ଟୋକିଓ, (ଏଜେନ୍ସି): ୩୨ତମ ଅଲିମ୍ପିକ୍ସ କ୍ରୀଡ଼ା ପ୍ରତିଯୋଗିତାରେ ଆମେରିକାର ସିଡନୀ ମ୍ୟାକ୍ଲଫଲିନ୍ ନୂଆ ବିଶ୍ୱ ରେକର୍ଡ ସ୍ଥାପନ କରିଛନ୍ତି । ମହିଳା ବର୍ଗ ୪୦୦ ମିଟର ହର୍ଡଲ୍ସରେ ସେ ନିଜ ନାମରେ ରହିଥିବା ବିଶ୍ୱ ରେକର୍ଡ ଭଙ୍ଗ କରିବା ସହ ସ୍ୱର୍ଣ୍ଣ ପଦକ ହାସଲ କରିଛନ୍ତି । ସେ ନିର୍ଦ୍ଧାରିତ ଦୂରତାକୁ ୫୧.୪୭ ସେକେଣ୍ଡରେ ଅତିକ୍ରମ କରିଥିଲେ । ଅନ୍ୟ ଆମେରିକୀୟ ତଥା ରିଓ ଅଲିମ୍ପିକ୍ସରେ ସ୍ୱର୍ଣ୍ଣ ପଦକ ଜିତିଥିବା ଡାଲିଲା ମହମ୍ମଦ ୫୧.୫୮ ସେକେଣ୍ଡରେ ରେସ୍ ଶେଷ କରି ଦ୍ୱିତୀୟ ସ୍ଥାନ ଅଧିକାର କରିଥିଲେ । ସେ ମଧ୍ୟ ପୂର୍ବ ବିଶ୍ୱ ରେକର୍ଡ ଭଙ୍ଗ କରିଥିଲେ ।
ହେଲେ ସେତେବେଳକୁ ସିଡନୀ ନୂଆ ବିଶ୍ୱ ରେକର୍ଡ ସ୍ଥାପନ କରିସାରିଥିଲେ । ସେହିପରି ନେଦରଲାଣ୍ଡ୍ସର ଫେମକେ ବୋଲ ୫୨.୦୩ ସେକେଣ୍ଡ ସହ ୟୁରୋପୀୟ ରେକର୍ଡ ସ୍ଥାପନ କରି ବ୍ରୋଞ୍ଜ ପଦକରେ ସନ୍ତୁଷ୍ଟ ହୋଇଥିଲେ । ପୂର୍ବରୁ ଏହି ଇଭେଣ୍ଟରେ ବିଶ୍ୱ ରେକର୍ଡ ଡାଲିଲାଙ୍କ ନାମରେ ରହିଥିଲା । ସିଡନୀ ଗତ ଜୁନ୍ରେ ଅନୁଷ୍ଠିତ ଆମେରିକା ଟ୍ରାକ୍ ଓ ଫିଲ୍ଡ ଚାମ୍ପିଅନ୍ସିପ୍ରେ ୫୧.୯୦ ସେକେଣ୍ଡ ଟାଇମିଂ ସହ ଡାଲିଲାଙ୍କ ବିଶ୍ୱ ରେକର୍ଡ ଭାଙ୍ଗିଥିଲେ । ସ୍ୱର୍ଣ୍ଣ ପଦକ ଦାବିଦାର ରୂପେ ସେ ଟୋକିଓ ଆସିଥିଲେ । ଆଜି ସେ ପୁନର୍ବାର ନିଜ ରେକର୍ଡ ଭାଙ୍ଗିବାରେ ସଫଳ ହୋଇଥିଲେ ।
ଅନ୍ୟ ପଟରେ ଡାଲିଲା ୪୦୦ ମିଟର ହର୍ଡଲ୍ସରେ ଅପ୍ରତିଦ୍ୱନ୍ଦ୍ୱୀ ଥିଲେ । ସେ ରିଓ ସମେତ ଦୋହା ବିଶ୍ୱ ଚାମ୍ପିଅନ୍ସିପ୍ରେ ମଧ୍ୟ ସ୍ୱର୍ଣ୍ଣ ପଦକ ହାସଲ କରିଥିଲେ । ଆଜି ଫାଇନାଲ୍ ରେସ୍ରେ ବନ୍ଧୁକ ସଂକେତ ମିଳିବା ମାତ୍ରେ ଡାଲିଲା ଷ୍ଟାର୍ଟ ଲାଇନ୍ରୁ କ୍ଷୀପ୍ର ବେଗରେ ଆଗେଇଥିଲେ । ପ୍ରଥମ ୨୦ର ମିଟର ପର୍ଯ୍ୟନ୍ତ ଡାଲିଲା ଆଗରେ ରହିଥିଲେ । ସିଡନୀ ଓ ଫେକମେ ପରସ୍ପର ସହ ତାଳ ଦେଇ ଆଗକୁ ବଢିଥିଲେ । ପରବର୍ତ୍ତୀ ୧୦୦ ମିଟର ବେଳକୁ ଡାଲିଲାଙ୍କ ନିକଟରେ ପହଞ୍ଚି ସାରିଥିଲେ ସିଡନୀ ଓ ଫେକମେ । ଅନ୍ତିମ ହର୍ଡଲ୍ସ ବେଳକୁ ଡାଲିଲାଙ୍କ ବେଗ କମିଥିଲା ଓ ସିଡନୀ ତାଙ୍କୁ ଅତିକ୍ରମ କରି ସାରିଥିଲେ ।
