କଟକ,୦୩/୦୬: ଚାନ୍ଦିନୀଚୌକ ଛକ ନିକଟବର୍ତ୍ତୀ ଏକ ସର୍ଜିକାଲ୍ ସାମଗ୍ରୀ ଗୋଦାମରେ ବିଳମ୍ବିତ ରାତିରେ ଅଗ୍ନିକାଣ୍ଡ ଘଟିଛି । ମେଡିକାଲ ସର୍ଜରୀ ଯନ୍ତ୍ରପାତି, ସାମଗ୍ରୀ, ଔଷଧ ଓ ବିଭିନ୍ନ ପ୍ରକାର କାଗଜପତ୍ର, ପେଟି ଥିବାରୁ ନିଆଁ ଖୁବ୍ଶୀଘ୍ର ବ୍ୟାପି ଯାଇଥିଲା । ପ୍ରଥମେ ସିଡିଏରୁ ଗୋଟିଏ ଅଗ୍ନିଶମ ଗାଡ଼ି ଘଟଣାସ୍ଥଳରେ ପହଞ୍ଚି ନିଆଁ ଲିଭାଇବାକୁ ଉଦ୍ୟମ କରିଥିଲେ ହେଁ ବିଫଳ ହେବାରୁ ବକ୍ସିବଜାର ଫାୟାର୍ ଷ୍ଟେସନ୍ରୁ ଏକାଧିକ ଗାଡ଼ି ଯାଇ ନିଆଁଲିଭା କାମରେ ନିୟୋଜିତ ହୋଇଛନ୍ତି । ପାଖାପାଖି ଦୁଇ ଘଣ୍ଟାଧରି ଉଦ୍ୟମ କରାଯିବା ପରେ ନିଆଁକୁ ଆୟତ୍ତ କରାଯାଇଥିବା ସୂଚନା ମିଳିଛି ।
ପ୍ରତ୍ୟକ୍ଷଦର୍ଶୀଙ୍କ ସୂତ୍ରରୁ ପ୍ରକାଶ, ବୁଧବାର ରାତି ପ୍ରାୟ ସାଢ଼େ ଦଶଟା ବେଳେ ଚାନ୍ଦିନୀଚୌକ ଛକରେ ଥିବା କିଶୋର ଚନ୍ଦ୍ର ରାଓଙ୍କ ସୁବର୍ଣ୍ଣା ଔଷଧ ତଥା ସର୍ଜିକାଲ୍ ସାମଗ୍ରୀ ଗୋଦାମରୁ ନିଆଁ ଓ ଧୂଆଁ ବାହାରୁଥିବା ଦେଖି ଲୋକେ ଅଗ୍ନିଶମ ସଂସ୍ଥାକୁ ଖବର ଦେଇଥିଲେ । ଖୁବ୍ଶୀଘ୍ର ନିଆଁ ବ୍ୟାପି ଯିବାରୁ ସ୍ଥାନୀୟ ଲୋକେ ଆତଙ୍କିତ ହୋଇଯାଇଥିଲେ । ଗୋଦାମରେ ଥିବା ଔଷଧ ଓ ଅନ୍ୟାନ୍ୟ ସାମଗ୍ରୀ ପୋଡ଼ି ପାଉଁଶ ହୋଇଯାଇଥିବା ବେଳେ କ୍ଷୟକ୍ଷତି ସଂପର୍କରେ ସ୍ପଷ୍ଟ ସୂଚନା ମିଳିନାହିଁ । ସର୍ଟ ସର୍କିଟରୁ ଅଗ୍ନିକାଣ୍ଡ ଘଟିଥିବା ଆଶଙ୍କା କରାଯାଉଛି ।
