟରେ ଖାରଜ ହୋଇଛି । ସୁପ୍ରିମକୋର୍ଟଙ୍କ ଏହି ନିଷ୍ପତ୍ତି ଫଳରେ ଇଭିଏମରେ ଦିଆଯାଉଥିବା ଭୋଟ୍‌ ସହିତ ଭିଭିପାଟ୍‌ର ସ୍ଲିପ୍‌ ସହ ଶତପ୍ରତିଶତ ମେଳ ଖାଉଛି କି ନାହିଁ ସେନେଇ ଯାଞ୍ଚ ହୋଇପାରିବ ନାହିଁ । 

ସୁପ୍ରିମକୋର୍ଟଙ୍କ  ଦୁଇ ଜଣିଆ ଖଣ୍ଡପୀଠ ସ୍ପଷ୍ଟ କରିଛନ୍ତି ଯେ, ମତଦାନ ଇଭିଏମ ମେସିନରେ ହିଁ ହେବ । ଇଭିଏମ ଏବଂ ଭିଭିପାଟକୁ ୧୦୦ ପ୍ରତିଶତ ମେଳ କରାଯିବ ନାହିଁ । ୪୫ ଦିନ ପର୍ଯ୍ୟନ୍ତ ପ୍ରାର୍ଥୀଙ୍କ ଦସ୍ତଖତ ସହ ଭିଭିପାଟର ସ୍ଲିପ୍‌ ସୁରକ୍ଷିତ ରଖାଯିବ । 

ଅନ୍ୟପଟେ ଶୁଣାଣି ସମୟରେ ଜଷ୍ଟିସ ଦୀପାଙ୍କର ଦତ୍ତ କହିଛନ୍ତି ଯେ, କୌଣସି ସିଷ୍ଟମକୁ ଆଖି ବନ୍ଦ କରି ଅବିଶ୍ବାସ କରିବା ଦ୍ବାରା ସନ୍ଦେହ ସୃଷ୍ଟି ହୋଇଥାଏ । ବିଶ୍ବାସ ଏବଂ ଭାଇଚାରା ବଜାୟ ରଖିବା ଗଣତନ୍ତ୍ରର ମୂଳଲକ୍ଷ୍ୟ । ସୂଚନଯୋଗ୍ୟ, ବର୍ତ୍ତମାନ ଲୋକସଭା କ୍ଷେତ୍ରର ପ୍ରତି ବିଧାନସଭା କ୍ଷେତ୍ରରେ ଥିବା କେବଳ ୫ଟି ମତଦାନ କେନ୍ଦ୍ରରେ ଇଭିଏମ ଭୋଟ୍‌ ସହ ଭିଭିପାଟ୍‌ର ସ୍ଲିପ୍‌କୁ ମେଳ କରାଯାଉଛି । କିନ୍ତୁ ପ୍ରତି କେନ୍ଦ୍ରରେ ଏଭଳି ଭୋଟ ସହ ସ୍ଲିପ୍‌କୁ ମେଳ କରିବା ଲାଗି ଆବେଦନ ଉପରେ ସୁପ୍ରିମକୋର୍ଟ ଇସିଆଇଙ୍କୁ ନୋଟିସ୍‌ କରିଥିଲେ  ।